٣٣مانگېن حیچ هەواڵێوە جە ڕابەروو گەلوو کوردی عەبدوڵا ئۆجالانی مەزانیۆ، کە ٢٤ ساڵېن جە دوورگەو ئیمراڵی چېروو هەلومەرجی دژوارینە گۆشەگیر کریان. عەبدووڵا ئۆجالان کە مافوو دیڎاری و چەمپنەکۊتەیش ۋنە زەوت کریان، رووبەڕوو ئاژەو ئەرەبڕیای و گۆشەگیرکەرڎەی رەهای بیەنۆ. ١٠و تشرینوو یووەم و ٢٠٢٣ پەی ئازاڎیی جەستەیی عەبدوڵا ئۆجالانی بە ئەرەیاۋنېوە هامبەش جە ٧٤ ناوەندا جەهانینە هەڵمەتەو "ئازاڎیی پۍ عەبدوڵا ئۆجالانی، چارەسەر پۍ پرسوو کوردی" دەسشپنەکریا.

پەشتیوانی پۍ ئا هەڵمەتۍ جە بەشە جیاجیاکاو جەهانینە بەردەواما. هاموەخت چنی گەورەتەربیەی قەیرانەکا مۆدێرنیتەی سەرمایەداری، بەهەمان شێوە ئا بەشە کۆمەڵایەتیا سەروو پاڕادایموو عەبدوڵا ئۆجالانی پېسە ڕاو مردایۆ ۋەران ۋەر پا قەیرانا کۊشیانە، ڕۆ دماو ڕۆی گەورەتەرۍ با. عەبدوڵا ئۆجالان و ئەندێشەکېش پۍ ئا کەسا جە بواری جیاجیانە کۊشیانە و سەرچەمەو ئیلهام و ئیسفاڎە هۊرگێرتەین. ئەندامەو جمیەرەو جێمینسام کامپفێنی ئەڵمانیای روئا فیکتۆیە سەبارەڎ بە هەڵمەتەو "ئازاڎیی پۍ عەبدوڵا ئۆجالانی، چارەسەر پۍ پرسوو کوردی" و گرنگی پاڕادایموو عەبدوڵا ئۆجالانی قسېش پۍ ئاژانسوو هەواڵوو فوراتی (ANF)ی کەردۍ.

'ئۆجالان چارەسەری پۍ قەیرانەکاو جەهانی وزۆ ڕووە'

روئا فیکتۆیە باسش چانەی کەرڎ، کە پاڕادایموو کۆنفیدڕاڵیزمی دیموکراتیکی عەبدوڵا ئۆجالانی پۍ ئەنەیاوای جە قەیرانەکاو جەهانی و مەڵامەتەکاش گرنگا و واتش، " سەرەڕاو ئانەی کە پاڕادایموو ئۆجالانی جە ۋەرکەوتوو دلېڕاسەی و مەزرا بۆتانی وەڵېکۊتەبۊ، ئا پاڕادایمە تەنیا پەیوەندیش بە قۊرتەکاو ۋەرکەوتوو دلېڕاسەی و کوردسانیۆ نییا، بەڵکم پۍ قەیرانەکاو جەهانیچ چارەسەری وزۆ ڕووە. پۍ نمونەی پۍ وڵاتەکەو من ئەڵمانیایچ چارەسەری و رانماییش جە وۍ گێرتەن جە هەمان وەختەنە ڕېوە یاگەگیرە پۍ ئا قەیرانا کە گەلاو ئەڵمانیای رووبەڕووشا بیېنێوە، نیشانە مڎۆ".

فیکتۆیە واتش، پاڕادیموو ئۆجالانی جە هەمان وەختەنە ڕاما پنە مڎۆ کە ئێمە پېسە کەسایەتی درک بە وېما کەرمۍ و پی جۆرە بەردەوامە بۍ: "جە سایەو ئەندێشەکاو ئۆجالانیۆ متاومۍ سەرجە نۆ ۋېما پێناسە کەرمېوە. ئاڎ ڕابەرېوە گرنگا".

'مشۊم پېوەرە کۊشیەیمۍ'

روئا فیکتۆیە ئاماژەش پانەی کەرڎ کە عەبدوڵا ئۆجالان جە ۋەران ۋەروو سیستمە باڵادەسەکانە ئەڵترناتیڤێوە گرنگ پێشکەش کەرۆ و جەختش کەردۆ کە مەکریۆ "بە ئایدۆلۆجیاو نەتەوە-دەوڵەتی کە ئارۆ باڵادەسېنۍ پەیوەسۍ بیمۍ، بەڵام ئۆجالان ڕېوەتەرەش نیشانە دېنە، ئانەش وستەن ڕووە کە چنی کریۆ سیستمێوە بێدەوڵەت، بێ دەسەڵاڎداری ئەرەمەرزیۆ. پاڕادایموو ئۆجالانی نەک هەر رێبازێوەن پۍ ئەنەیاوای جە راسی ئا سیستما ئێمە ئارۆ چنەشەنە مژیومۍ، جە هەمان وەختەنە پۍ ئانەین دلۍ گلېرگەکانە پەیوەندیېوە بەقووەت بېنە ئاراوە، دەرفەتا. ئۆجالان سەرنج پۍ لاو رێکوستەبیەی کۆمەڵایەتی جە بەروو دەوڵەتی کێشۆ. دەوڵەت نەتەوەکۍ گرڎ وەختۍ بە ئشناسنامە، رەگەزپەرسی، واتە جیاوازییەکاما ئێمە جە یۊترینی بڕارە. جە ۋەران ۋەروو ئانیشانە مشۊم ئێمە یۊگێرتەیی ۋېما بەقووەت کەرمۍ و پېوەرە کۊشیەیمۍ".

