ساریا تونچە واڵێ ڕۆنامەوانی خەیری تونچی کە کاتو چالاکی شەرمەزارکەردەو تیرۆرکەردەی ڕۆنامەوانا نازم داشتانی و جیهان بیلگینێنە بە ئەشکەنجدای باڵبەسکریا، ئاماژەش پانەیە کەرد سەربەرزەنە بە براکەیش و هەمڕاکاش جە خاوەنداریی کەردەیشا جە هامپیشەکاشا.
ئەستەنبوڵەنە کاتو شەرمەزارکەردەو تیرۆرکەردەی ڕۆنامەوانا نازم داشتانی و جیهان بیلگینێنە ١٢ ڕۆنامەوانێ بە ئەشکەنجەدایۆ باڵبەسۍ کریێ و ٧ چانیشا بە شێوێوە نایاسایی جە زینانە زینانیێنۍ. ئا ڕۆنامەوانێ باڵبەسکریێ بە بەهانۍ 'پڕوپاگەندەو ڕێکوزتەی' باڵبەسۍ کریێ. ساریا تونچە واڵێ ڕۆنامەوان خەیری تونچی کە جە شەرمەزارکەردەو تیرۆرکەردەی ڕۆنامەوانا نازم داشتانی و جیهان بیلگینێنە بە ئەشکەنجۆ باڵبەسکریێ پەی ئاژانسیما قسێش کەردێ و جەختش چانەیەکەردۆ سەربەرزەنە بە هەڵوێسو براکەیش و هامڕاکاش جە خاوەنداریی کەردەیشا جە هامپیشەکاشا واتش: "چێوێ ئاساییا ڕۆنامەوانێ سەرو خاوەنداری کەردەی جە هامپیشەکاشا باڵبەسۍ بکریا، بەڵام ئانە ئاسایی نییا تیرۆرکەردەو دووێ ڕۆنامەوانان.
ساریا جەختش کەردۆ چانەی هەرچنە باڵبەسکەردەو براکەیش نیگەرانش کەردێنە، بەڵام ئاڎێ هەرمانە عال و پەنەوازەکێشا کەردێنە و ئینەش وات: "بە گرد شێوێ باڵبەسکەردەو ئا ڕۆنامەوانا ستەمێوە گۆرەن. گرد کەسێ مزانۆ هەرمانێ نایاساییەنە." ئاماژەش پانەیەدا بە مەڵامەتو ستەم و زۆرداری دۆڵەتیۆ بنەیانەکەشا وڵاتشا جیا ئاستەن و وەڵۍ بیێنێوە، کەچی جە ئیسەنە دۆڵەتو تورکی فاشیستی براکەشا باڵبەسکەردەن.
'مشۆم دەزگا میدیاییەکێ جە دژو ستەمی مڏرداوە'
جەبەردەوامیینە ساریا تونچە سەرنجش وست سەرو هەڵوێسو ئەرەمەزیا میدیاییەکا و دەسنیشانش کەرد بەمەڵامەتو کەم هەڵوێسی ڕۆنامەوانا ستەمکەردەی ئاسایی بییەنۆ و ئینەش وات: "ڕێکوزیا میدیاییەکۍ تورکیای چی مژارەنە فرە ناچالاکێنێ. مشۆم جە دژو فشار و ستەمو سەرو ڕۆنامەوانا بێدەنگێ نەبانە. بەڵام نیشان نەڎای ناڕەزایەتی بەهانۍ ئی ستەم و فشارێشە ئاساییۍ کەردێنۍ."
دما دمایی قسەکاشەنە ساریا تونجە ئاماژەش پانەیەکەرد براکەش پەی جە دژ مڏردایۆ دژو ناحەقییەکا بییەن بە رۆنامەوان. ساریا بانگەوازش جە گرد کەسۍ کەرد جە دژو ناحەقی و نایاساییەکا بێدەنگێ نەبا و هەڵوێس هورگێرا.
