بە پاو بڕۍ سەرچەما جە شارو عەفرینینە ئاماژە پانەی کریان، کە چەتەکۍ دۊڵەتو ئەرەگیرو تورکی چنی بنەیانەکاشا بەرەو شارەکا تەرو سوریای بڕەما. سەرچەمەکۍ ئەرەیاۋنانشا، چەتەکۍ جە تەرسەو ئانەینە کە دۊڵەتو تورکی ئەرەگیری جە دژو هێزەکاو قەسەدەی بەکارشا بارۆ به تایبەت جە بەنداوو تشرینینە چنی بنەیانەکاشا عەفرینی جیامازا.

بەپاو ئا زانیارییا کە جە دەگایەکا دەوروبەرو شارو عەفرینیوە دەس کۊتێنۍ، ژمارێوە فرە جە ئەنداماو چەتەکا چنی بنەیانەکاشا جە عەفرینۆ بەرەو ناوچەکا دلېینەو سوریای بڕەمېنۍ.

کەمبیەیۆ ڕێژەو بنەیانەو چەتەکا                            

بە پاو زانیارییەکا شایەتحاڵەکا جە عەفرینۆ، جە دەگاو بێخچەو ناوچەو بلبلێی عەفرینی، ٨٢ بنەیانۍ چەتەکا سوپاو ئەرەگیرو تورکی چا ئەرەنیشتیۍ بیێنۍ، بەڵام ئیساتۍ تەنیا بنەیانێوە جە دەگاکێنە مەنەنۆ.

هەرپاسە جە دەگاو هەیومی بلبلێ، ٤٢ بنەیانەو چەتەکا سەر بە سوپاو دۆڵەتو تورکی یەرەنیشتێ کریێبێنێ، ئیسە تەنیا ٨ بنەیانێ مەنێنێ.

هەرپاسە جە دەگاو ئەلبیسکێی شارو ڕاجۆی وەڵتەرێ بنەیانەو چەتەکا ئەرەنیشتێ بێنێ ئیسە هیچکامشا نەمەنێنێ چا.

هەرپاسە جە دەگاو ئەدەموی ڕاجۆ بنکەو چەتەکا چۆڵکریان تەنیا یەک بنەیانەو چەتەکا چا مەنەنۆ، کە ئاڏش وێشا خازر مکەرا پەی ئانەی دەگاکێ جیابازانە.

جە دەگاو مەیدانای، ڕێژەو ئا بنەیانەو چەتەکا کە دەگاکێشا جیائاستێنە، سەنە ٩٠٪. بنەیانەکێ تەرێچ کەمەنێنێ وێشا خازر کەردەن بلانە.

جە دەگاو گەرمۆکو شارو ماباتایا جە کۆە ١٠٠ بنەیانەو چەتا تەنیا٢ بنەیانێ مەنێنێ کە فرەیشا سەر بە گروپو "ئەل حەمزات"نینی.

هەرپاسە سەرچەمەکێ جە دەگاو میرکانی ماباتایا ئەرەیاونشا کە بەدەیان ئەندامێ چەتەکا و بنەیانەکێشا بەرەو ناوچەکا تەرێ سوریای یاگەکێشا جیائاستێنە.

سەرچەمکێ ئاماژەشا پانەیە کەردەن کە چەتەکێ و بنەیانەکێشا دیوارو باڵه خانەکاشا تێکدێنێ و بەرە و پەنجەره و کێبڵەکاشا دزیێنێ و وەڵێ ئانەی بڕەما بڕێ یانێشا ئێرشا وەنەدێنێ .

هەرپاسە بەپاو دماینە زانیارییەکا سەبارەت بە فاڕیاو دیمۆگرافیاو عەفرینی، جە ماوەو ٧ ساڵا ئەرەگیریەیشانە، ١٨ یاگێ ئەرەنیشتە بییە و٥ کەمپێ پەی ٦٤٨ هەزار بنەیانەو چەتەکاشا وەشکەردێنێ.

فاڕیا و دیموگرافیا و کەمکەردەو ڕێژەو کوردا

وەڵێ ئەرەگیرکەردەو عەفرینی جە ٢٠١٨ ڕێژەو کوردی جە شارو عەفرینینە سەنە ٩٥٪بییەن، بەڵام ئیسە سەنە ٢٠٪ ئی ڕێژەیە کەمش کەردەن. هەرپاسە جە دژو ئا کوردا یاگەکێ وێشا چۆڵە نەکەردێنە هەڕەشەو بە کۆچکەردەیشا بەردەواما.