ئەندامو ئەنجومەنو گردی پارتو یۆبییەی دیموکراتیکی (پەیەدە) تەلعەت یونس جەبارەو گرنگی یۆبییەی ویەکریزی گەلو کوردی قسێش پەی ئاژانسو هەواڵو فوراتی (ANF)ی کەردۍ.

تەلعەت یونس واتش: "دوژمنێ پەی ئانەی یۆبییەی ویەکڕیزی گەلو کوردی نۍ دی بەششا کەرد. پەی ئانەی بتاومێنە دەورو بەرژەوەندییە هامبەشەکامارە جوڵییەیمێ، مشۆم یۆبییەی کوردی پێکبارمێنە. پەی ئانەی تاومێنە سەرو خاکو وێما مەنیمێ و درێژە بە بییەو وێما دەیمێنە، پەی ئانەی تاومێنە وەراوەرو سیاسەتو  قڕکەردەی مڏرمێ مشۆم جەسەران سەرو جەهانینە خاوەن روانینو هەڵوێسی بیمێ. هەوڵەکا دوژمنی پەی پارچەکەردەی، سیاسەتو ئەرەگیری و ماڕای یەکڕیزی و یۆگێرتەی گۆرەتەرین لەمپەرا وەردەمو بەدەسئاردەی مافەکا گەلو کوردی. وەرو ئانەی پێسەو پەیەدەی پەی ئاردەیدی یەکڕیزی کوردا، پەی بەرژەوەندی و روانین هامبەشی و پەی دیموکراسی و یەکسانی و ئازادی هەوڵێوە فرەن".

'دیڎارەکۍ بە دەس کیسەو دۆڵەتو تورکی شکسشا پنە ئاما'

تەلعەت یونس ویرش ئاردۆ کە جە سەرەتاو شۆڕشو وەرنیشتی بەمەبەسو ئاردەیدی یۆبییەی کوردا ئەنجومەنێوە باڵاو کوردی پێکئاما و رۆشنش کەردۆ، "پەی ئەرەمەزنارەو سوریایێ دیموکراتیکی و وەرنیشتێ ئازادی، جە سەرەتاو شۆڕشیۆ هەوڵدریا یۆبییەی گەلو کوردی پێکئامێ. پەی ئانەی بەرە بە سیاسەتو قڕکەردەی و کۆمکوژی دریۆ چنی پارتە سیاسیەکا و رێکوزییێ کوردییەکا ئێمە دیالۆگەنە بێنمه. هەرپاسە ئێمە بانگەوازما جە پانیشتوو کوردەسانی کەرد کە پەی یۆبییەی کوردی بانە هامکارێ. پەی هەرمانێ هامبەشە هەوڵەکێما چنی ئەنەکەسەی ڕێکوزتێ."

ئانەیچش وست رووە، کە بەمەڵامەتو بەرژەوەندی شەخسی و تایبەتی پارتە سیاسیە کوردییەکا و دەسوەردای دوژمنا گەلو کوردی ئا هەوڵێ نەیاوێنێ ئەنجام. هەرپۆکەی هەرمانەو ئەنجومەنو باڵاو کوردی مدریێنی. بەڵام هەوڵەکا پەیەدەی پەی و سازکەردەو یەکڕیزی بەینو کوردا و رێکوزتەی کۆنفڕانس و هەوڵەکاش پەی بەستەو کۆنگرەی نەتەوەیی نەمڏرێ.

پارتە سیاسیەکێ چێرو چەترەو پەیەنەکەی بە سەرمەشقایەتی هێزەکا سوریای دیموکراتیکی و میانجی هاوپەیمانی مییانەتەوەیی هەوڵشادا چنی ئەنەکەسەی گلێرێ باوە. بەڵام بەمەڵامەتو پەیوەندی لایەنەکا چنی دۆڵەتو تورکی و هێزە جیاجیاکا ناتاواشا ئەنجامێ جا هەوڵا بەدەس بارا. سەربارو ئانەی  پێسەو پەیەدەی دەس وەڵێ وستەی تازەما وست ڕووە، پەی ئانەی پارتەکێ سەربارو گردو روانگە جیاوازەکاشا پەی تاوتوێ کەردەو پرسو ئایندەو سوریای و ئاردەی کایەی روانگێوە هامبەشی کۆباوە. ئا دەس وەڵ وستەیە کە تا ئیسەیچ بەردەواما پەی دیدارەکا چنی دیمەشقی فرە گرنگ بۆنە. ئامانجێ سەرەکیما دەسەبەرکەردەی یۆبییەی گەلو کوردین. پەی ئانەیچ چێشما جەدەس بێ مکەرمێش".

'ئا کوردێ سەرمەشقایەتیشا پەی شۆڕشی کەرد، متاوانە بانۍ بە سەرمەشقو سوریای تازەی'

تەڵعەت یونس ئانەش وست ڕووە کە دماو وڕناو رژێمو سوریای، سەردەمێ تازە جا وڵاتە دەسش پنەکەردەن و واتش، "پەی ئانەی تاومێنە بەشداری جە بنیادنیاو سوریای تازەی کەرمێنە، پەی پارێزناو مافەکا گەلو کوردی، پەی مسۆگەرکەردەی مافەکاما جە دەستورو تازەینە فرە گرنگا کە پارتە سیاسیەکا کوردی خاوەن تەماشەکەردەی هامبەشێ با. فرە گرنگا جە سوریای تازەنە بە ویرکەردێوە هامبەش جوڵیێمە. مشۆم یۆگێرمێ، پێسە چنین گەلو کوردی سەرمەشقایەتیش پەی شۆڕشو وەرنیشتی پەی سوریای تازەی گەلو کوردی تاونە سەرمەشقایەتی کەرۆ

بێگومان ئانەیچ بە یۆبییەی و یەکڕیزی گەلو کوردی دەسەبەر کریۆ، گردو پارتەکا چێرو چەترەو پەیەنەکەی و گردوو پارتە سیاسیەکا تەرو ئیدارەو وێڕاوەبەری سەرنیشتوو وەرکەوتوو سوریاینە خاوەن هەمان ویرکەردەیۆنه.چا چوارچێوەنە بانگەوازما جە ئەنەکەسەی کەرد. بانگەوازما جە گردوو پارتە کوردسانییەکا کەرد، پەی ئاردەیدی یۆبییەی کوردی یاردیدەرۍ و هامکارۍ با. هەوڵەکێ بە میانچی فەرەنسای و ئەمریکای بەردەوامێنێ. هەرمانە پەی پێکئاردەو شاندێوە کە سەردای دیمەشقی مکەرۆ و نوێنەرایەتی گەلو کوردی مکەرۆ، بەردەوامێنێ".