کۆنگرێوی ڕۆنامەوانیینە؛ ڕەحمان غەریب ڕێکوزوو سەنتەروو میترۆی پەی داکۆکی جە مافوو ڕۆنامەنویسا ئەرەیاوناش، بێدەنگیی حکوومەتو عێراقی و هەرێمی سەبەبوو بەردەوامیی ئەرەگیرکارییەکاو دەوڵەتوو تورکینێ.
ئارۆ دەوڵەتی ئەرەگیروو تورکی سەیارێوە ڕۆنامەنویساو کۆمپانیاو چەتریش کەرد ئامانج، دەربارەو ئا هجوومەیە کۆمپانیاو چەتری کۆنگرێوە ڕۆنامە نویسیش گێرت و دلێشنە ڕەحمان غەریب ڕێکوزوو سەنتەروو میترۆی پەی داکۆکیی جە مافوو ڕۆنامەنویسا ئامادە بێ و واتش:" ئانە کە دەسکریایوەییشدان دەولەتی ئەرەگیروو تورکی و بەردەوامیی بۆردومانەکاش، بێدەنگیی حکومەتوو عێراقین بە پلێ ئەوەڵی و حکومەتوو هەرێموو کوردسانی، کە ڕۆانمەنویسا و هاموەڵاتە مەدەنیا گەشمەردێ مکەرۆ>"
ڕێکوزوو سەنتەروو میترۆی ئاماژەش بە ئەرەگیرییەکاو دەوڵەتیوو تورکی کەرد و واتش:" پێسە مزانیۆ دەوڵەتو تورکیای ٥٠ کیلۆمەترێ جە سنوورەکاوە ئامان دلێوە و ڕوانە هاموەلاتێ مەدەنیێ مکەرۆنە ئامانج، سەبەبوو بەردەوامیی ئەرەگیری و بۆردومانەکایچ کە هاموەڵاتێ مەدەنیێ و ڕۆنامەنویسێ مکەرۆ ئامانج بێدەنگی و بێهەڵوێستیی حکومەتوو عێراقی و هەرێمین."
'کەیسوو گەشمەردەکەردەی ڕۆنامەوانا میاونمێ بە گلێرگەی میاننەتەوەیی'
دلێ کۆنگرە ڕۆنامەوانییەکەینە کاروان ئەنوەر سەرۆكوو لەقوو سلێمانیى سەندیكاو ڕۆنامەنویساو هەرێموو کوردسانی ئەرەیاوناش، ئیدانەو گەشمەردەکەردەی دووە ڕۆنامەنویسەکاو کۆمپانیاو چەتری مکەرمێ و قبووڵش نمەکەرمێ و واتش:" دۆسییەکێشا میاونمێ گلێرگەی میاننەتەوەیی، بەداۆ ئارۆ دوێ ڕۆنامەنویسێ کۆمپانیاو چەتری گەشمەردێ بیێ، بەتندی ئیدانەو هەر هجوومێوە پەی سەروو ڕۆنامەنویسا مکەرمێ، بە پاو یاسا میاندەوڵەتییەکا، ڕۆنامەنویس بەدەرا جە گردوو قەیرانەکا و تەنانەت جەنگیچەنە ڕۆنامەنویس مافش پارێزنیان."
