شارەوانی تەتوانی بەدلیسی جە هۊرچنیە دلېینەییەکاو ساڵەو ٢٠١٩ ینە بە ساختەکاریێوە فرۆ و جیاوازیێوە کەموو دەنگەکاوە ئەکەپە دەسش سەرەرە گېرت، جە هۊرچنیە هەرێمیەکاو ٣١و ئادارینە بە جیاوازیێوە فرۆ کەوتۆ دەسۇ کوردا و دەم پارتی. هامسەرۆکاو شارەوانی کە قەرارەکەشا هۊرگېرتەن، جە یووەم ئەوەکۊڵیای شارەوانینە درکشا پانەی کەردەن کە شارەوانی قەرزێوە فرەش ئینا سەر.

جە ئەوەکۊڵیا سەرەتاییەکانە بەرکۊت کە فرەو موڵکەکا شارەوانی ورەشیېنۍ، شارەوانیچ نزیکەو یەک ملیاری و ٥٠٠ هەزار لیرا قەرزش ئینا سەرۆ.

مۆمین ئەرۆل، هامسەرۆکوو شارەوانی تەتوانی، سەبارەڎ بە ئەنجاموو ئەوەکۊڵیای و تێبینیەکا چنی ئاژانسوو هەواڵوو فوراتی قسېش کەردۍ.

ئاکەپە، بە قەرزێوە فرۆ تەتوانش ڕادەس کەردەن

ئەرۆل بە ئاماژەدای پانەی کە شارەوانی نزیکەو یەک ملیاری و ٥٠٠ هەزار لیرا قەرزارا و گرڎ مۆڵکێوە شارەوانیش ورەتەن، واتش: ئێمە شارەوانیېوە قەرزارما جە قەیومەکا هۊرگېرتەن، شارەوانی ئینا دلۍ قەرزی و گەندەڵینە، و یاوان بە ئاستێوە کە حاسڵکەردەی خزمەتگوزارییەکاش قورستەر کەردەن. ئێرۆل ئاماژەش پانەیچ کەرد، ئێمە لووایۆ پۆرە بە گرڎوو مامەڵە و دۆسیەکارە مکەرمۍ گەندەڵییەکا مېزمېوە و ئاشکراشا مکەرمۍ. جە هەمان وەختەنە بەردەوامۍ بیمۍ جە خزمەتگوزارییە سەرەتاییەکاو شارەوانی پەی حاسڵکەردەی گرڎوو پێداویسیەکا گەلی. بێگومان بەمەڵامەتوو نەبیەی دەرفەتیۆ کێشەما پەی وەش بۆ، بەڵام بە ئیراڎېوە فرە هېقمۆ سەرۍ گنمۍ. ئێمە بە هامکاری گەلی شارەوانیېوە ڕۊشن سەر جە نۆ ئاوەڎان مکەرمېوە و ڕا مەڎەیمۍ گەندەڵی ڕووەبڎۆ."