هرووژم و ئەرەگیریەکۍ دۆڵەتو تورکی ئەرەگیری پەی سەرو خاکو پانیشتوو کوڕڎەسانی بەردەوامیشا هەن، هەرپاسە ٢٣ۍ ئابو ئی مانگۍ، جە ڕاو سەیسایەق-سلێمانینە دووۍ ژەنە ڕۆنامەنوویسۍ ئازاڎیش کەرڎۍ مەرام و گەشمەرڎێش کەرڎۍ. شەرمەزارکەرڎەی و ناڕەزایەتی بەربڕیەی جە ۋەرا ۋەرو هرووژم و ئەرەگیریەکانە ئینا فراونبیەینە. چا بارۆ چەمڎاری سیاسی و ڕۆنامەنوویس کاروخ عومەر پەی ئاژانسوو هەواڵوو فوراتی (ANF)ی قسێش کەرڎۍ.

'ئا دووە ڕۆنامەنوویسۍ پۊکەی بە مەرام گیریێنۍ جە لایەنو تورکیایۆ چونکی کورڎێنۍ'

کاروخ عومەر جە سەرەتاو قسەکاشەنە ئاماژەش پانەیە کەرد سەرو پرسێوە قسە مکەرمۍ پێوەسا بە گرڎ  تاکێوە کورڎیۆ، واتش: "گەشمەرڎەبیەو هەردووە ڕۆنامەنوویسەکەی هەمڕاما دلۍ خاکو هەرێموو کورڎەسانینە ئانەما پنەماچۆ کە دژمنا کورڎی، مەرامشانە کورڎ جە هەر شۆنێنە بۆ بە مەرامش بگێرا. ئا دووە ڕۆنامەنووسێچە کورڎێنۍ پۆکەی بە مەرام گیریێنۍ جە لایەنو تورکیایۆ.

تورکیا دەیان هاموڵاتیێش بە مەرام گرتێنۍ کە هیچ ئایدیێوە سیاسیشا نەبیەن، پۊکەی مەرامە سەرەکییەکەو تورکیای دلێنەبەرڎەی کورڎی و کورڎەسانیا. دەنگو ڕۆنامەنوویسا گرنگا بۆ پەی هوشیاری گلێرگەی، پۆکەی ئانەی گرنگا ئانەن کە هاموڵاتیۍ هەڵوێسشا بۆ بە هەرجۆرێ کە متاوا.

تیرۆرکەرڎەی ئا دووە ڕۆنامەنوویسا تیرۆرکەرڎەو گرڎیمانە، پۊکەی پەنەوازا گرڎما بە جواب بەیمۍ ، مشۆم ڕۆنامەنوویسا و چالاکا بە زووتەرین کات کوۍ بیمێوە پەی ئانەی چالاکی دژو تیرۆرکەرڎەی دووە ڕۆنامەنووسەکا هەمڕایما ئەنجام بڎەیمۍ و فشار بکەرمۍ جە لایەنە سیاسییەکا و حکومەتو عێراقی و هەرێموو کورڎەسانی پەی ئانەی بە دەنگ بەیا.

مشۆم دادگای فیدراڵی عێراقی ئاگاڎار بکەرمۍ پەی ئانەی هەڵوێسی جدی برمانۆ چونکی تورکیا جە ئیساتێنە نمەمدرۆ و ئەرەگیری ئەنجام مڎۆ و خەڵکی مەدەنی بە مەرام مگێرۆ، چونکی هاموڵاتییا عێراقیچ پېسە گەشتیاری مەیانە خاکو هەرێموو کورڎةسانی و ئاڎێچ بە مەرام گیریێنۍ جە لایەنو دۆڵەتو تورکیایۆ."

'تورکیا بە گرڎ جۆرێ دژوو کورڎین، هەوڵو دلێنەبەرڎەی هەرێموو کورڎەسانی مڎۆ'

جە درێژەو قسەکاشەنە کاروخ عومەر ئاماژەش پانەیە کەرڎ کە ئا چوار دەوڵەتەی کە کورڎەسانشا سەرەرە بەش کریان، هەر وڵاتێوە بە جۆرێ هەوڵو دلێنەبەرڎەی کورڎیش دان پی جۆرە بەدەوام بی: "تورکیا یۆن چا وڵاتا کە ئەجندێوە تایبەتیش هەن  پەی دلێنەبەرڎەی کورڎی، گەر قەرارا تورکیا گرفتش چنی سەرنیشتوو کورڎةسانی هەن پەی چێشی هرووژم و ۋەرنیشتی و پانیشتوو کورڎەسانی مکەرۆ، هەر پۊکەی میاومۍ پا  دەرەنجامەی کە تورکیا بە گرڎ جۆرۍ دژو کورڎین.

داخەم نمەشۆ جە ئیساتێنە لایەنی سیاسی هەن کۊتەن خزمەتکەردەی و چەمساغیکەردەی پەی تورکیای. گرنگا گرڎما بیاومێنە و دژو ئا پیلانگێڵنیەو تورکیای مردمێوە و ڕووبەرووش بیمێوە.

