مەجلیسوو ژەناو دەم پارتی ئەزمیری و تەڤگەروو ژەنە ئازادا ( تەژەئا) بە بەشداریی سیاسەتمەدارە سەباحەت تونجەلێ و پەرلەمانتارەو دەم پارتی دەرسیم ئایدنێ سەروو بابەتوو "دژوو گۆشەگیری کۆشیای ئازادی مکەرمێ، دژوو دەسملەرەگێرتەی ئیرادەی، سەرمەشقی ئاوەدانکەردەیوەنمێ" واتەواچێوە ڕێک وزیا.

بەرنامەکە هۆڵوو ژەن ئارتینە ڕێک وزیا و خەڵکێ فرە ئامێبێنێ و بە دەیەقێوە ڕێزگێرتەی پەی گیانبەختکەردا دەسش پەنە کەرد.  

پەرلەمانتارەودەم پارتی دەرسیم ئایدن ە تیشکەش وستە سەروو گۆشەگیریی ئیمرالی و واتش کۆشیای دژوو ئەرەگیری بەردەوام مبۆنە و ئەرەیاوناش:" گردوو هەرمانە دژە دیموکراتیکەکا چەنی گۆشەگیریی دەسشا پەنە کەرد، گۆشەگیریی ئیمراڵی گرد بەشێوە گلێرگەینە وەڵا بییەنۆ، پەنەوازا جە سەدەی دووەمنە سیاسەتوو نکۆڵی و پاکتاوی هوربشنیۆوە، گەر نا تورکیا دیموکراسی بە وێشۆ نمەوینۆ، پەنەوازا دەوری سەرەکیما بۆ کۆشیاینە".

"پەنەوازا ئی سیستمەیە نازمێ"

سیاسەتمەدارە سەباحەت تونجەلە واتش: "تا ڕابەروو گەلوو کوردی عەبدوڵا ئۆجالان زیندانەنە بۆ، ئێمەیچ ئازادێ نمەبیمێ. تا ئی سیستمە هورنەشنیۆوە ئازادی و ئاشتی نمێ تورکیاوە، ناوەندوو جەنگوو تورکیای و سیاسەتوو چارەسەرنەکەردەی زیندانوو دورگەو ئیمرالییا، ئیمرالینە ڕژێمی تایبەت هەن. تا پەرسەو کوردی بە ئاشتییانە و دیموکراتی چارەسەرە نەکریۆ سەرەمڕ قەیرانێ ڕووە مکەرا تورکیای. دەوڵەت گەرەکشەن ڕاو  سیاسەتی دیموکراتیکی بوزۆرە. ئی ڕێ بوزیۆرە تندوتیژییش وەنە مگنۆوە، کورد تندوتیژییش گەرەک نییەن ئا دەوڵەتا کە گەرەکشەن. پێسەو چەنی کورد ماچۆ"دیموکراسی، ئاشتی، ئازادی"، دەوڵەتیچ ماچۆ "تۆ تیرۆریستەنی، نمەتاوی داواو ئینیشا بکەری"، "تیرۆر بنەڕەتەنە دەسملەرەگێرتەی زوانی و شناسنامەی و مافە کەلتوورییەکاو کوردین. نکۆڵی  جە بییەی ئینسانەکا تاوانی هەرە گەورەن دژو ئینسانی".

"با ئەوەڵ وێما ئازاد بکەرمێ"

سەباحەت تونجەلە واتش: "پێسە ژەنە ڕێکوزیایا ، با ئەوەڵ وێما ئازاد بکەرمێ، ئا وەخت گلێرگە ئازاد مبۆ. چەنی بییەی تەرسێ و فشاری و گێرتەی، پەنەوازا سەردەمێوی تازە دەس پەنە بکەرمێ".

دمای پەرس و جوابەکا، بەرنامەکە بە درووشموو "ژەنی، ژیوای، ئازادی"ی دماییش ئاما.