سەردارەکۍ فەرەنسای و بەریتانیای و ئەڵمانیا و پۆڵەندای پېسە پاڵپەشتیێوە سەرشا ۋنەو کێیڤی دا و داواشا ۋنەو ڕوسیای کەرد پەی ماوەو ٣٠ ڕووا ئایېربەس ئەرەبیاونۆ تا دەرفەت پەی گفتوگۊو ئاشتی بڕەخسنۆ.
ئاژانسوو فرانس پرێسی ئەرەیاۋناش کە سەردارو فەرەنسای ئیمانوێل ماکرۆن، ڕاوێژکارو ئەڵمانیای فرێدریش مێتس، سەرۆک وەزیرانو بەریتانیای کیەر ستارمەر، سەرۆکوەزیرانو پۆڵەندای دۆناڵد توسک، ڕۆو شەممەی پېسە پاڵپەشتیێوە پەی ئۆکرانیای یاوۍ کیێڤ.
ئینە یووەم سەردای هامبەشو سەرداراو چوار وڵاتەکەین پەی ئۆکرانیای.
وەڵۍ سەرۋنەداکەیەنە هەر چوار سەردارەکە جە ئەرەیاۋنێوە هامبەشەنە داواشا جە ڕوسیای کەرد "پەی ماوەو ٣٠ ڕووا ئایېربەسێوە بێ‌مەرج" ئەرەبیاونۆ و دەرفەت پەی گفتوگۊو ئاشتی بڕەخسنۆ.
ئی سەردایە دماو ئانەی مۍ کە سەردارو ڕوسیای ڤیلادیمێر پوتن جە مەراسیمێوە سەروازینە جە مۆسکۆ هەڕەشێش ۋنەو ئۆکرانیای کەردەبۍ.
سەردارۍ وڵاتە ئۊروپییەکا جە ئەرەیاۋناکەینە واتشا: "ئێمە ئاماڎێنمۍ جە نزیکتەرین کاتەنە پاڵپەشتی جە گفتوگۊو ئاشتی بکەرمۍ، گفتوگۆ سەرو پێکئاوردەی میکانیزمو ئاشتی بکەرمۍ و ڕێککۊتەیۍ ئاشتی ۋەرفراوان ئاماڎە بکەرمۍ".
