ئیشکگیریی سەرو سنوورو قامیشلۆی و نسێبینی  دژو هرووژمە ئەرەگیرییەکا دۆڵەتو تورکی و چەتەکاش SMO پەی سەرو سەرنیشتیوو وەرکەوتوو سوریای جە ڕۆو ٧ـەمینە بەردەواما. سەر سەعب  بەسەڎان هاموڵاتیێ پەی دمای ئاردەی بە هرووژمەکا ئەرەگیرا و قبوڵکەردەی پێگەو ئیدارەو وێڕاوەبەری سەرنیشتوو وەرکەوتوو سوریای ئامێ مێڎانەکە و دروشمۊو "بژیوۆ مڏرامانو وەرنیشتی"شا بەرزکەردۆ. جە مەیانەکەنە گەل دروشمێش بەرزکەردۍ و ئاوازو مڏرامانیشا واتۍ. هەرپاسە بەدەیان هونەرمەنێ جە شارەکا مێردینی و، ئامەد، ئیلح، وان و دەوروبەرینە بە بەشداری کەردەیشا جە چالاکییەکەنە پاڵپەشتی وێشا نیشانەدا.

شاندو چەولیگی و خارپێتی بە لافیتۍ"بژیوۆ مڏرامانو وەرنیشتی" و "نا پەی جەنگی" لوێ مێڎانەکە.

هامسەرۆکو دەم پارتی، چەولیگ حسێن یۆلداش، چالاکییەکەنە ئەرەیاوناش، مەرامو سەرەکی هرووژمەکا پەی سەرو وەرنیشتی دلێنەبەردەی دەسکەوتەکا گەلو کوردین و واتش: "ئێمە ساڵانە دژو فاشیزمی ئەرەکۆشای مکەرمێ. ئاڎێ گەرەکشانە دەسکەوتەکا گەلو کوردی دلێنەبەرا. ئێمە جە سەردەمو شێخ سەعیدیۆ جەنگ مکەرمێ و جە سەید ڕەزایۆ مڏرامان مکەرمێ، چێگۆ دیسان بانگواز مکەرمێ و ماچمێ، بەیدێ دەسو ئاشتی گێردی. هەرپاسە داوا جە گەلو پانیشتوو کوردستانی مکەرمێ و داوا جە واڵەو برایا وێما مکەرمێ بەیدێ پێوەرە ئی دەسکەوتا پارێزنمێنە."

عەلی یەڵدرم، هامسەرۆکو دەم پارتی خارپێتی، ئەرەیاوناش؛ ئاڎێ پەی ئاشتی گلێرێ بییێنێ و گەرەکشانە ئایندەو ئی خاکە تاریخییەما بە ئاشتی بنیاڎ بنیا."

هەرپاسە بەنامێ هونەرمەناوە، جەسیم باشبوگ ئەرەیاوناش؛ چێش بۆنە با بۆ، ئێمە دژو ئا کەسا مڏرمێ کە هرووژم مکەرا سەرو زوانو  کلتووریما. بەیدێ با خاوەنداری جە گەلەکەیما بکەرمێ وەرنیشتەنە."

پەرلەمانتارو مێردینی بێریتان گونەش ئاڵتینە ئەرەیاوناش؛ "هەتا ستاتۆو وەرنیشتیما مسۆگەر بۆنە، ئێمە چێگە بیمێ، سەرو سنووری. دەسەڵاتدارا ماچانە حیچ کێشێوەما چنی کوردی نییا. ئەر پاسەن پەیچێشی ‌هرووژمو کوردا مکەرا و گەرەکشا نییا کورد پێگێوەش بۆنە و ژیواێی تازە بنیات بنیا؟ وەرو ئانەی ئێژا ئۆجالان ماچۆ چێگە حەقیقەتێ هەن، باسو حەقیقەتو ئی خاکەیە مکەرۆ، گۆشەگیر کریۆ."