پارتوو ژیۋای ئازاڎیی کوردسانی (پژاک) سەردەمێوەنە ئەرەمەرزیا کە ۋەرکەوتوو کوردسانی جە پووچینە ژیوۍ، پەنەوازش بە پارتێوە تازەی بۍ، چونکی شەپۆلەو نا هومێڎیی جە ۋەرکەوتوو کوردسانینە ژنەویۍ و خەڵکی بەبێ پاڵپەشتی مەنۍ بێنۍ، حکومەتی ناوەندی بە شێوێوێوە نائاسایی چنی گەلی جمێوە، کوردشا جە مێڎانوو دەسەڵاتین دوور وستەبێوە، دەوڵەتی ناوەندیی شەپۆلێوە نایەکسانییش جە سەراپاو کوردسانینە دەس پنە کەردەبۍ، کوردسان زیاتەر ڕەهەندێوە ئەمنیش جە ۋێش گێرتەبۍ، جە ئاژێوە چی ڕەنگەنە ۋەرکەوت پەنەوازش بە هێزێوە پاڵپەشتی بۍ، جا ئی هێزە جە بەینوو شاری و دەگاکانە بۆ، کتومت پژاک سەردەمێنە ئەرەمەرزیا کە نا هومێڎیی جە ۋەرکەوتوو کوردسانینە بۍ، پارتەکۍ تەریچ جە پانیشتوو کوردسانینە ئەرەنیشتۍ بێنۍ، جە وەختێنە ئاڎێشا جە کونجێنە جە قاڵب دێبێنۍ، بەڵام تەنیا هەرمانەشا بەرکەردەی بەیاننامەی بۍ.

چالاکیی چەکڎارانە و ۋەرەرگیریی ڕەوا جە گرنگتەرین ئا ئەگەرا بۍ کە ئشیۍ جە ۋەرکەوتوو کوردسانینە بەردەوامیش پنە بڎریۆ، بە تایبەت جە نەوەڎەکا و دووە هەزارەکانە، بە تایبەت جە سەرەتاو دووەهەزارەکانە ئی ئاریشە بەرجەسە بی، حکومەتی ناوەندییچ ئی لاوازییەو پارتە کوردییەکاش بە عالتەرین شێوە پەڕ کەرێوە، سیاسەتوو سەرکوتکاریی و نکوڵیی و تاونایۆ جە ۋەکەوتوو کوردستانینە پەیڕەو کەرۍ، جا ۋەرکەوتوو کوردسانی زیاتەر چی ساڵانە تووشوو شێونای ئاما.

ئەرەمەرزناو پژاکی، سەرەتێوە تازە و هومێڎێوە تازە بۍ پەی ۋەرکەوتوو کوردسانی

پېسە چنی پەکەکە جە وەختێنە سەرنیشتوو کوردسانینە ئەرەمەرزیا کە ئیتر ئاسەوارۍ کوردا ئارانە نەبۍ، ئانە پەکەکە بۍ تاریخی جە یاڎ کریایش سەر جەنۆ زینڎە کەردۆ و گیان و ڕۆحش ۋەرەرە کەردۆ، ئەرەمەرزناو پژاکیچ دەسکۊتێوە هامشێوەو ئانەو پەکەکەی بۍ جە سەرنیشتوو کوردسانی، پژاک جە سەرووبەنڎێنە ئەرەمەرزیا، نا هومێڎی گەلی وەرۍ، چنی ئەرەمەرزناو پژاکی هومێڎێوە تازە و ڕۆحێوە تازە جە ئەڎۍ بی.

حەقەتینەکەو پژاکی بی بە کۆسپوو ڕێخە کوایرەو دەوڵەتی جە کوردسانەنە و ڕاش جە تاونایۆ و سیاسەتوو نکوڵیی گێرت، چونکی سیاسەتوو نکوڵیی دەوڵەتی فرە خێرا پەلوپۆ شانۍ، پژاک تەگەرەش پۍ ئی پەلوپۆکوایە سازنا و ڕۆحێوە تازە و هومېڎێوە تازەش جە جەرگەو شکسەکاوە بە ۋەرکەوتوو کوردسانی بەخشا.

پژاک جە سۆنگەو چالاکییەکاشۆ جە ۋەرکەوتوو کوردسانی و شارەکا تەروو ئێرانینە، پەیامێوە ڕۊشنش دا گۊشۍ دەوڵەتوو ناوەندییرە، ماناو ئا پەیامیچە ئانە بۍ کە ئی گەلە بێساحێب و بێئیراڎۍ نیەنۍ.