ڕۆشنویراو پانیشتو کوردستانی دژوو ئەرەگیرکەری تورکی و سەردایەکەو ئەردۆغانی مرداوە
بڕێو جە ڕۆشنویرا، ڕۆنامەنویسا، هونەرمەندا و کەسایەتییەکاو پانیشتو کوردستانی دژوو سەردایەکەو تەیب ئەردۆغانی پەی عێراقی و هجوومە ئەرەگیرکارییەکاو دەوڵەتو تورکی مرداوە.
پەیامێوی ڤیدیۆیینە ژمارێو جە کەسایەتیێ ڕۆشنویرێ و ئشناسیێ پانیشتو کوردستانی بە دروشمو "نا پەی لەشکرکێشی و ئەرەگیرکاری، نا پەی ئامای ئەردۆغانی" دژایەتیی وێشا پەی سەردایەکەو ڕەجەب تەیب ئەردۆغانی سەرۆککۆمارو تورکی پەی بۆ بەغدای و هەولێری بەرموزانێ.
هاموەخت دژوو لەشکرکێشی و هەوڵە ئەرەگیرکەرییەکاو دەوڵەتو تورکی پەی سەرو خاکو عێراقی و پانیشتو کوردستانیچ مردانێوە.
داوایچ وەنەو هێزە سیاسییەکا مکەرا، حیچ سازش و هامکاریێوی پەی دەوڵەتو تورکی نەکەرانێ جە بەیاگەیاونای پلانە ئەرەگیرکەرییەکاشنە و نەلانێ چێرو بارو بەیاگەیاونای داوایەکاو ئا دەوڵەتە ئەرەگیرکەرەیوە.
باس چانەیچە مکریۆ، کە داواو دەوڵەتو تورکی پەی کەردەی هجوومێوی تازەی ئەرەگیرکەری هەوڵێوەن پەی کەردەی ئەنفالێوی تازەی و چا ڕوەیچۆ ە داوامکریۆ وەڵێ پا جینۆسایدەیە بگێریۆ.
ڤیدیۆگرافیکێوەیچنە، کە لاو کەمپینو دەسەو سەروەریی نیشتمانیوە دژوو سەردایەکەو ئەردۆغانی پەی عێراقی ئامادە کریان، کەردەی ئامانجو سەیرانگاکا لاو ئەردۆغانی و سوپاو تورکی و فاڕیای شادی پەی شیوەنی وێنا کریان، ئانە وزیان ڕووە، کە "ئەردۆغان کاولکاری مارۆ نەک ئاوەدانی".
