نویسەرو بوارو ڕۆمانە-وێنەی شۆن میشێل ویلسۆن کە ٤٥ ڕۆمانە-وێنێش دەربارەو کەسایەتییە جەهانیە کاریگەرەکا نویستێنۍ  و دما ڕۆمانیشچش بە شێوێوە وێنەیی دەربارەو ژیۋای ڕابەرو گەلوو کوردی عەبدوڵا ئۆجالانی بە نامۍ 'ئازادی سەرگنۆ' نویستەنۆ و بە زۋانەکا کوردی، تورکی، ئەڵمانی وەڵا بیەنۆ. چا بارۆ نویسەر شۆن میشێل ویلسۆن پەی ئاژانسیما قسێش کەردۍ و ئاماژەش پانەی دا نویستەیۆ ئی کتێبەیە پېسەو پاڵپەشتین بە ئەرەکۊشای ئازادی ڕابەرو گەلوو کوردی عەبدوڵا ئۆجالانی. پۊکەی جە لایەنو ئەنارشیستەکاوە بە تایبەتی پێشوازیش ۋنەکریا.

'جیلی تازە عالتەر میاوۆنە'

جە بەردەوامینە نویسەر ویلسۆن ئاماژەش پانەی دا کە جیلی تازە بەکەمی کتێبۍ موواناوە. زیاتەر وێنە-ڕۆمان بەکاربریۆ و واتش: "ئی هەرمانۍ منە زیاتەر مېیاوۆ بە جیلی تازەی. پۊکەی ئی جۆرە کتێبۍ ئەرزشی تایبەتیش هەن و بەپەیلواو من جیلی تازەی زیاتەر ئاشنا بە تەڤگەری ئازادی و عەبدوڵا ئۆجالانی مکەرۆ. ۋێچم سەرەتا فرە ئاشناو گەلوو کوردی نەبێنا بەڵام جە ڕاو گێڵایمۆ پەی ئاماڎەکەردەی کتێبەکەی زیاتەر ئاشناو گەلوو کوردی بیانی، وە گەلوو کوردی بە خاکەڕایی ۋێشاوە سوپاسشا کەردا پەی ئاماڎەکەردەی ئی کتێبەیە. ئانەی یاوانینە ئانەنە ئۆجالان ئامانجش ئاردەی ئارای دیموکراتیکیا، کە ئینەیچ پەیامێوە گرنگا پەی  جەهانی."

'تەجروبەکۍ زاوڵەیم هۆرچەرخنان پەی پارادایمی'

نویسەر وێلسۆن ئاماژەش پانەی دا کە جە کتێبەکەشەنە باسو قۆناغەو زاوڵەیی ڕابەرو گەلوو کوردی عەبدوڵا ئۆجالانی کریان و واتش: " پارادایمەکێش ورقوڵیۍ تەجروبەو ژیۋای زاوڵەیشەنۍ، چەوەسنایۆ ژەناش جە گلېرگەنە بە ئامیانو خەباتی پەی ڕزگاری ژەنا. ئینێچ گرڎ بە وێنە جە ڕۆمانەکێنە بە زەریفی بەرگنۆ. عەبدوڵا ئۆجالان ئازادکەردەی گەلوو کوردی و گەلا تەریش کەردەن بە بنەماو ئازادی ۋێش، ئینەیچ کەردەنش بە سەرکردێوە مېیاننەتەوەیی. پۊکەی پەنەوازا ئازاد بۆنە."

جە دمادماینە نویسەر باسش جە شێوەو ڕۆمانەکۍ کەرڎ و ئاماژەش پانەی دا ڕۆمانەکۍ بەشەکریێنە سەرو دوۍ بەشارا، بەشی یووەم و ڕۆمانەکۍ تەرخانکریان پەی سەردەمو زاوڵەیی ڕابەرو گەلوو کوردی عەبدوڵا ئۆجلانی و جە بەشی دووەمیچەنە باس جە پارادایمو 'کۆنفیدراڵیزمی دیموکراتیک'ی و شۆڕشوو ۋەرنیشتی مکەرۆ.