سەلچوک: مشۆم ئامانجی سەرەکیی گەلی ماڕای گۆشەگیری بۆ
باقی سەلچوک ئەندامو پلاتفۆرمو دەنگو زیندانییا TSP ئەرەمیاونۆش، ئامانجو دەوڵەتو تورکی گۆشەگیرکەردەی تەمامو گلێرگەین و واتش: "مشۆم ئامانجی سەرەکیی گەلی ماڕای گۆشەگیری بۆ".
باقی سەلچوک ئەندامی پلاتفۆرمو دەنگو زیندانییا، سەبارەت بە گۆشەگیریی ڕەهاو سەرو ڕابەرو گەلو کوردی، عەبدوڵا ئۆجالانی پەی بۆ ئاژانسو هەواڵو فوراتی قسێش کەردێ. سەلچوک ڕۆشنکەردۆ کە ئا گۆشەگیرییە ڕەها، کە ماوەو ٣ ساڵان بەردەواما بە هیچ یاسا و ئەخلاقێوە نمەگونجیۆ و واتش، کە چالاکییەکاو دژو گۆشەگیریی بەلاوازی مەنێنیوە.
٢٥و ئادارو ٢٠٢١ــیوە تا ئیساتێ هیچ زانیاریێوی سەرو ژیوای ڕابەرو گەلو کوردی عەبدوڵا ئۆجالانی و حامیلی یڵدرم، عومەر خەیری کۆنار و وەیسی ئاکتاشی، کە ئیمرالیینە گۆشەگیرێنێ نییا. بە نموونەو ئیمرالی سیاسەتو دەوڵەتو تورکی وەراوەرو زیندانییە سیاسییا چەنی ڕۆشن بکریۆوە؟
ئێمە ئا گۆشەگیرییە ڕەهایەو کە دەوڵەتو تورکی سەرو ڕابەرو گەلو کوردی بەڕێز ئۆجالانی و زیندانییای تەری حامیلی یڵدرم و عومەر خەیری کۆنار و وەیسی ئەکتاشی ئیمرالیینە سەپن پەی ماوەو ٣ ساڵا پێسەو نموونێوە فاشیستی بێئەخلاقی مزانمێ، کە چەنی حیچ ڕێسا و پیمەرێوی یاسایی نمەگونجییۆ. ساڵەو ١٩٩٩ــیوە بەڕێز ئۆجالان ئینا ژووری تاکەکەسیینە و ماوەی ویەردەنە پەیوەندییەکێش چەنی بەری پڕچنیێنێ. بەڵام دمایینشا گۆشەگیریێوی درێژخواینا کە تا ئیساتێ بەردەواما.
ئێمە پێسەو پلاتفۆرمو دەنگو زیندانییا واتەنما. کە ئی گۆشەگیرییە ناڕەوان و نایاسایین قبووڵکریا نییا و زیندانییە سیاسییەکێ و گردو گلێرگەی بەئامانج مگێرا، ئێمە بەشێوەنمێ جە کۆشیای دژو گۆشەگیری. ڕاسییەن دەوڵەت ساڵاو وەڵێنە گۆشەگیرییش سەرو گردو زیندانییە سیاسییارە سەپنان. ئامانجو دەوڵەتی گۆشەگیرکەردەی تەمامو گلێرگەین. جەخەباتی دژ بە گۆشەگیریی گلێرگەی و زیندانییە سیاسییانە ئاستێوی گرنگ ئامان دی. بەڵام پەی شکسپەنەئاردەی گۆشەگیری، پێویسا ئامانجی سەرەکیی گەل بۆ بە ماڕای گۆشەگیری.
ئایا ناڕەزایەتییەکێ دژو سیاسەتو گۆشەگیریی دەوڵەتو تورکی وەسێنێ؟
بێگومان ناڕەزایەتی وەراوەرو سیاسەتو گۆشەگیریی دەوڵەتو تورکی تورکیانە، کوردستاننە، ئەوروپانە و وەڵاتە جیاجیایاو جیهانینە کریا. کۆبییەیۆکێ مکریانێ، ئیشکگێریی دادپەروەری هەن، جار جارە مانگێرتەی جە واردەیچ، چەنەدوایێ ڕۆنامەوانیێ مدریا و هتد. بەڵام هەڵای ناڕەزایەتییەکێ تێرکەرێ نییەنێ، هەڵای دۆخێوەنە نییەنێ کە بتاومێ گۆشەگیری ماڕمێ و دەوڵەتو تورکی درێژە بە گۆشەگیری مدۆ. پێویسا ناڕەزایەتیی وەرفراوان ڕێک بوزیۆ. ئەگەر ئینە نەکریۆ، بارگرانییەکە مگنۆ سەرو شانەو زیندانییا و مبۆنە بایسو تەرسەو سەرو زیندانییا، پەنەوازەن خاوەندارێتیەکاو بەری پەرەشا پەنە بدریۆن.
