سەرۆکو پێنی مییاڼەتەوەیی بورهان سونمەز باسش چانەیەکەرد، "پەی شارتەیۆ حەقیقەتەکا هرووژم مەکریۊنە سەرو ڕۊنامەنویسا کورڎی، ئینەیچ کاتېونە کورد گەرەکشا مافە سەرەتاییەکاش بەدەسبارۆنە".
جە وارا وەرو تیرۆرکەردەو ڕۆنامەنویسا جیهان بیلگینۍ و نازم داشتانینە ناڕەزایەتییەکێ بەردەوامێنێ. سەرۆکو پێنی مییاننەتەوەیی بورهان سۆنمەز هرووژمەکی سەرو ڕۆنامەنویسا کوردیش پەی ئاژانسو هەواڵو فوراتی هۆرسەنگنێ.
سەرۆکو پێنی باسش چانەیەکەرد تیرۆرکەردەو رۆنامەوانا داشتان و بیلگینە مایەو قەبوڵکەردەی نیا، ئانەیچ جە کاتێنە بێسەروبەری و هەڕەمەکبییەی هرووژمەکا سەرو وەرنیشتی نیشانە مڎۆ و واتش، "جیهانە و نازم داشتان کاتو ئامادەکەردەی هەواڵینە کریێ ئامانج و تیرۆرۍ کریێ. لێوەتەرۆ هرووژما پەی سەرو ئەرەیاوناو ئازادی، لێوەتەریچ بێسەروبەریی هرووژمەکا سەرو گەلو کوردی جە وەرنیشتەنە وزۆنە ڕووە. ئێمە گردما ئانەی زانمێنە، 'جەنگەنە وەڵۍ گرد چێوێنە حەقیقەت کوشیۆ'. پەی ئانەی حەقیقەتی پەردەپۆش بکەرا، واتە هرووژمێ کریا سەرو ئا کەسا هەواڵێ ئاماڎە مکەرا. ئا دۆخە جە گرد یاگێ جەهانینە ئینا ئارانە، بەڵام داخەکێم جە وەرکەوتوو دلێڕاسەینە فرە زەقتەر وینیۆ".
'هێزە جەهانییەکێ تاوانە بە ئاسانی کوردی بکەرا قوربانی'
سۆنمەز ئاماژەش بە بێدەنگی گلێرگەو مییاننەتەوەیی جەوەرا وەرو هرووژمەکا سەرو گلێرگەی و ڕۆنامەوانا کوردینە کەرد و واتش، "کاتێ گلێرگەو مییاننەتەوەیی دەنگ هۆرمەبڕۆ، هێزە دلېینەییەکۍ واتە حکومەتەکێ یان رێکوزیێکێ بە جۆرێ بێباکانە جماوە. وەرو ئانەی حیچ فشارێوە مەوینمۍ کاتو پلانەو هرووژمەکاشانە حیچ سڵۍ نمەکەراوە. ئینە حەقیقەتێن، سەرو ئاستو مییاننەتەوەیی پێسەو پەنەوازی خاوەنداری جە کوردی نمەکریۆ. دژوار نییا کە مرۆڤ مەڵامەتو سیاسی ئانەیش پەی بەرگنۆ. کاتێ بەرژەوەندی ئابوری و سیاسی هێزە گۆرەکا جە ئارانە با، متاوانە بە ئاسانی کوردەکا بکەرا قوربانی. چی سەردەمە تاریخییەو سەڏ ساڵەینە فاڕییایێ چا رووانگۆ نەکریان. ئینە جەکاتێنە تاکە چێوێ کە کورد گەرەکشا و پەنەوازش پنەشا، جیاواز نییا جە مافو کەسا تەری. گەرەکشانە قەرار جە ئایندەو وێشا بڎانە، خاوەنداری جە کلتورەکەیشا بکەرا.
'پەی پارێزگاری جە ڕۆنامەوانا کۊششەکێما بەردەوامێنێ'
سۆنمەز باسش چانەیەکەرد کە پەی پارێزناو ڕۆنامەوانا پێنی مییاننەتەوەیی ئینا کۊششەنە و واتش، "پێنی مییاننەتەوەیی پەی زیاتەر جە ٤٠ وڵاتا و جە ڕاو هەزاران ئەنداماشۆ کۆشش مکەرۆ. هەرمان و کاری ئەساسیما ئەرەکۆشاین پەی ئازادی نویستەی و وێژەی. بەڵام هرووژمەکێ سەرو ئەرەیاونای جە ئاستێنە زیاڎۍ بیێنۍ کە ئێمەیچ بەشداری جە پەشتیوانییەکا ئا رێکوزیایا کەرمێنە کە پەی رۆنامەوانا کۊشش مکەرانە. ژمارەو ئا ڕۆنامەوانا ساڵەی ویەردۍ جە فەلەستینەنە کوشیێ، جە کۆو ژمارەو ئا ڕۆنامەوانا جە جەهانەنە کوشیێنێ زیاتەرا. پەی پارێزناو ڕۆنامەوانا هەوڵ مڎەیمێ تۆڕەو پەشتیوانی ساز بکەرمێ و فشاری دیپلۆماتیک جە حکومەتەکا بکەرمێنە. ئێمە هەوڵ مڎەیمێ رێکوزییاکا سەر بە نەتەوەیۆگێرتەکا و یۆبییەی ئەوروپای هانی بڎەیمێ پەی ئانەی گنانە وێشا و جە پرسو پارێزنای ڕۆنامەوانا و ئازادی ئەرەیاونای چا مەنتیقانە دەورو وێشا گێڵنا".
