پەدەکە کە بە سەرکوتکەردەو ئازاڎیی رابەربڕیەی و گێرتەی و سزادای رۆنامەنوویسا و چالاکا ئشناسیان، چی ساڵا ویەردەینە فشارەکێش پۍ سەروو رۆنامەنوویسا و رەخنەگرا چڕتەر کەردەنۆ و جە ئیسەنە دەیان رۆنامەنوویسۍ و چالاکۍ مەڎەنیۍ ئینۍ زینڎانەکا ئا حزبەینە.

دماو ئانەی سلێمان ئەحمەڎ ڕۆنامەنوویس و هەواڵسازوو بەشوو عەرەبی ئاژانسوو رۆژ نیوزی، جە ١و تشرینوو یوۋەم و ساڵەی ویەردېوە، پۍ سەردای خێزانەکەیش و بەشداریکەرڎەی جە تەعزیەو تاتەیشەنە لووابۍ پۍ ۋەرنیشتوو کوردسانی، دماو گېڵایۊیش پۍ پانیشتوو کوردسانی، جە دەروازەی ڕسمی فیشخاپووریۆ، جە ٢٥ هەمان مانگێنە جە تەرەفوو هێزەکاو پەدەکەیوە گیریا و بێسەروشۊنکریان.

هامشێوەو دۆسیەو رۆنامەنوویسا زینڎانی کریاو بادینانی، تەسەور کریۆ پەدەکە جە ڕاو تۆمەتەی ساختێوە سزای قورسیچ سەروو رۆنامەنوویس سلێمان ئەحمەڎیرە سەپنۆ.

سەرەڕاو ویەرنای پەنج مانگا سەروو بڕفانای و بێسەروشۊنکەردەو رۆنامەنوویس سلێمان ئەحمەڎیرە و سەرەڕاو کاروەدای و ناڕەزایەتیەکا سەروو ئاستوو دلېینەی و بەروو کوردسانی، هەڵای پەدەکە ڕاش نەڎان پارێزنەرەکېش چەمشا پنەش گنۆ.

وەڵتەر ئاژانسوو رۆژنیوزی جە ئەرەیاۋنېوەنە وەڵاش کەردەبێوە،"ئی مامەڵەو پەدەکەی ۋەران ۋەروو ڕۊنامەنویسا ئیڎانەکەرمۍ و داواکارېنمۍ دەموودەس هەواڵسازەکەما ئازاڎ بکریۆ و جە ئیسەیچەنە سڵامەتی گیانوو ئا رۆنامەنووسەیچە ئینا ئەستۆو پەدەکەینە".

حەرپاسە ڕۊو ٢٥و مانگەو ١ و ئێساڵی نەریمان ئەحمەڎ، یۆ جە ئەنداما تیموو پارێزنەرا سلێمان ئەحمەڎی ئەرەیاۋناش: ئەگەر جە وەختۍ نزیکەنە چارەنوویسوو سلێمانی ئاشكرا نەکریۆ، ئانە حكومەتوو هەرێمی و وەزیروو دلێینەو هەرێمی پەلكێشوو دادگاو فیدراڵی کەرمۍ، پۊکەی داوا کەرمۍ، ڕاما پنە بڎا بوینمێش و تۆمەتەی ساختێش پۍ وەش نەکەرا".

باسش چانەیچ کەرد، "جە وەختوو سەردایەکامانە پۍ حۊڵوو وینای سلێمان ئەحمەڎی، بێجگە جە سلێمان ئەحمەڎی، فرەو کەسا تەری بە ناڕەوا جە زینڎانوو ئاسایشینە گیریێنۍ و حیچ تۆمەتێوەشا نییا، ئینە پاشێلکاریێوە ڕۊشنا و ئەرکوو گرڎ لایەنەکا و ڕێکوزیاکا مافوو مرۆڤیا دژوو ئا مژاریە مرداوە".