ناوەندوو ئەرەیاونای و پەیوەندییەکاو هێزەکاو سووریای دیموکراتیک (قەسەدە)، ئاماروو هجوومەکاو دەوڵەتی ئەرەگیروو تورکی و چەتەکاش پەی سەروو سەرنیشت و وەرکەوتوو سووریای و ئاماروو چالاکییەکاو قەسەدەیش ئەرەیاونا.  

ئاماژە پانەیە کریان، کە دەوڵەتی ئەرەگیر و چەتەکاو تورکیای بەرڎەوامۍ بیێنۍ جە هجوومەکاشانە بە درێژایی ساڵەو ٢٠٢٣، جگە چانەیە کامپە مەدەنییەکانە و ئەرەمەرزیا خزمەتگوزارییەکێشا کەرڎێنۍ ئامانج، هەرپاسە دەیان هاموەڵاتۍ مەدەنیۍ، دلێشانە زارۊڵۍ و ژەنی، هجوومەکاو مانگەو تشرینوو یوەمی  و کانوونوو یوەمینە گەشمەرڎۍ بیێنۍ.

واتەنیچش، چەتەکاو سەر بە حکومەتوو دیمەشقی هجوومشا کەرڎەن سەروو چندین شارۊچکا و جەنگواناو قەسەدەیشا گەشمەرڎۍ کەرڎێنۍ، ماوەو ئێساڵینە، هێزەکاو قەسەدەی شەهبا، مەنبەج، عەین عیسا، تەل تمر و زرگاننە دەیان ئۊپەراسیۊنێشا دژ بە ئەرەگیرا کەرڎێنۍ و ئاسایشوو دێرەزۊریشا پارێزنان.

بەپاو ئامارەکەو قەسەدەی، هجوومەکاو دەوڵەتی ئەرەگیروو تورکی و چەتەکاش پەی ساڵەو ۲۰۲۳ پێسنە بییەن.

ماوەو ساڵەو ٢٠٢٣دا دەوڵەتوو تورکی و چەتەکێش، ٧٩٨ هجوومێشا کەرڎێنۍ، کە ٥٧٨ هجوومێشا بە چەکی قورس بیێنۍ و ١٠٣ هجوومۍ جە ڕاو فڕۊکەی جەنگی و فڕۊکەی بێفڕۊکەوانی و فڕۊکەی وێکوشیوە بیێنۍ، دماتەر ٢٥ هجوومۍ جە ڕاو  چەکی نیشانەماڕی و مامناوەندیوە، ٢ جارۍ بە مین و تەقەمەنی هجووم کریان.

چالاکییەکاو پارێزنای ڕەواو قەسەدەی

١٤٣ ئۊپەراسیۊنۍ ڕاو چەکی قورسیوە کریێنۍ و تاویان ٥٢ سەروازۍ ئەرەگیرۍ تورکۍ و ١٨٥ چەتۍ کوشیێنۍ، کە گردیوە ٢٣٧ کەسۍ سزا دریێنۍ، هەرپاسە ٩١ سەروازۍ تورکۍ و ٢٠٤ چەتۍ بریندارۍ بیێنۍ، کە گردیوە ٢٩٥ چەتۍ بیێنۍ، دەیان سەیارۍ دوژمنی و بنکە و بارەگێکێشا چالاکییەکانە تێکۍ دریێنۍ.

ژمارەو گەشمەرڎەکاو قەسەدەی

ئەرەیاوناکەینە ئاماژە پانەیە کریان، کە ١٧٣ جەنگوانۍ قەسەدەۍ گەشمەرڎۍ بیێنۍ و ١٥ بریندارۍ بیێنۍ و بوون جە وەرگێریکەرڎەی هجوومەکاو دەوڵەتی ئەرەگیروو تورکی و چەتەکانە و هجوومەکاو چەتەکاو حکومەتوو دیمەشقینە.

