شاروو سلێمانیینە لە هۊڵوو دێرینینە گەڕەکەو شەکرەکەینە سەعات 2:30 دمانیمەڕۊی، مەڕاسیموو چلۍ کۊچوو هونەرمەند و پێشمەرگەی دێرین تایەری خەلیلی، لاو ئەنجومەنوو باڵاو کۊمەڵەو پێشمەرگە دێرینەکاو کوردستانیوە لوا ڕاوە.
دماو ئانەیە هونەرمەند و پێشمەرگەی دێرین، تاهیری خەلیلی 26-11-2023 جە 67 ساڵیینە بە جەڵتەو مەژگی یانەکەشنە، گەڕەکەو ڕاپەڕینینە مەرد و قەبرسانوو بەکرەجۊینە نریا، دمانیمەڕۊو ئارۊی دماو 40 ڕوا جە مەردەیش لاو ئەنجومەنوو باڵاو کۊمەڵەی پێشمەرگە دێرینەکاو کوردستانیوە، بە بەشداریی بەشێوە جە هونەرمەندا و پێشمەرگە دێرینەکا و ڕۊنامەنویسا، هۊڵوو دێرینینە چلۍ ماتەمینیە پەی گیانی پاکوو ئی هونەرمەندەیە لوا ڕاوە.
ئەوەڵوو مەراسیمەکەی ئەنجومەنوو باڵاو کۊمەڵەو پێشمەرگە دێرینەکاو کوردستانی خێرامای ئامادەبییاشا کەرد و مۊمە پەی گیانی پاکوو پێشمەرگە دێرینەکاو کوردستانی گیسیانە، دمای چند ئایەتێوە قورعانی پیرۊزی لاو بەڕێز د.سامان شوانییوە ونیاوە. دمایی ئامادەبیۍ دەیەقێوە پەی گیانی پاکوو گەشمەرداو ڕاو ڕزگاریی کوردستانی مردێ.
ماتەر وتاروو ئەنجوومەنوو باڵاو کۊمەڵەو پێشمەرگە دێرینەکاو کوردستانی ڕەهبەر سەید برایمی واناوە بەشێوەو شیعرۍ باسش جە خەبات و کۊشیایەکاو ئی هونەرمەند و شۊڕشگێڵنەیە کەرد و واتش:"خەباتوو ئادی پەی گردوو کوردستانی بۍ، هەم بە هونەر و هەم بە خەباتوو کەشی، بۍ گۊشدای بە ئازارەکاش، بەردەوام بی سەروو ڕاو ڕزگارکەردەی کوردستانی."
دماتەر دیکیۊمێنتارییێوە ئامادەکریا سەروو قوناغ و هەرمانەکاو ژیوای ئی هونەرمەندەیە، لاو ڕادوێن و تەلەفزیۊنوو دێرینیوە ئامادە کریابۍ نیشانە دریا، دلێشنە باس جە چندین یادەوەرییە گرنگاو ئی هونەرمەندەیە لاو خێزانی و هامڕایاشۊ کریا.
دماتەر خەڵاتوو ڕێزوەنەنیای پێشمەرگە دێرینەکا لاو جەمیل هەورامییوە پێشکەش بە بنەیانەو هونەرمەند تایەری خەلیلی کریا.
دماتەر گرووپوو موزیکی و هونەرمەند سەید عومەر چند بابەتێشا جە سروود و گۊرانییەکاو هونەرمەند تایەری خەلیلی، پێشکەش کەردێ.
دماتەر پارچە هۊنیێوۍ نویسیۍ لاو عومەر کەسانیوە تایبەت بە مەرگوو هونەرمەندی ونیاوە.
ئاخروو مەراسیمەکەینە وتاروو بنەیانەی لاو پێشمەرگەی دێرین هەڤاڵ سالار ڕەواندزیوە پێشکەش کریا و مەراسیمەکە تەمامیا.
