هامسەرۆکەو گرڎینەو دەم پارتی تولای حاتەم ئۆغۆللاریە ئەرەیاۋناش، پەنەوازا گۆشەگیری ئیمراڵی هۆرگیریۆ و واتش: "ئێمە پەی ئاشتیێوە شکۆمەڼی ئاماڎێنمۍ پەی ئەرەنیشتەی. پەنەوازا بەرنامێوە ڕۆشن ئاشکرا بکریۆ".
هامسەرۆکەو گرڎینەو پارتو یەکسانی و دیموکراسیی گەلا (دەم پارتی) تولای حاتەم ئۆغۆللاریە پەرلەمانەنە جە گلێرۆبیەو فراکسیۆنو پارتەکەیشەنە پێشئامای و ڕۆژەڤەکێش هۆرسەنگنۍ.
حاتەم ئۆغۆللاریە سەرنجش وست سەرو کۆمکوژی ژەنا جە تورکیانە، دماتەر ئاماژەش کەرڎ بە وەڵابیەیۆ و تەشەنەسانەی جەنگی و کاولکاری جە هەرێمەکە و جەهانەنە. ئەرەیاۋناش جە ۋەرا ۋەرو جەنگی و کاولکارینە، پەنەوازا جمېیەرێوە ئاشتیی جەهانیی ڕێکوزیۆ.
دماتەر سەرنجش وست سەرو ئاژەو تورکیای، ئەرەیاۋناش دەسەڵاتو ئاکەپە-مەهەپەی هەڵای سەرو هێڵۊو پاوانوازی و عوسمانی سیاسەت مکەرۆ، سەرو بناغەو دژمنایەتی کوردی هەرمانە مکەرۆ، واتش: " پەنەوازا پەرسو کوردی جە تورکیانە بە ڕاو ئاشتی و دیموکراسی چارەسەر بکریۆ. نەک تەنیا تورکیانە؛ پەنەوازا پەشتگیری جە کوردەکا بکەرا جە سوریانە کە کوچێشا مەنەن پەی بەدەسئارڎەو ستاتۆیۍ. ئی پەشتگیرییە پەنەوازا بە ڕسمی ئەنجام بڎریۆ. نمەبۆ ئانە جەیاڎ بکریۆ کە ئینە ڕاو ئاشتینە جە هەرێمەکەنە. هەرپاسە ماچمۍ پەی ئی داوایا، پەنەوازا گۆشەگیری سەرو بەڕێز عەبدوڵا ئۆجالانی هۆر بگیریۆ".
هەرپاسە واتش: "پەی ئینەی جە ١٣ و تشرینو یووەمینە بە بەشداری دەیان هەزار کەسا و بە درووشمەو "ئازادی پەی عەبدوڵا ئۆجالانی، چارەسەری دیموکراتیک پەی پەرسو کوردی" ئامەدەنە بیمۍ. گەرەکمانە دەنگو ئاشتی جە ئامەدۆ بیاونمۍ بە ئەنقەرەی و ئیستەنبوڵی و بەیروتی و فەڵەستینی و ئۆکرانیای و تایوانی".
حاتەم ئۆغۆللاریە ئەرەیاۋناش پېسە هېزی، گەل ئاشتیێوە شکۆدارش گەرەکا و ئێمە پېسە دەم پارتی ئاماڎۍ گرڎ چێوێنمۍ پەی ئاشتی، واتش: "ئاماڎێنمۍ پەی ئەرەنیشتەی و گفتوگۆی. بەڵام نمەبۆ جە یاڎ بکریۆ، ئێمە کردارما گەرەکا، نەوەک قسۍ. نمەبۆ تەنیا جە چوارچێوەو قسەکەردەینە مەناوە. پەنەوازا بەیا ۋەردەمو کامێراکا و پلان و بەرنامەو ۋێشا ئاشکرا بکەرا. پی هەنگامە ڕۆشنا متاویۆ سیاسەت بکریۆ".
