دەقوو نۋیستەکەو لەتیف فاتیح فەرەجی پی جۊرەنە:

١''

جەناب و حاکمی پېسە ئانەی موزیڕەنی سەروو ئانەی بە مەڵامەتوو تاپڕېوە شش مانگۍ تەر سزاو گوهداری بڎەی، دماو ئا شش مانگەیە ئەگەر حیچت دەسنەکۊت پۍ درېژ کەرڎەیۊ سزاو گوهداری سەروو ئانەی سزاش بڎە کە جیای ئانەی بەتورکی قسۍ کەرۊ دلۍ داڎگاینە، بەکورڎی قسۍ کەرۊ، ئانەیچ تاوانېوە گۊرېنە. ئەرۍ قوربان مزانی جە یانەو بڕۍ جە جاش و موستەشارە داواکریاکا داڎگاو ئەنفالی نەک تاپڕ کە حیچ نیا، بیکەیسی، کڵاشینکۊف، دەمانچە و ڕەنگە میلانیچ بۊ،جا کوڕو کاڵەکېشا فرە بۍ منەتانە ۋېنەکا ۋەڵۍ کەراوە، دەی وەرت نەمروو یاری پایشا واچی پەشتەو چەماتا بروېنۍ.

٢''

بروسکە بەپەلەکەو حکومەتی

وەڵا ئافەرین پۍ دڵسۊزی حکومەتوو هەرېمی وەڵۍ ئانەی حکومەتی تورکی سەروو تەقینەوەکەو جانقایەو ۋەروو دەموو وەزارەتوو تیرۊری ترکینە بەیاننامە بەرکەرۊ، حکومەتوو هەرېمی بەرش کەرڎوو چالاکیەکەش بە تیرۊرستی بەنامۍ کەرڎ داواو ڕیشە کېش کەرڎەو تیرۊریش کەرڎ.کەچی پۍ ئا گرڎ کوشتەی و بڕیەیە نقەش چۊوەنمۍ، کوشتەی ئەستۍ خاتونۍ باس مەکەرۊ شینە پۍ بکوشەکا فڕگەو عەربەتۍ گېڵنۊ، ئەرۍ ئېمە حکومەتوو هەرېموو کورڎسانی سەر بە عېراقی فیدراڵینمۍ، یان ۋیلایەتۍ جە تورکیای ئەردۊگانی.

٣"

ئافەرین وەی بارەکەڵا

وەڵا ئیجارە ئافەرینۍ پۍ باڤڵ تاڵەبانی دلۍ ئا گرڎ ژاوەژاوەینە و چا ئاژەنە تاواش کۊنگرەو پەنجی بەسۊ بەدەنگی بەرزیچ هاوار کەرۊ بەسەربەرزی کۊنگرەما بەست، وەلۍ دووۍ ئافەرینېچ پۍ لاهوری شېخ جەنگی کە سلېمانی و ئارامی ئی دەڤەرەیشە بەهەند هۊرگېرت و جیای هەر کاروەدایۍ ، جە وەختوو کۊنگرەو یۊبیەینە سەفەرش کەرڎ، ئینەیچ ئاماژېوە گرنگا پۍ گرڎوو نزیکەکاش کە سلېمانی ئینا سەروو گرڎ چېۋېوە، من ئەنجامەکۍ کۊنگرەیم پنە خاسۍ با یا نا، حیچ چانەی مەفاڕیۊ کە پەنەوازەن یۊبیەی نیشتیمانی دماو کۊنگرەی یۊبیەی ۋەڵۍ کۊنگرەی نەبۊ، بەتایبەت پۍ ئی سنورە فراوانە ستەم ونە کریایە کە بە دوژمنا تەوقە دریان.

٤"

ئاێروو کۊپتەرەکا ناوشوانی

ڤیدیۊو دووۍ کۊپتەراشا پۍ کیاستا کە سەروو شوانی و خاڵخاڵانیرە سوڕیاوە و ئاێر جە پوش و پەڵاش و ئا مەنتیقەیە ۋەرمڎا. ئا دیمەنە هاموەختا چنی بۊردومانە بەردەوامەکا تورکیای فاشیستی، دیمەنەکە ئنڎە قیزەونا ئینسان قیزی چا کەسا کەرۊوە کە پا هەرمانۍ هۊرمېزا. کۊپتەرەکۍ کۊپتەرۍ سوپاو عېراقینۍ، مەنتیقەکەیچ مەنتیقەو وەزیروو داڎوو عېراقین کە هیواڎارەنا ئەگەر ئانەش دیەبۊ شۊنیرەلوایش پۍ کەرۊ و دۊس بە حکومەتی عېراقی و داڎگای فیدراڵی.