واتەنیچش، بە هجووموو ئەرەگیرا و چەتەکا پەی سەروو هاموەڵاتا و خەڵکی مەدەنی، ۱۱ زارۊڵۍ و ۳۹ هاموەڵاتۍ گەشمەرڎۍ بیێنۍ و ٨٣ کەسێچ بریندارۍ بیێنۍ، کە دلێشانە پەنجشا زارۊڵۍ بێنۍ.

هجوومەکاو دەوڵەتی ئەرەگیروو تورکی و چەتەکاش پەی سەروو هاموەڵاتە مەدەنییا و چێرخان و ئەرەمەرزیا خزمەتگوزارییەکا

ئامارەکەدا ئامان، سوپای ئەرەگیرەو تورکی بە چەکی قورسۊ ٢٤ جارۍ هجوومشا کەرڎەن سەروو ناوەندە خزمەتگوزارییەکا بەتایبەت دماو بوومەلەرزەکەو ٦ شوباتوو ئێساڵی سەرنیشتوو کوردستانی – تورکیا و سووریانە، هەرپاسە ٣٤٨ جارۍ فڕۊکەی بێفڕۊکەوان سەروو مەنتێقەکەیرە فڕێنۍ و ٢٧ جارۍ هەلیکۊپتەرۍ و فڕۊکە جەنگییەکۍ عاسمانوو سووریایشا بەزنان.

هجووموو سەروو هاموەڵاتا

ئاماژە کریان، کە دەوڵەتی ئەرەگیروو تورکیای دلێڕاسەو مانگەو ئازاریوە ئاوەو ڕووباروو فوراتیش  بڕیێنە، پەوکای ئاوەو بەنداوو فوراتی کەمش کەرڎەن و ئەنجامنە کارەبا فرەو یاگەکانە بڕیێنە و خەڵکوو گردوو مەنتێقە کەناراوەکا کێشەو ئاوەو وارڎەیوەشا بیێنە.  

واتەنیچش،  ۲۷حوزەیرانینە دەوڵەتی ئەرەگیروو تورکیای جارێوە تەر وێستگەو ئێلۊکیش سێرکانینە وستەرە، کە پەی پێویسیی ئاوەو وارڎەیوە حەسەکەی هەرمانە کەرۍ و بی بایسوو ئانەیە  ملوێنۍ کەسۍ شارەکەنە و دەوروبەرشنە بێئاوۍ با. هەرپاسە چەتەکۍ چندین جارۍ وێستگەکەشا وستەرە و ڕاشا جە لوای ئاوەکۍ گێرتە.

وستەنیچش ڕووە، ۵ تشرینوو یوەموو  ۲۰۲۳، سوپای ئەرەگیرەو تورکیای هجوومش کەرڎەن سەروو فرەو یاگەکاو سەرنیشت و وەرکەوتوو سووریای بە فڕۊکەی جەنگی و فڕۊکەی بێفڕۊکەوان و تانک و تۊپۍ و مووشەکۍ، هەرپاسە ئاوی و کارەبا و نەوتە و کۊگاو گەنما و مەکتەبەکێش کەرڎێنۍ ئامانج.

دماتەر ٢ نیسانوو ٢٠٢٣ سوپای ئەرەگیرەو تورکیای دەگاو عەین ئەلعەبیدیش تل تەمیرنە بۊردومانە کەرڎە، ئەنجاموو هجوومەکەینە دووۍ واڵۍ هەمان خێزانی گەشمەرڎۍ بیۍ و یەرۍ برێچ بریندارۍ بیۍ.

هەرپاسە ٨ ئابوو ئێساڵینە دەگاو ئەلشەرەقەو سیلوکینە، پانیشتوو ڕاو ئێم فۊڕینە بۊمبواران کریا، ئەنجامەنە ژەنێوە و دووۍ زارۊڵێش کە یانەو وێشانە کریۍ ئامانج کوشیۍ و ژەنێوە و دووۍ زارۊڵێش بریندارۍ بیۍ.

