وێرەگاو یەک شەممەی ٢٩/٠٦/٢٠٢٠ی، هەر یەرە چالاکوانێ و ژیوگەپارێز هەورامانی و ئەندامێ ئەنجومەنو ژیوگەپارێزی ژیواو پاوەی، موختار خەندانی خەڵکو شارچەو نوسوڎێ، یاسین کەریمی خەڵکو دەگاو شمشێری و بیلال ئەمینی ئێناخی ئەرەنیشتەو پاوەی جە ساتەوەختو ئەوەکوشنای ئێرو دارستانەکانو بوزینی و مەڕەخێڵ-ی گیانشان بەخشا، دماتەر ڕۆو دوەشەممەی تەرمەکێشان بریوە پاوە شار و بە مەراسیمی جەماوەری شکۆمەند پێشوازیشان ونە کریا و سەرهۆرداۍئاسای و بە واتەی دروشمێ چوون ”شەهید مەمرۆنە، تۆڵەتان بکەرمێوە“ تەرمەکێشان ڕەوانێ زادگایشان کریوە و شکۆمەدانە ئەسپەردێ کریێ.

یاگێ ویر وستەیەنە چەنڎین شەوانە ڕوێ بێ کە دارستانەکێ (بوزین و مەڕەخێڵ)ی سەر بە شارو پاوە-ی جە هەورامان کە ٢٣ هەزار هکتارێ ڕووبەرشانە ئێرشان گێرتەبێ و جە ئاکامشەنە سەدان هکتارێ جە دارستانەکان سۆتێ بێنێ.
پەی کۆنترۆڵکەردی و ئەوەکوشنای ئێرەکەی ئا ٣ چالاکوانە ژیوگەپارێزێ لوێ بێنێ ناوچەکە و سەروەختو سەرقاڵ بییەشانە بە ئەوەکوشنای ئێرەکەی گیانشان بەخشابێ و هامکات چەنڎینێ چالاکوانێ و هاموڵاتیێ تەرێ بە ئێرەکەی بریندارێ بیێ بێنێ.

 جە ئا بارەوە ئەنجومەنو ژیوای ئاشکراش کەردەبێ: سەروەختو ئەوەکوشنای ئێرو دارستانەکانو (بوزین و مەڕەخێڵ) یەنە ئەندامی ئەرەمەرزنەر و ئەندام جە ڕاوەبەری ڕێکوزیاکەیشان موختار خەندان خەڵکو شارچەو نوسوڎێ و دوێ ئەندامێ تەرێشان بە نامەکێ، یاسین کەریمی خەڵکو دەگاو شمشێری و بیلال ئەمین ئێناخی ئەرەنیشتەو پاوەی گیانشان بەخشان.

سەبارەت بە زیانە ژیوگەیەکێ ئێرەکەی، هەمان ئەنجومەن دەستنیشانش کەردەبێ: سەڎان هکتارێ جە دارستانەکێ ناوچەکەی دلێنەشیێنێ کە ناوچێوی پارێزنیای ژیوگەیەن و ڕووبەرەکەش ٢٣ هەزار هکتارێن.

جە ئوستانو کرماشانیەنە ٣ ناوچێ ژیوگە پارێزیێ هەنێ کە بە ئی جۆرەنێ: 
بێستون ٥٤ هەزار هکتارێ
بوزین و مەرخێڵە (هەورامان) ٢٣ هەزار هکتارێ
قەڵاجە ٤٣ هەزار هکتارێ

چەنڎین ڕوێ وەر جە یەکەمین ساڵیادو شەهیدبییەشان و تا بە ئارۆ، بەچالاکیێ جیێ جیێ یادو هەر یەرە شەهیدەکەی (موختار خەندانی، یاسین کەریمی و بیلال ئەمینی) جە چەنڎین شارێ و ناوچێ هەورامانی و کوردستانی کریانەوە و شکۆمەندانە ڕێزشان ونەگیریان.