تورکیا تەنیا دژو پەکەکەی نییا، بەڵکم تورکیا پاسە لەیەکش مڎۆوە کە موسڵش دەسەنە بەرئامان، هەرمانە پەی گێڵنایشۆ مکەرۆ، گرڎوو پلانەکاو تورکیای دژوو کورڎینۍ، دلێنەبەردەی بەرژەوەندییەکاو خەڵکو هەرێموو کورڎەسانی و قۆڕخکەردەی ئابووری هەرێموو کورڎةسانیا.

چونکی جە ئیساتێنە تورکیا تووشو شکسی ئابووری بیەن، گەرەکشا چی ڕێوە ئابووری ۋێش قەوەت بکەرۆ و ویلایەتو موسڵی زیڼە بکەرۆوە، ئینەیچ پا مەعنۍ مۍ کە گەرەکشا هەرێموو کورڎةسانی و کورڎیچ دلێنە بەرۆ."

'پەنەوازا گرڎما هەڵوێسی جدیما بۆ جە ۋەرا ۋەرو ئەرەگیری تورکیاینە'

واتش: "مشۆم جە پرسێوە چامنەنە گرڎما قسۍ بکەرمۍ، چونکی مژارێوە نەتەوەییا، مژارێوە ئەخلاقی و نیشتیمانییا، ئی مژارە عیلاقەش ئینا گرڎیماوە و تەنیا عیلاقەش بە لایەنێوە دیاریکراویۆ نییا، پۆکەی پەنەوازا گرڎما هەڵوێسێوە جدیما بۆ جە ۋەرا ۋەرو ئی ئەرەگیریا تورکیاینە.

ئەگەر ئی ئەرەگیریۍ تورکیای نەمردا مبۆ بە مەترسیێوە گۆرە، چن مەترسیش سەرو گەلی زیاتەر بۆ ئانڎەیچ سەرو ئی حیزبە سیاسیایچە مەترسیش هەن چونکی ئینۍ سەروەت و سامانو ئی خاکەیشا ئەرەگیرکەرڎەن، پۊکەی مشۆم هەڵوێسما بۆ و بە جواب بەیمۍ.

ئانەما ئەژنیەین کە هێزەکۍ پەدەکەی نزیکێنۍ جە تورکیایۆ، گێڵناوە کە هیچ حسابێچشا پەی نمەکەرا. ئی وڵاتە سەڎانی پېسە بنەیانەو بارزانیش ڕایۍ کەردێنۍ، پۊکەی پەنەوازا جەنگوو کورڎەسانی بکەرا، جەنگوو مەنەیۆ کورڎی بکەرا. ئاڎێچ ئینۍ مەترسینە پۆکەی گرنگا بەیاوە ۋێشارە و بەیا بەرەو گەلی. پەدەکە جە ئیساتێنە ئینا چێرو تەرسێنە مشۆم هەڵوێسش بۆ و بێنە بەرەو گەلی و ۋەرگری جە خاکو کورڎەسانی و هاموڵاتیا بکەرۆ."

جە دمادمایی قسەکاشەنە کاروخ عومەر باسش چانەیە کەرڎ کە پەنەوازا گرڎما دەورما بۆ پەی فشارکەردەی جە نەتەوە یۆگێرتەکا و جیهانی پەی ئانەی دەنگما بیاوۆ، بە جواب بەیمۍ ۋەرا ۋەر پی هرووژم و ئەرەگیریا دەوڵەتو تورکی ئەرەگیری و واتش: "تورکیا بە قوڵایی ٤٩ کیلۆمەترا ئامان دلۍ خاکوو پانیشتوو کورڎەسانی، جە بەشێوە ئا ناوچانە جەنگ هەن، خەڵکو بادینانی و دهۆکی ئینۍ مەترسینە چونکی ڕوانە گنا ۋەرو هرووژم و بۆردوومانو تورکیای، ئاڎێچ کەسوکارو ئێمەنۍ.

جە ئیساتێنە وەشبەختانە تورکیا ئینا شکسی گۊرەنە، چونکی ڕووەو زمسان ملمۍ تورکیا نمەتاوۆ جە ۋەرا ۋەرو ۋێڕاگری گەریلا ئازاڎەکا کورڎەسانینە ۋێش گێرۆ. پەنەوازا ئینۍ پەی ڕای گرڎی ئاشکرا بکریا کورد هرووژمش نەکەرڎەن تەنیا ۋەرگری جە خاکو ۋێش مکەرۆ.

قەندیل خاکو کورڎەسانی و نیشتیمانو کورڎان، پەکەکە وەرگریێوە ئەخلاقییانە مکەرۆ پەی مەنەیۆ کورڎی و کورڎەسانی. پۊکەی مشۆم گرڎما هەمڕا و هاموبیرۍ گەریلاکاو پەکەکەی بیمۍ، پەی ئانەی بە ڕۆحیەتێوە فراونتەرۆ ۋەرگری بکەرا.

ۋەرپەرس و پەدەکەی بیەن بە مەڵامەتوو ئاشکرا کەردەی شۊنەماو گەریلاکا پەکەکەی و گەشمەرڎۍ بیێنۍ، تورکیا شارەزاو ئی ناوچەیە نییا گەر ئاڎۍ چەمساغیشا پەی نەکەرا. پۊکەی ئەرکو سەرو شانا گرڎیمانە دژو ئی ئەرەگیریە و هرووژما تورکیای مردمێوە."