ئەنڎاموو کۆمیتەو ناوەندی پەکەکەی جەمال شەریک ئانەش وست ڕووە، ئا هەژمونگەراییەی سەروو چەوەسنایۆ مەرزیانەرە، سەرچەمەی سەرەکی جەنگی ئینا کوردسانەنە و ئانەش وست ڕووە کە کرێکار و رەنجدەرا مشۊم دژوو جەنگی کۊشیانە.
ئەنڎاموو کۆمیتەو ناوەندی پەکەکەی جەمال شەریک جە بارەو ١و ئایاریوە قسێش پەی ئاژانسوو هەواڵوو فوراتی (ANF)ی کەردۍ.
جەمال شەریک ئانەش وست ڕووە، کە کرێکار و رەنجدەراو تورکیای و کوردسانی فرەو وەختی نیشانەشا دان کە ١و ئایاری جەژنێوە ئاساییە نییەنە، ۋێناو کۊشیای سەرکەوتەین و واتش، "سەرەڕاو هجوومەکا سەردەسا، هێزە دەسەڵاڎدارەکا، هێزە میلیشیاییەکاشا و هێزە فاشیستیە ڕسمییەکا، کرێکارا و رەنجدەرا ئانەشا یاۋنا بە سەرکەوتەی. جە ئاکاموو ئا هەڵوێستە بە بڕیاری و رێکوستەینە پاگیریشا جە کۊشیاینە کەرد و هێزە کۆلۆنیالیست و باڵادەسەکێشا ناچار بە پاشەکشەی کەردۍ".
جەمال شەریک ئانەش وست ڕووە، کە چی سەردەمەیچەنە پەی پارێزناو رۆح و جەوهەری شۆڕشگێڵنیی ١و ئایاری مشۆم ئانە بە بنەما بگیریۆ و واتش، "مشۊم بانۍ بە ۋەرگریکار و ڕاوەبەرا چالاکی کۊشیای ئازاڎیی رەنجی. بێگومان مەبەس جە ئازاڎ کەردەی رەنجی مشۊم بە دروسی درکش پنە بکریۆ. مەبەس چانەی ئانەنە کە دمایی بە هەژموونگەرایی و کۆلۆنیالیزمی سەروو رەنجی بڎریۆ. مشۊم راس دەسنیشان بکریۆ کە کۊشیای رەنجی مشۊم بنەڕەتی و بنچینەیی بۆ. چی چوارچێوەنە تا ئا وەختەی کە ئەرەگیری سەروو رەنجی و ئا یەکدەسی وهەژمونەی سەروو ئەرەگیرکەردەی رەنجی بنیاڎ نریان ۋەروو یۊی هۊرنەشێویۆوە، حەجگیز رەنج ئازاڎ مەبۆ. مامەڵە و نزیکایەتی مشۊم سەروو ئا بنەمایۍ بۆ. مشۊم بزانیۆ تەنیا داوا و نزیکایەتی پېسە زیاڎ کەردەو مەعاشی و ۋەرفراوانکەردەی مافەکا، نزیکایەتیەکە ئینا چوارچێوەو سنورەکا سیستموو تاڵانی و ئەرەگیرینە، رەوایەتیداین بە تاڵانی و ئەرەگیری".
جەمال شەریک ئەرەیاۋناش، کە سیاسەت، مەیل و مامەڵێوەکە ئارۆ ۋەروودەم و رەنجدەرا و کرێکارانە گەورەتەرین ئاستەنگا، ئانەی کۊشیای و رەنج و کرێکارا دەسنیشان مکەرۆ و ۋەرتەسکش مکەرۆوە سەروو ئا بنەمایێنە و واتش، "بە گرڎ جۊرە ڕێوە، بە پەردەپۆشکردنی لایەنی سیاسی و ئایدۆلۆژیک، بە سوککەردەی کۊشیای کرێکارا و رەنجدەرا و نیشاندای ئا کۊشیایە تەنیا پەی تێرکەردەو لەمەو ۋێشا، وازیۆ کە کرێکارا، رەنجدەرا پېسە پارچێوە جە سیستموو کۆلۆنیالیزمی نیشانە بڎریا. پەی ئانەی ئینە بکریۆ گرڎ جۆرە دەرفەتەکۍ دەوڵەتی بەکار مەیا. حەرپاسە متاویۆ وچیۆ ئارۆ تورکیانە ئانەی گەرەکشا باڵادەس و کاریگەر بکریۆ ئا مامەڵە و ویرکەردەیۆین. سەندیکا زەردەکۍ ئارۆی ئانەشا پەی ۋێشا کەردەن بە بەهانۍ مەنەیۆ، ڕائاوردەی گەلی هەژاریشا چنی ئاورای پەی ۋێشا بە بنەما گرتەن و فاڕیێنۍ پەی ۋەردەسی و بەڵێندەری لاوەکی سیستمی، بیۍ پا رێکوزیایا کە هێز دەسوو ۋێشانە مازاوە. ۋەروو ئانەی کۊشیای ئازاڎکەردەی رەنجی جە هەمان وەختەنە مشۆم دژوو سەندیکاکاری زەردیچ ئەنجام بڎریۆ، کە گەمە بە وشیاری کرێکاری و رەنجدەرا مکەرۆ و حۊڵ مڎۆ ئاڎیشا بکەرۆ بە پارچێوە جە سیستموو کۆلۆنیالیزمی و تاڵانکاری".
