چالاکی ئێشکگیری سەرو سنوورو نسێبینو مێردین_قامیشلۆی دژو هرووژمەکا دۆڵەتو تورکی و چەتەکا سوپاو نەتەوەیی سوریای، ٦ ڕوێن بەردەواما. هاموڵاتیێ جە سەرسەعبۆن سەرو سنوورو نسێبین_قامیشلۆیۆ گلێرێ بیێ. بەشدارا هێلەکشا کەردەنە بە نوویستەو "نا پەی جەنگی" و "وەرنیشت شکۆو ئێمەن"، هەرپاسە درووشمو "بژیوۆ مڏرامانو وەرنیشتی" و "وەرنیشت شکۆو ئێمەن"بەرزکەردۆ.

جە شارەکا دەوروبەرینە فرەو کەسا بەشدارێبیێ، هەرپاسە جەماوەرێوە فرە جە ئامەدۆ بەشدارێ بیێ. چالاکوانێ سەرو سنووریۆ ئەرەیاونێوەشا وەڵاکەردۆ.

هامسەرۆکەو دەبەپەو ئامەدی، سوڵتان یارا جە چالاکییەکەنە قسێش کەردۍ، جەختش کەردۆ جە پەنەوازی یۆبییەی کوردا و خاوەنداری جە دەسکەوتەکا، چونکە هرووژمەکێ دژو دەسکەوتەکا کوردی ئەنجام دریانە، واتش: "گەلو کوردی گەرەکشا بە ئازادی سەرو خاکەکە بژیوۆ. چنی چەتەکا نا، چنی کوردی گلێرێ باوە. بانگەواز جە گردو کوردا و دۆستەکاما مکەرمێ، چبەرو وەرنیشتی یۆگێرانە".

پەرلەمانتارو دەم پارتی کاموران تانهان ئاماژەش پانەیە کەرد دەسەڵات ڵێوە ماچۆ چنی کوردی "واڵە و برێنمێ" کەچی جەڕاو چەتەکاوە هرووژم مکەرۆ سەرو وەرنیشتی، واتش: "نامنیشانو چارەسەری پرسو کوردی، عەبدوڵا ئۆجالانا. گرڏ چاکە ئینێ دماونەتەوەیی، بەڵام بەڕێز ئۆجالان پەی ئاشتی ئەرەکۆشۆنە. بەحەقەتینە ئەر چارەسەرو پرسەکێتا گەرەکا، بەرەکا ئیمراڵی کەردێ، با گرڏما زانمی کە ئۆجالان چێش ماچۆ".

تانهان واتش: "وەرنیشت زێڵۍ ئێمەن، زێڵۍ کوردەسانین. زێڵۍ وێما جیانمازمێ، ئەرەکۆشمێ"