سەرۆک و پیاماقووڵاو عەشرەتەکاو هەرێموو جەزیرەی واتشا، دەوڵەتی ئەرەگیرکەروو تورکی هەوڵێ مدۆ جەنگ بوزۆنە دلێ کوردەکاوە و واتشا: "بەداخۆ پەدەکە خزمەتوو ئی هجوومە ئەرەگیرکارییا مکەرۆ و مبۆ هامبەشوو گەمەو قڕکەردەی کوردی بە دەسوو کوردی".
سەرۆک و پیاماقووڵاو عەشیرەتە کوردەکاو هەرێموو جەزیرەو وەرنیشتوو کوردستانینە پێوەس بە هجوومەکاو دەوڵەتی ئەرەگیرکەروو تورکی پەی سەروو پانیشتوو کوردستانی و خیانەتوو پەدەکەی و پێشمەرگەو ڕۆژ، هۆڵوو سەردەمینە حەسەکەنە کۆنگرەی ڕۆنامەوانییشا بەست.
ئەوەخوایش مکەراوە بە خەمێوی قووڵۆ چەمداریی هجوومە ئەرەگیرکارییەکاو دەوڵەتوو تورکی مکەرا پەی سەروو پانیشتوو کوردستانی، ماچا: "دەوڵەتوو تورکی هەوڵێ مدۆ بەینوو کوردەکانە جەنگ بخوڵقنۆ. بەداخۆ پەدەکە خزمەت پا هجوومە ئەرەگیرکارییا مکەرۆ و مبۆنە هامبەشوو گەمەو قڕکەردەی کوردی بە دەسوو کوردی. هەر جەنگێوی بەینوو کوردانە، تەنیا خزمەت بە دوژمنی مکەرۆ. مبۆنە بایسوو پارچەبییەی یەکڕیزیما و لاوازکەردەی وەرگێرییما وەراوەروو قۆرتە گەورەکاو وەردەمیما".
پێشمەرگەکاو ڕۆژی خزمەت بە دوژمنی مکەرا
سەرۆک و پیاماقووڵاو عەشیرەتەکان ئاماژە پانەیە مکەرا لاو پەدەکەیوە بڕێو گەنجێ وەرنیشتی بە نامێ پێشمەرگەوە ڕۆژیوە جەمێ کریێنێوە، هەرپاسە ئەنەکەسە دەورش بییەن جە خەڵەتنای ئی گەنجانە و ڕوانەکەردەییشا پەی دلێ ئی هێزەیە، ماچانە: "یاگێ دڵگرانیینە ڕۆو ئەوەڵیوە پێشمەرگەکاو ڕۆژی جیای خزمەتوو گەلەکەیما، خزمەتوو دوژمناو گەلەکەیما مکەرا، بەداخۆ ئی دۆخە هەڵای بەردەواما.
جەنگکەردەی دژوو گەریلای گەورەتەرین خیانەتا
بەپاو زانیارییەکا، پەدەکە گەنجە کورداو وەرنیشتی گرووپوو پێشمەرگەو ڕۆژینە مبەرۆ هەرێمەکاو زاپی، مەتینا و ئاڤاشین تا جەنگوو گەریلای بکەرا. ئینە پەی ئێمە بابەتێوی جیدییا و مایێ شەرمەزاریین. گەریلا شەرەف و شکۆمەندیی ئێمەن. خاوەنداریی وەنەو گەریلای گرنگتەرین هەرمانەو گرد کوردێوەنە. جەنگکەردەی چەنی گەریلای گەورەتەرین خیانەتا وەراوەروو گەلی".
داوا جە گەنجە کورداو دلێ پێشمەرگەو ڕۆژی مکەرمێ، تێکەڵێ گەمەکاو دوژمنی نەبانە پەی براکوشی و کوشتەی کوردی بە دەسوو کوردی، ماچا: "هەرکەس خزمەت پی پلانێ بکەرۆ، خیانەتێوی تارێخیی مکەرۆ. پێویسا کەس نەبۆ بە بەشێو چی گەمەیە. ئێمە ڕۆڵێ گەلێوی شکۆمەندینمێ. حەر لاێوەنە بیمێ، پێویسا داراو شکۆی بیمێ و بەرژەوەندیی گەلەکەیما بپارێزنمێ".
پێویسا گەنجێ بگێڵانێوە سەروو خاکەکەیشا
هەرپاسە بانگەواز وەنەو گەنجا مکەرۆ بگێڵانیوە سەروو خاکەکەیشا و پارێزگاری وەنەو خاکوو وەرنیشتی بکەرا، بانگەوازیچ وەنەو سەرۆکوو پارتە سیاسییەکا و هێزە کوردییەکا مکەرۆ هەرمانەی تارێخییە و نەتەوەییەو وێشا بیاونا یاگێ و دوورێ بگناوە جە جەنگی و ناکۆکی، ماچا: "یۆبییەی و یەکسانی، قەوەتتەرین چەکەنێ پەی پارێزنای گەلوو کوردی جە تەرسێ و هجووموو دوژمنی".