جەمال شەریک ئانەیچش دەسنیشان کەرد کە کۊشیای ئازاڎکەردەو رەنجی بێگومان تەنیا پی جۆرە نییا و واتش، "یەکدەسیێوە کە تورکیا و کوردسانەنە سەروو مافواردەی و سیستمی کۆلۆنیالیستی و تاڵانی بنیاڎنریان، سەرچەمەو بنچینەیی جەنگی چەپەڵی و تایبەتی و قڕکەرین جە کوردسانەنە. ئا هەژمون و یەکدەسییە جە هەمان وەختەنە پېسە زنجیرێوە دەس و ملوو کرێکارا و رەنجدەراش بەستەنۆ. پەی رزگارکەردەی چا زنجیرۍ مشۊم ئا یەکدەسی و هەژموونە بە دڵنیاییوە مەڕیۆنە. ئاڎیچ بە بەشداربیەی دلۍ کۊشیاینە دژوو جەنگی چەپەڵ- تایبەتی فاشیستی، کۆلۆنیالیستی، قڕکەری جە کوردسانەنە بۆ. ئەگەر ئا سەرچەمە وشک بکریۆ ئانە ئاستەنگی هەرە گەورە ۋەروو دەموو ئازاڎکەردەی رەنجینە هۊرگیریۆ.
حەرپۊکەی مجیایرە جاڎە و مېڎانەکا جە ١و ئایارینە و ئا هەرمانۍ مشۆم بکریا پێویسا بە پاو ئانەی بکریۆ. کۊسیای ئازاڎکەردەو رەنجی مشۊم جە کۊشیای دژوو جەنگی چەپەڵی کۆلۆنیالیستی تاڵانکاری و قڕکەری جە کوردسانەنە نە بڕیۆرە، نەریتوو ١و ئایاری پارێزگاریش ۋنە بکریۆ و نەریتوو کۊشیای ۋێنا بکریۆ. مېڎانەکۍ ١و ئایاریچ بە دروشمەکا سەروو ئا بنەمایۍ مشۆم ژەنیا.
جەمیل شەریک ئانەش وست ڕووە کە ئاخێزوو کوردسانی ئاخێزێوە ئینتەرناسیۆناڵا و دەسنیشانش کەرد کە کۆلۆنیالیزم جە کوردسانەنە هەم جە ئاستی میان نەتەوەیی و هەمیچ دلۍ دەوڵەتانە ئاماژێوەن پەی ئا حەقەتینەیە.
جەمال شەریک ئانەش وست ڕووە کە ئاڎۍ بە قۆناغێوە یەکجار هەستیار و تاریخیرە ۋییەرانە و واتش، "جەنگی جەهانی یەرەم بڕێوەش مەنەن کە ٣٤ەمین ساڵەیش پەڕ بکەرۆوە. دلۍ ئا جەنگەینە سەروو ئەنجاموو ئی قۆناغە هەستیارۍ ژمارەو پرسیارەکا زیاتەرۍ با. بێگومان دلۍ ئا پرسیارانە گرنگتەرینشا پەیوەسا بە کرێکارا، رەنجدەرا، گەلا، ژەنا و گەنجاوە. ۋەروو ئانەی جە بەروو لایەنەکاو جەنگی جەهانی یەرەمی نوێنەرایەتی ئاڎیشا مکەرۆ. نەک هەر ئانەی مکەرا، حەرپاسە جە ۋەرا ۋەروو لایەنەکا جەنگی جەهانی یەرەمینە ئاڎۍ یاگەگیروو ۋێشا خوڵقنا و ئەرکەکاو ۋێشا دەسنیشان مکەرا. ئانەیچ ئەرک و ۋەرپرسیارین جە ئاستی تاریخینە. فرە گرنگا کە جە ١و ئایارینە ئا ئەرکە دیاریبکریۆ و جابەجێ بکریۆ. رابەر ئاپۆ کە رابەری میان نەتەوەین بە پاڕادایموو ۋێش ڕاکۍ نیشانە مڎۆ. ئا هەڵمەتۍ بە دروشمەو 'ئازاڎیی پەی رابەر ئاپۆی، چارەسەری پەی پرسوو کوردی' جە ١٠و تشرینوو یووەم و ٢٠٢٣ دەسشپنەکەردەن، هێز پانەی بەخشۆ.
جە پرۆسێوە پا جۆرەنە پێشوازیکەردەی جە ١ و ئایاری فرە ماناڎار و جیاوازا. رەنجدەرا، کرێکارا، ژەنا، گەنجا، گەلاو کوردسانی و تورکیای جە ١٥و شوباتی، ٨و ئاداری، ٢١و ئاداری، هۊرچنیەو دلېینەو ٣١و ئاداری و ٤و نیسانینە بە هەڵوێس و پاگیری شۆڕشگێڵنانەو ۋێشا بەرشا وست کە ١و ئایاری جە گرڎ وەختۍ زیاتەر بە شێوۍ شکۆمەندانە پێشوازی بکەرا و مېڎانەکا پەڕۍ بکەراوە.
پا قەناعەتەی کە ١و ئایاری بە جۆش و خرۆشۍ پی جۆرۆ پێشوازیش ۋنە بکریۆ، ١و ئایاری سەرەتا جە رابەر ئاپۆی، جە کرێکارا و رەنجدەرا، جە گەلاما و گرڎوو گەلاو چێر دەسی، جە کرێکارا و رەنجدەرا ستەم ۋنەکریای پیرۆز مکەروو".
جەمال شەریک جە دما دمایی قسەکاشەنە گەشمەرڎۍ مانگەو ئایاریش بە رێز و پنەزانایۆ ۋیر ئاردێوە.