ئەوەڵوو مانگەو حوزەیرانینە دەگاو موحستانین سەرنیشت و وەرنیشتوو منبجینە بە چەکی قورس بۊمبواران کریا و  ئەنجاموو هجوومەکەینە چوار زارۊڵۍ کوشیۍ و ٩هەمان مانگینە سوپای ئەرەگیرەو تورکیای دەگاو تەهاو وەرنیشتوو منبجیشا بۊردومانە کەرڎە، ئەنجاموو هجوومەکەینە یەرۍ زارۊڵۍ هەمان خێزانی بریندارۍ بیۍ.

 ٢٣ ئابی فڕۊکێوە بێفڕۊکەوانوو سوپاو  تورکیای سەیارێوە ژەن-تیڤییشا بۊردومان کەرد، سەروو ڕاو قامشلۊ-عاموداینە سنووروو دەگاو تل تەمرینە، ئاکامنە نەجمەدین فەیسەڵی گەشمەرڎە بی، هاج سینان کارمەندەو ژەن- تیڤی بریندارە بییە.

بەرواروو  ٨و ١٠و ٢٠٢٣ ئاکاموو هجوومێوە سوپای ئەرەگیرەو تورکیاینە دەگاو بیشێریشینە ترپەسپیینە پەنج کرێکارێش کەرڎۍ ئامانج و سەرجەمشا بریندارۍ بیۍ و ڕۊی دماتەر سوپای ئەرەگیرەو تورکیای دەگاو مستوروو عەین عیسایش بۊردومانە کەرڎە و ئەنجامنە دوۍ زارۊڵۍ یەک یانەی کوشیۍ.

بەرواروو ٧و ١٠و ٢٠٢٣ دەگاو خالیدییەو وەرنیشتوو عەین عیسای بۊمبواران کریا، ئەنجاموو هجوومەکەینە ژەنێوە ٦٥ساڵە، کە بە تۊپێوە یانەکەنە گەشمەرڎۍ بییە و مێرڎە ٧٠ ساڵەکەیچش بریندار بی.

بەرواروو ٨و ١٠و ٢٠٢٣ فڕۊکە جەنگییەکاو دەوڵەتی ئەرەگیروو تورکیای ئەکادیمیاو هێزەکاو ئاسایشوو دلێشا بۊردومانۍ کەرڎۍ دەگاو حەمزە بەگینە هجوومەکەنە ٢٩ ئەندامۍ هێزەکاو دژە ماددە هۊشبەرەکا، کە مەشقنە بێنۍ گەشمەرڎۍ بیۍ.  

بەرواروو ٢٥و ١٢و ٢٠٢٣ فڕۊکەی بێفڕۊکەوانوو دەوڵەتی ئەرەگیروو تورکیای هەریۊ جە یاگەکاو (چاپخانەو سیمیشلی، وێستگەو گازی سێدکۊپی، کۊگاو وارڎەی، ئەرەمەرزیاو سینای، خەسەخانەو کۊرۊنای، وێستگێوە کارەبۍ، کۊگێوە، ناوەندێوە ئۊکسجینی، هەرمانگێوە سیرامیکی، وێستگێوە بیناسازی، دەگاو ئوم فیرسانی، وێستگێوە بەرهەمئارڎەی چێوو پاککەرڎەیۊ) هەرپاسە شاروو عەمودەینە هەرمانگێوی زەیتوونی و کۊگێوە گەنما و هۊڵۍ زەماوندێشا بۊردومان کەرد، دمایی هجوومەکاو سوپای ئەرەگیرەو تورکیاینە ٧٤ ناوەندۍ مەدەنیۍ و بنکۍ نەوتۍ و چێرخانی ئابووریی وەرنیشتوو کوردستانی بۊردومانۍ کریۍ.