حسێن یڵماز، وەرپەرسو مېیانو کۆمەڵەو دیموکراتیکی کوردی جە بەرلینەنە، تیرۆر کەردەو ڕۆنامەنوویسا نازم داشتانی و جیهان بیلگینێش بە دەسو دۆڵەتو تورکی شەرمەزار کەرد و ئەرەیاوناش: "ئی کۆمکوژییە دژو حەقیقەتی و مرۆڤایەتین."
حسێن یڵماز، وەرپەرسو مېیانو کۆمەڵەو دیموکراتیکی کوردی جە بەرلینەنە سەبارەت بە هرووژمە ئەرەگیرییەکا دۆڵەتو تورکی پەی سەرو وەرنیشتی و کوشتەی کەسا مەدەنیێ واتش: "هرووژمەکێ دۆڵەتو تورکی جە گرد کاتێ زیاتەر یاوێنۍ بە ئاستێوە جددیتەر. بەتایبەت تیرۆرو ڕۆنامەنوویسا نازم داشتانی و جیهان بیلگینۍ بەمەڵامەتو ئا توڕە بیەیۆن جە فاڕایۆ حەقیقەتەکا وەرنیشتی پەی ڕاو گردی جەهانی."
یڵماز گەشمەرڏەبییەو دووێ ڕۆنامەنوویسا کوردی، نازم داشتان و جیهان بیلگینێش بە تاوانێوە دژ بە مرۆڤایەتی و تاوانەو جەنگی زانا و واتش: "ئی کەسێ بێ چەکێ بیێنێ. جە کاتێنە ئاڎێ تەنیا کامێرا و قەڵەمشا دەسۆ بییەن و هەوڵ دێنێ حەقیقەتەکا پەی راو گردی کوردەسانی و جەهانی فاڕاوە. ئاڎێ پەی حەقیقەتی ئەرکو وێشا بە نامێ مرۆڤایەتییۆ جابەجێکەرێنێ. تیرۆر کەردەیشا تاوانێوەنە دژو مرۆڤایەتی. تیرۆرکەردەو ئی دووە ڕۆنامەنوویسا پەیامێوەن پەی گردوو ئا کەسا کە شۆنەو حەقیقەتیرە گێڵانە. ئانێ حەقیقەتەکا وەرنیشتی منویساوە، با بە ئامانجو هرووژمە سیستماتیکەکا دۆڵەتو تورکی. ئینە تەنیا هرووژم کەردەی سەرو مرۆڤێ نییا، بەڵکووم ئینە کۆمکوژیی حەقیقەتو مرۆڤایەتیا. ئینە تاوانێوەنە دژو مرۆڤایەتی و تاوانەو جەنگینە و بە تنی ئیدانەش مکەرو.'
یڵماز بە جەخت کەردەیشۆ سەرو ئانەی کە جە وەرنیشتەنە ئەرەکۆشای بییە و نەبییەی ئینا ئارانە و هرووژمەکۍ دۆڵەتو تورکی سەرو دەسکەوتەکا کوردی جدییێنۍ، واتش؛ "مڏرامانو وەرنیشتی نەک تەنیا پەی گەل کوردی، بەڵکووم پەی گردو مرۆڤایەتی هیواو ئازادیا. هەرچنە چی جەنگەنە بەهێوە قورسە مڎریۆ. هەتا ئارۆ جە شۆڕشو وەرنیشتینە ١٥ هەزار کەسێ گەشمەرڏێ بیێنێ و زیاتەر جە ٢٥ هەزارا کەمئەندامێ هەنێ. ئی ئەرەکۆشا گۆرە بە هەوڵ و فیداکاری بەشەکا تەرو کوردەسانی بەرهەم ئامان."
"مۆدێلێوە ئازادی و ئاشتی پێشکەش کریا بە مرۆڤایەتی مکریۆ ئامانج"
دۆڵەتو تورکی هرووژم مکەرۆنە سەرو دەسکەوتەکا و ئیرادەو گەلو کوردی و هیواو دیموکراتیکی کە جە وەرکەوتوو دلێڕاسەینە گەشەش کەردەن. مەرام تەنیا وەرنیشت نییا. گردو گەشە کەردەیەکا گەلو کوردی و مۆدێلو ئازادی و ئاشتی مکریانە مەرام. مەرام دلێنەبەردەی گەلو کوردی و بەهاکاشا. جەنگێ کە جمیەرو ئازادی کوردی بەرۆش ڕاوە، تەنیا پەی شناسنامەو کوردی یان کوردەسانی نییا. بەڵکم ئی جەنگە پەی ژیوای و ئازادی و کەرامەتو گردوو گەلا هەرێمەکەین. کورد مۆدێلێوەش جە ژیوای خوڵقنان کە بۆ بە نموونێوە پەی مرۆڤایەتی. بەڵام پێسە مزانیۆ چی پرۆسەنە به تنی وەرەو ڕوو هرووژمی بییەنۆ جوانێ و، زاڕۆڵێ و ژەنی بە ئامانج گیریا.
گرنگ نییا گەلەکەما خاوەن چ ئایدۆلۆژیا و بیروباوەڕ و ڕوانگێوە سیاسیا، تەنیا چێوێ کە ئارۆ مشۆم کریۆنە، دەسەبەرکەردەو یۆبییەی نەتەوەییا. دوژمنێ کوردی پەی دلێنبەردەی گردوو دەستکەوتەکاما یۆشا گێرتەن. تەنانەت جە ئاسمانیچەنە ئەر دەسکەوتێوە کوردی بۆنە، بەئامانج گیریۆنە. پارتە سیاسییەکێ، ڕێکوزیا مەدەنییەکێ و گردوو پێکئاماکا گەلو کوردی؛ ئارۆ کاتو ئانەین ناکۆکیەکاما بنیەیمێ لاوە و دەورو شۆڕشو وەرنیشتینە یۆگێرمێنە. پەنەوازا گردو کوردی هەر یاگێ جەهانینە کە مژیوا بە ڕۆحێوە یۆبییەی نەتەوەیی نزیکو ئاژەکەی باوە و چی قۆناغە هەستیارەنە پەشتیوانی جە وەرنیشتی بکەرا.
جە دەسدای وەرنیشتی و دەسکەوتەکاش بە ماناو دلێنبەردەی گردوو دەسکەوتەکا گەلو کوردین. هەرجۆرە هەڵوێسێ و خاوەنداریێ جە ئارۆنە، ئایندەو گەلو کوردی دیاری مکەرۆنە و هەرجۆرە تەماشەکەردێوە و بێدەنگیێ بەماناو هامبەشین جە تاوانێ دژو گەلەکەیما. پۆکەی پەنەوازا گردما جە بوارە جیاوازەکانە یۆگێرمێ و دەنگما بەرز بکەرمێ. یۆگێرتەی کوردی نەک تەنیا پەی گەلو کوردی نییا، بەڵکووم پەی گردو مرۆڤایەتی و وەرکەوتوو دلێڕاسەی هیوایێ گۆرەن."
