جە ئاکاموو هجومەکا دەوڵەتوو تورکی ئەرەگیرینە جە مەنتیقەو تربەسپی جە مەحاڵە و ماشوکینە ٤٥ دەگۍ، جە مەحاڵە و حیلوای ٢٣ دەگۍ، جە مەحاڵە و ئەبو فەرحاینە ٦٣ دەگۍ، جە مەحاڵە و تل مەعروفیەنە ٤٥ دەگۍ، جە دەگایەکا بەیازی گولانەی و گەورەینە، گر شێران، گر داهۆل، ئەبو هەجارا، گرکێ شامۆی سەر بە مەنتیقەکەی بە گرڎی ١٨٢ دەگۍ بێ کارەب و بێ ئاوۍ بیێنۍ. چە کۊڵانەکایچەنە کە مۆلیدۍ گۊرێشا ئینۍ چنە ڕووانە تەنیا ٥ سەعاتۍ متاوا کارەبا حاسڵ کەرا. بەمەڵامەتوو ئانەی ناوەنڎوو سەرەکی گازوو تربەسپی کریان ئامانج، جە مەنتیقەکەنە سووتەمەنی ئینا تەمام بیەینە.

جە تربەسپی و دەگایەکاشەنە ١٢٠ هەزار کەسۍ بۍ ئاووکارەبا بیېنۍ بە مەڵامەتوو نەبیەی سووتەمەنیچۆ چەمەڕاکریۆ کە دماو ماوێوە مۆلیدەکێچ جە هەرمانە گنا. حەرپاسە جە مەنتیقەو تربەسپی ١٤ هەزارۍ و ٧٠٠ خۊنکارۍ جە ١٥٠ وەننگێنە بەمەڵامەتوو هجومەکاوە جە وەنای بڕیێنێرە.

مزگین لەزگین خەڵکوو دەگاو گر بکەلێی تربەسپیا، چنی بنەیانەکەیش ٢٠ ساڵێن جە مەنتیقەو تربەسپینە مژیوا. یاردەی دەروو هامسەرۆکا ئەنجومەنوو تربەسپییا. مزگین باس جە هجومەکا و ئا ئاژە ناهەموارەیە کەرۆ کە ئەرەنیشتۍ مەنتیقەکەی بە مەڵامەتوو ئا هجوماوە کۊتێنێشەنە و ئاماژەیچ پا خزمەتا کەرۆ کە ئەنجومەنەکەشا پێشکەش بە گەلیش کەرۆ.

لەزگین ئاماژە بە چڕبیەیۆ هجومەکا دەوڵەتوو تورکی ئەرەگیری کەرۆ جە ١٣و ڕابڕانیوە پۍ سەروو چێرخان و مەنتیقەکەیشا و کەردەی ئامانجوو ناوەنڎەکا سوتەمەنی، وێستگەکاو کارەبۍ، بنکە تەندروستیەکۍ و وەننگەکا و ئا یاگۍ کە پەنەوازی تایبەتوو خەڵکی حاسڵ کەرا و ئاماژەش پانەی کەرد بە مەامەتوو ئا هجوماوە سوتەمەنی جە مەنتیقەکەنە ئینا تەمام بیەینە و پا مەڵامەتۆ مۆلیدەکۍ کە وەڵتەر ٨ سەعاتۍ کارەبا پۍ هاموڵاتیا حاسڵ کەرێنۍ، جە ئیسەنە متاوا تەنیا ٥ سەعاتۍ کارەبا بەرهەمبارا و دوور نییا مەنتیقەکە چا پەنج سەعاتەیچە بێ بەش نەبۆ.

زارۊڵۍ بە مەڵامەتوو تەرسێوە نەوەشۍ کۊتێنۍ

مزگین لەزگین ئاماژەش بە کاریگەریە دەرونیەکا ئا هجوما سەروو زارۊڵا کەردوو واتش،" ژمارێوە فرە جە زارۊڵا تەرسەو هجومەکانە تووشوو نەوەشی بیێنۍ و ئا حاڵە دەرونیە پاسەش کەردەن هامسەنگی جە دەس بڎا و بە دەنگێوە ئاسایی_چ تووشوو شپرزەی و دڵەتەپۍ با. ئینە جیا چانەی کە بە مەڵامەتوو زەرەرەکا کەرتوو پەروەردەی و مردای پرۆسەو وەنای جە ئاکاموو ئا هجومانە، ئاینڎەو زارۊڵەکایچشا نادیارا".

مەنتیقەکەی کەرە چوار بەشێوە ئاوی بەشوو بەشێوە جە ئەرەنیشتا مەنتیقەکەی مەکەرۆ

لەزگین ئاماژەش پانەی کەرد کە جە ئیسەنە بە مەڵامەتوو زەرەرەکا ئا هجوماوە ئاوی بڕیێنە و گەل ئیسفاڎە چا بیرا هۊرگێرا کە سەروو ئەرکوو ۋێشا دێنێشا ونە و ئەگەر ئا بیرۍ و خزمەتگوزاریەکۍ شارەوانی گەلی نەبیێنۍ، قومۍ ئاوی جە مەنتیقەکەنە دەسە نەگنۍ، بەڵام بێگومان ئا ئاوۍ کە ئینا وەروو دەسینە بەشوو بەشێوە کەم و مەنتیقەکەیچ مەکەرۆ. هەم مەنتیقەکە گۊرەن و هەمیچ بە سەڎان دەگۍ بیایشا هەن. شارەوانی گەلی متاوۆ تا ئاستێوە خزمەت کەرۆ و تەئکیدیچش کەردۆ کە پېسە ئەنجومەنوو گەلیچ بە گرڎوو تواناکا ۋەردەسیشاوە حۊڵ مڎا خزمەت بە گەلی کەرا .