مامۆسای ئاینی شێخ مورشید خەزنەوی ۋەرپرسیاری تاریخیش یاڎو گەلو کوردی وستۆ و واتش: "ئەر سەرنج بڎەیمۍ سەرو ئەزموونو تاریخیما بە ئاسانی چانەی مېیاومێنە ئانەی بیەن بە مەڵامەتوو شکسو شۆڕشیما ناکۆکی و نا تەباییەکۍ بیێنۍ."
دماو وڕای ڕژێمو بەعسی جە سووریانە، جە هەرێمەکاو سەرنیشتی و ۋەرکۊتوو سووریای کۊششەکۍ پەی دیالۆگی و نزیککەردەیۆ بەینو کوردا زیاڎۍ بیێنۍ. شێخ مورشید خەزنەوی کە مامۆسێوە ئاینییا و یۆن جە کەسایەتییەکا سازدای دیالۆگی و سەرو ئا مژاریە پەی ئاژانسیما قسێش کەردۍ.
شێخ مورشید خەزنەوی جە سەرەتاو قسەکاشەنە جەختش کەردۆ سەرو گرنگی یۆگێرتەو بەینو کوردا و ئاماژەش پانەی دا کە بەشێوە بنەڕەتی کۆو شکسو شۆڕشەکا کوردی بەمەڵامەتو ناکۆکی دلېینەیۆ بیەن، بە سەرنجدای جە ئەزموونو تاریخی. خەزنەوەیی نمونەو شۆڕشەکەو ماندێلایش ئاوردۆ پانەی چنی یۊگێرتەو گەلی شۆڕشەکەش سەرکۊتەیش بە دەسئاورد و ئینەش وات: "پۊکەی مشۊم گەلو کوردی دلۍ ۋێشەنە ناکۆکییەکا بنیا لاوە، خاوەنو هۆشمەندیێوە گۊرەو تاریخینمۍ. گرڎو شۆڕشە کوردییەکا بەمەڵامەتوو ناکۆکیی و پێکناوردەی هامپەیمانیۆ شکسشا ئارڎەن. مافو ئانەیما هەن جە ۋێما پەرسمۍ داخۆ چی شۆڕشەکۍ نەیاوێنۍ بە ئامانجو سەرکۊتەی.
کاتێ تەماشەو تاریخی مکەرمۍ موینمۍ شکسو شۆڕشە کوردییەکا بە مەڵامەتو بەهێزی دووژمنیوە نەبیەن، بەڵکم مەڵامەتی بنەڕەتی نەبیەی هامپەیمانی و یۊگێرتەیی بیەن جە ما بەینو کوردانە. جە ۋەرنیشتوو کوردەسانی و سووریاینە قۆناغێوە تازۍ ئینا ئارانە، گەلوو کوردی دەرفەتو پەشتیوانی دۆسەکاش هەنش. ئەر کوردەکۍ چی قۆناغێنە ناکۆکۍ با ئانە دۆسەکێشا چنی هامکاریشا مکەرا؟ پۊکەی جە ئیساتێنە یۆبیەی کوردا، ڕێککەوتەی سیاسی و ڕێکوزیایی جە گرڎ کاتێ گرنگتەر و کاریگەرتەرا."
مشۊم بە بنیاڎنیای یۆبیەی، کۊسپەکا دژمنی وېیەرنا
جە بەشێوەتەرو قسەکاشەنە خەزنەوی جەختش چانەی کەرڎۆ جە ئیساتێنە گەلو کوردی بە گرڎ جۊرۍ ئینۍ یۆگێرتەیی و هامپەشتی یۊترینینە، بەڵام ئانەی بیەن بە گرفت و ناکۆکی و ڕێکنەکەوتەی پارت و لایەنە کوردییەکۍ، کە بەشێوەشا مەرامەکا گەلی مکەرا بە بەرژەوەندی شەخسی و حزبیی ۋێشا. خەزنەوی سەرنجش وست سەرو گلێرۆبیەکەو بەینو مەزڵوم عەبدی فەرماندەو گرڎی قەسەدەی و پارتو ئەنەکەسەی و ئینەش وات: "دماو ئا گلێرۆبیەیە ئاماڎەکارییەکۍ پەی پێکئاوردەو شاندێوە هامبەشی پەی لوای پەی دیمەشق ئینا ئارانە. چی قۆناغە کاریگەرێنە گرڎ هەوڵێوە دژمنی پەی قوڵکەردەیۆ ناکۆکییەکان، پۊکەی مشۆم گەل پارتە سیاسییەکۍ و گەلەکەما بە یۊبیەی ۋێشا ئاستەنگییەکا دژمنی ۋېیەرنا و گرنگی ئی قۆناغۍ عال هۊرسەنگنا."
جە بەردەوامی قسەکاشەنە خەزنەوەی جەختش چانەی کەردۆ نمەبۆ هیچ بەهانێوە بۆنە پەی وەشنەبیەی ڕێککەتەی بەینو پارتە کوردییەکا، ئاماژەش پانەی کەرد گەل چەمەڕاو ئانەینە کە پارتە کوردییەکۍ بە شاندێوە یۆگێرتەو هامپەیمانییوە بلا دیمەشق.
'مشۆم پارتە سیاسییەکۍ گرنگی قۆناغەکۍ ۋەرو چەما بگێر'
جە دما دماینە خەزنەوی جارێوەتەر جەختش چانەی کەردۆ مشۆم پارتە سیاسییەکۍ بە پاو ژیۋگەی گرنگو قۆناغەکۍ جماوە و جیاوازییەکاشا بنیا لاوە، ئەرنا نمەتاوا ڕێککەوتەی سازبکەرا و ئینەش وات: "ئارۆ ۋەرنیشتوو کوردەسانی ئینا ڕۆژەڤەنە. ئی ناوچە کە سەردەمانێوە بەشێوە گولانەو جەهانی بیەن، ئارۆ بیەن بە دەنگێوە جە جەهانەنە. سەرەڕاو قەبارە گولانەکەیش، بەڵام شۊنێوە بۍ کە هەڵوێسێوە گۊرە نیشانە دۍ. پۊکەی ۋەرنیشتوو کوردەسانی پەنەوازیش بە پەشتیوانی جمېیەرە کوردییەکا پارچەکا تەری هەن. کوردستان هەیە. ئەمڕۆ ئەو ڕۆژەیە کە لەگەڵ گەلدا بین و دەستی درێژکراوە نەگەڕێنینەوە. ڕۆژئاوای کوردەسان جە ڕوانی سەختەنە چنی کوردا بیەن و قوربانی گۊرەش دان. ئارۆ ڕۆو یەکلاکەردەیۆ چارەنوویسیا، ڕۆو شەرەف و نامووسیا. هەر پۊکەی چەمەڕاو پاڵپەشتی گرڎو هێزەکا کوردەسانینمۍ پەی پێکئاردەی یەکڕیزی کوردی."