'ئۆجالان ڕانمایی گرنگ پۍ ژەنا وزۆڕووە'

روئا فیکتۆیە سەرنجش وست سەروو ئەندێشەکاو ئۆجالانی پۍ کۊشیای ئازاڎیی ژەنا و واتش، "بە بڕواو من ئانەی ئەندێشەکاو ئۆجالانی پۍ جمیەرەکا ژەنا گرنگ کەرۆ ئانەن کە ئۆجالان تەنیا پێشنیاز مەوزۆڕووە، بەڵکم بە کردەوەیچ جوواب مڎۊوە. ئۆجالان تەنیا مەواچۆ کە مشۊم ژەنا ۋېشا رێکوزا، ئانڎەی جە ئۆجالانی یاوانانە، حۊڵ مڎۆ جە ژەنا بیاوۊنە و بە پاو ئەنەیاوای جە ژەنا داواکاری ژەنا بەرجەسە کەرۊوە. ئاڎە پەنەوازیەکا ژەنا بە عالی موینۆ و جە بارەو رێکوستەکەردەی ئاڎیشاوە پێرسپێکتیڤی گرنگ پێشکەش کەرۆ. ئێمە ئا چېوا جە مەنتیقە جیاجیاکا جەهانینە مەوینمۍ. چی ڕوۆ پاڕادایموو ئۆجالانی پۍ ژەنا ساحیب پێگېوە تایبەتا.

جە ساڵانی ۋیەردەنە کۊشیای ژەنا جە جەهانەنە فرە زیاڎش کەردەن، بەڵام جە هەمان وەختەنە بەقووەت بیەی سیستمی فاشیستی و تاتەسالاریچ ئینا ئارانە. جە لېوەتەرۆ جە ڕاو پاڕادایموو ئۆجالانیوە متاومۍ ۋەران ۋەر بە گرڎ جۆرە سیاسەتێوە کە جە دژوو ژەنا وەڵۍ وزیۆ، بیمۍ بە جواب دەر".

'وەختۍ ئەنەیاوای جەبارەو پاڕادایمیوە مېنە ئاراوە ، داواکاری پۍ ئازاڎیی ئۆجالانی زیاتەر بۆ'

روئا فیکتۆیە ئانەیچش وست ڕووە کە هەلومەرجوو دژواروو گۆشەگیری سەروو ئۆجالانی، مایۍ قبوڵ کەردەی نییا و جەختش کەردۆ کە هەڵمەتەو "ئازاڎیی پۍ ئۆجالانی و چارەسەری سیاسی پۍ پرسوو کوردی" مشۊم جە تەرەفوو گرڎوو بەشەکاو گلېرگەیۆ پەسەنڎ کریۆ. روئا فیکتۆ ئەرەیاۋناش، "ئی هەڵمەتۍ پۍ ئازاڎیی ئۆجالانی نەک سەروو پێشنیازوو جمیەروو کوردی، بەڵکم جە ئاکاموو پەیوەندی ئی دماییەو بەشە جیاجیا کۆمەڵایەتیەکا بنیاڎنریا و وەڵۍ وزییا. ۋەروو ئانەی ئا بەشە جیاجیۍ گلېرگەی جە ئۆجالانی یاوېنە، پێشنیازشا کەرڎ کە پەی ئازاڎیی ئۆجالانی هەڵمەتێوە ساز کەرا. ئا هەڵمەتۍ جە بنەڕەتەنە جە ئاکاموو جوواب دایۆ پاڕادایموو ئۆجالانی دلۍ گەلینە ئاما ئاراوە. مرۆڤ چنڎە جە ئۆجالانی بیاوۆنە، ئانڎە باوشیش پۍ کەرۊوە و داواو ئازاڎیی ئاڎی کەرۆ. تا ئیسە هەڵمەتێوە ئازاڎیی گەورەی پی جۆرەم نەدیەن. مشۊم ئا هەڵمەتۍ تا میاوۆ بە ئەنجام، زیاتەر باوشیش پۍ کریۊوە و ۋەرفراوانتەر کریۆ".

'تا ئۆجالان ئازاڎ نەکریۆ، گلېرگەیچ ئازاڎ مەبۆ'

روئا فیکتۆیە سەرنجش وست سەروو گرنگی ئازاڎیی عەبدوڵا ئۆجالانی پۍ ژەنا و واتش، "ئازاڎیی ئۆجالانی پۍ ژەنا گرنگیېوە فرەش هەن. بەتایبەتی ئێمەی ژەنا ئەوروپی مشۊم عال ویر کەرمېوە کە هەلومەرجوو گۆشەگیری سەروو ئۆجالانی پۍ ئێمە بە چ مانېوەن. مەبۆ قبوڵش کەرمۍ کە بیرمەندێوە گەورەو ئازاڎیی ژەنا جە زینڎانەنە بۆ. ئازاڎیی ئۆجالانی و ئازاڎیی ژەنا پېوەرە بەسیانۆ. تا ئۆجالان ئازاڎ نەکریۆ، ئا گلېرگۍ ئێمە چنەشەنە مژیومۍ و قوربانیۍ سیستمینۍ، مەتاوا ئازاڎۍ با".