فەرماندەیی گردینو هێزەکاو سوریای دیموکراتی ئەرەیاوناێوەش بە بۆنەو یادو پەنجەمین ساڵیادو ئۆپراسیۆنو باخۆزی وەڵا کەردۆ، کە دژو چەتەکاو داعشی دەسش پەنە کەرد و ٢٣ ئادارو ٢٠١٩جوگرافیاکە جە چەتەکا پاک کریاوە.

بەیاننامەکەنە، کە پەلیانەی ڕسمیی (قەسەدە)ینە وەڵا کریانۆ، یادو گەشمەرداو هجومو باخۆزی کریانۆ و وچیان "گەشمەردێما بە ونەو وێشا ڕاو سەرکەوتەی باخۆزیشا کەردۆ و چی هجوومەنە داستانی قارەمانێتییشا نویست."

ئەرەیاونایەکەنە ئاماژە کریان، کە قۆناغو کۆشیای دژو چەتەکانە، هەڵوێستو گەلی و پێکئامایەکاو سەرنیشت و وەرکەوتو سوریای گرنگیێوە فرەش بییەن و جە ماڕای داعشینە دەورش بییەن.

درێژەو بەیاننامەکەینە یاد وزیانۆ، کە هێزەکاو قەسەدەی دژو دڕندەتەرین چەتەکاو داعشی مدرامانێوە تارێخییشا کەرد، کە تا ئیساتێ ئینسانیەتی نەدیەن و پێسە بەردەوام بی: "جیهان شایەتحاڵو ئینەینە،جەنگەواناو ئێمە بە باوڕ بە دۆزەکەیۆ کۆشیێ و شکسشا بە چەتەکا ئارد.  

ئەرەیاونایەکەنە ئاماژە کریان، کە چەتەکاو داعشی لاو هێزەکاو قەسەدەیۆ، گورزی قورسشا وەرکەوتەن، کۆنترۆڵوو جوگرافیاو مەنتێقەکەیش دەسنە بییەن، پەوکای باخۆزنە خەڵکی بێتاوانی پێسەو قەڵغانی بەکار ئارێنێ، دڕندەتەرین چەتەکێ شارەکڵەو باخۆزینە بێنێ. وەختێ یاوێنە کە دماییشا ئامان، هاموەڵاتێ مەدەنیێ ئڕفانێنێ، پێسەو قەڵغانی مرۆیی بەکارێشا ئارێنێ. بەڵام هێزەکێما بە شارەزایی و پیمەرە مرۆییەکا وەنەو خەڵکی بێتاوانی نزیکێ بێنیوە. ئادێ چند جارێوە ئۆپەراسیۆنەکەشا مردنا و ڕاڕەوی مرۆییشا کەردۆ، تا خەڵکی مەدەنی دەسو ئا ڕێکوزیا تیرۆریستییەینە نەجاتشا بۆ. بەپاو یاسێ و پیمەرە ئینسانییەکا خەڵکی بێتاوان فاڕیێوە پەی مەنتێقە ئارامەکا. هەرپاسە ئەنداماو ڕێکوزیاکەیچ فاڕیێوە پەی چێرو چەمداری."

گرنگیی سەرکەوتەی باخۆزی بەیاننامەکەنە بە کەلیمێ پێسەو "هێزەکێما تاواشا ملوێنا هاموەڵاتێ مەدەنیێ دەسو تیرۆریستانە ڕزگار بکەرا، تا گردو جیهانی جە تەرسەکاشا ڕزگار بکەرا" و دەسنیشان کریا، کە پی ئۆپەراسیۆنەیە، ڕێکوستەی چەتەکاو داعشی، کە فرێشا سوریا و عێراقۆ ئارییبێنێ مەنتێقەکە و وەڵێ بیێوە و بێنێ بە هەڕەشێ سەرو فرەو وەڵاتا هێزەکاما ماڕێ.  

'تەرسەکێ بەردەوامێنێ'

بەیاننامەکەنە ئاماژە پانەیە کریان، کە ڕێکوزیاو داعشی هەڵای تەرسێوە گەورێنە پەی سەروو مەنتێقەکەی و جیهانی و وچیان: "چەتەکێ هەوڵێ مدانێ ڕاو شانە نهێنییەکاشاوە وێشا ڕێکێ وزاوە و وەرمەکاشا بارا دی. بە کوشتەی هاموەڵاتە بێتاوانا کە دایرە خزمەتگوزاری و ئیدارییەکانە هەرمانبەرێنێ و بە ئامانجگێرتەی سەرۆک عەشیرەتەکا وێشا قەوەت کەراوە.

بەیاننامەکەنە ئاماژە کریان، کە ئۆپەراسیۆنە سەروازییەکاو (قەسەدە)ی دژو شانەکاو چەتەکا بەردەوامێنێ، بەڵام تا سەرچەمەی ئایدۆلۆژیی داعشی وشک نەکریۆ، سەرکەوتەی یەکجاریی چێگە و جیهاننە نمێ دی، پەی ئی ئەم هەنگاما مشۆم " گردو جیهانی هامکاریێوە کاریگەرانەو هێزەکاما بکەرا و بەشداریی هێزەکاو هامپەیمانی میاندەوڵەتی پەی وەرگێریی تیرۆری و پێشکەشکەردەی پاڵپەشتیی پێویسی پەی درێژەدای بە جەنگو دژو ئا ڕێکوزیایە گرنگا. هەرپاسە پێویسشا بە هاوکاریین پەی ئاوەدانکەردەیۆ ئا هەرێما کە ساڵەکاو وەڵێنە بە دەسو تیروری وێرانکاری گەورەشا دییەن. پەوکای پەی ئەرەمەرزنای ئەرەمەرزیا گردییەکا پێویسیی بە ببەشدارییێوە فراوانی میاندەوڵەتی هەن. واوەی هامکاری پەی چارەسەرکەردەی دۆسیەو زیندانییاو ڕێکوزیا تیرۆریستییەکا و گێڵایۆشا پەی وەڵاتەکاشا گرنگا. پێویسا دادگایێوە میاندەوڵەتی هەرێمەکەمانە ئەرەمەرزنمێ، کە بەپاو یاسا میاندەوڵەتییەکا سەرپەرشتیی دادگاییکەردەیشا بکەرۆ. هەرپاسە خێزاناو ڕێکوزیاکەی کەمپو هۆڵینە هەرمانێ گەورێنە که نمەتاویا پەشتگۆشێ بوزیا. حەرچندە هێزەکێما هەوڵێ وشککەردەی سەرچەمەو چەتەکا مدا دلێ کەمپەکەینە، بەڵام هەڵای پێسەو بۆمبی مەنەنۆ. ئینەیچ وێش پەی وێش جیهانی وزۆ تەرسیوە و پێویسا گرد لایێ مامەڵەش چەنی بکەرا."

ئاخرو بەیاننامەکەینە سەرنجە کێشیێنە پەی ئانەیە، کە دەوڵەتی ئەرەگیرو تورکی پەشتیوانی ونەو چەتەکا مکەرۆ و بەشێوە جە هجوموو چەتەکا مەنتێقەو دێرەزۆرو داعشینە زیندە مکەرۆوە و پێسە مویندێ ماڕای ئا ڕێکوزیا تیرۆریستییەیە پێویسیش بە هامکاریێوە کاریگەرانەو گلێرگەی میاندەوڵەتیین."