جۆشو ئاهەنگو نەورۆزو ئامەدی بە درووشـمو "ئەرەپڕە وەختو ئازادی و سەرکەوتەین" تا مێ زیاتەر بۆ.  

هامسەرۆکی گردینو پارتو یەکسانی و دیموکراسیی گەلا (دەم پارتی) تونجەر باقرخان ئاهەنگەکەنە قسێش کەردێ و نەورۆزش وەنەو سەدان هەزار ئامادەبیا مەبارەک کەرد.

باقرخان تیشکەش وستە سەرو نەخشەڕاو ڕابەرو گەلو کوردی عەبدوڵا ئۆجالانی نەورۆزو ٢٠١٣ و واتش: "ئا نەخشەڕێ، نەخشەڕاو ژیواێوە دیموکراتیکی و ئاشتییانێ و یەکسانیی ٨٦ ملوێن هاموەڵاتا تورکیای بێ. بەداخۆ کەسێ جەنگوازێ دوژمنایەتیی کوردا مکەرا، تا ئاشتی نەیاوۆ ئی وەڵاتە نەخشەڕێکێشا قبووڵە نەکەردە، پێسەو دەم پارتی پەشتیوانیی نەخشەڕێکێ بەڕێز ئۆجالانینمێ. پی بۆنەوە، نەورۆزو بەڕێز ئۆجالانی و هامڕایاش زیندانو ئیمراڵیینە مەبارەک کەرمێ".

 درێژەو قسەکاشنە باقرخان واتش: "ئانە یەرێ ساڵێن سیاسەتو گۆشەگیری مکەرانێ، نمەتاوا ئیرادەو ملوێنا کەسا گۆشەگیر بکەرانێ، نمەتاوانێ داواو ئاشتی و دیموکراسیی ملوێنان کەسا بوزانێ گۆشەوە. خاستەرا گۆش جە داواو ئا ملوێنا کەسەیە بگێرا. پەنەتا مواچمێ، جیای جەنگی، چارەسەر ورچندێ. ئەگەر نامونیشانو چارەسەریتا گەرەکا، فرە نزیکا، ئینا دوورگەو ئیمراڵیینە".

باقرخان واتش کە جە واتەواچی و دایوسانای  ورمەیا و ئیرادەو چارەسەری گۆشەگیر مکەرانێ، سیاسەتمەداراو کوردی وزا زیندان و ئۆپەراسیۆنی سەروازی دەس پەنە کەرا، داواش کەردە شیەینەو جەنگی ئاشتی و دایوساناینە سەرف بکەرا.  

باقرخان داواش کەردە، هامپەیمانیی کوردی و تورکی زیندە بکریۆوە، لایەنە جڤاکییەکێ پەی ئاشتی و دیموکراسی کۆشییا. ڕووەش کەردە ئانیشا زوانی کوردی بە زوانی "نەشناس و زوانو تیرۆریسا" مزانا و وەڵاتو کوردا بە "تیرۆریسا" نامێ منیا و واتش: "ناچارێنێ ڕاسیی کوردی و ڕاسیی کوردستانی بیاوانەو ددانش بنیا پۆرە".

بانگەوازش ونەو لایەنە ئۆپۆزیسیۆنەکا کەرد، نەگنا چێرو فشارو دەسەڵاتی و خاوەنداریی زیاتەر جە پەرسەو کوردی بکەرا، دمایی بانگەوازش وەنەو گرد کوردێوە کەرد و واتش: "ئادێ بە گرد بستێوە کوردستانی ماچا "تیرۆریستان".  سلێمانیوە تا دهۆک و کۆبانێ، جە هەرچوارپارچەو کوردستانینە تۆپێ وارنا، یانێ دوژمنێ حەرچوارپارچەو کوردستانینێ، بانگەواز وەنەو کورداو چوارپارچەو کوردستانی مکەروو، ئەگەر ئارۆ ڕۆو یۆبییەی نەتەوەیی نەبۆ، ئیتر کەین؟ ئەگەر یۆبییەیی وێما بنیات بنیەیمێ، متاومێ ڕا جە ئۆپەراسیۆنی و جەنگو دژو کوردا بگێرمێ. پێویسا کورد یۆبییەی وێش بنیات بنیۆ و ئاستەنگەکاو وەردەمیش ورگێرۆ".

دمایی بانگەوازش ونەو لایەنە شۆڕشگێڵن و چەپ و سۆسیالیست و دیموکراتەکاو تورکیای کەرد، کۆشیای هامبەش بکەرا.