سنوورەکۍ ئێرانی تەلبەنڎ و دیوار مکریا
سەرۆکوو ئێرانی، ئیبراهیم ڕەئیسی پەی کەمکەردەیۆ قاچاخچیەتی و قۊرتە ئەمنییەکا، قەرارش دان سنووروو وڵاتەکەیش چنی وڵاتا هامسایش تەلبەنڎ و دیوار بکریا.
جە کۆنگرێوە ڕۆنامەوانینە، یاگەگیروو وەزیروو دلېینەو ئێرانی مەجید میر ئەحمەڎ ئەرەیاۋناش بە قەراروو سەرۆکوو ئێرانی ئیبراهیم ڕەئیسی سنوورەکاو وڵاتەکەیش چنی وڵاتا هامسای تەلبەنڎ و دیوار کریا.
میر ئەحمەڎ ئەرەیاۋنانش، ساڵانە قیمەتوو دەیان ملیار دۆلارا قاچاخچیەتی جە سنوورەکاو ئێرانینە مکریۆ ئینەیچ زەرەرێوە گۊرەش بە ئابووری وڵاتەکەیش یاۋنان، هاموەخت قاچاخچیەتی چەکی و مادە هۆشبەرەکا مەتەرسی ئەمنیۍ پەی وڵاتەکەی وەش مکەرۆ، پۊکاتی سەرۆکوو وڵاتەکەی قەرارش دان یەرۍ ملیار دۆلارۍ پەی فەرماندەیی گرڎیی هێزە چەکڎارەکا تەرخان بکریۆ پەی تەلبەنڎکەردەی و دیوارکەردەی سنوورەکا جە ماوەو پەنج ساڵانە.
حەرپاسە ئەرەیاۋناش سەرپەرشتیکەردەو ئی کاریە ئەسپاریان بە سەرۆکوو گرڎیی هێزە چەکڎارەکا محەمەڎ باقری، ئامانج جە قەرارەکەیچ کەمکەردەیۆ زەرەرە ئابوورییەکۍ و مەترسییە ئەمنییەکێنۍ.
