تەڤگەروو ژەناو ئازادی (تەژەئا) بە ئەرەیاوناێوە ئێلح و ئەزمیرنە چالاکییەکاو ٨ ئاداری، ڕۆو جیهانیی ژەنە کرێکاراش دەس پەنە کەرد.

ژەنی ئێلحنە بە چەپڵێ و هەلهەلێ و بەرزکەردەیۆ درووشمەکا ڕاشا پیما.

پەرلەمانتارەو مێردینی بێریتان گونەشە واتش: "ژەناو کوردی سەدێوەن سەرەشا پەی بۆ سیستموو پیاسالاری نەکۆمنانرە، لەیلا قاسمێوە تا ڤیانەکا، ژەناو کوردی هەمیشە مدرامان کەرا. ئەدێ ئێشکگێری دادپەروەرینێ، گەنجێ و گەلەکەما کۆڵانەکانە درووشموو "ژەنی، ژیوای، ئازادی"ی بەرز کەراوە ".

چا دەقە هامبەشەو تەژەئاینە، کە ئێلحنە و ئەزمیرنە ونیێوە، سڵام جە کۆشیای ئازادیی ژەناو جیهانی کریا، گەشمەرداو کۆشیای ئازادیی ژەنا یادێ کریێوە.

ئەوەخوای کریاوە، وەختێوەنە یادوو ٨ ئاداری کەراوە، جیهاننە و وەرکەوتوو دلیڕاسەینە و کوردستاننە جەنگ و قەیرانی ئابووری و قڕکەردەی ژەنا و قڕکەردەی سرووشتی و نایەکسانی هەنێ، هاموەخت کۆشیای و مدرامانوو ژەنا دژوو سیاسەتی پیاسالاری هەن. سەدەو ٢١ینە کۆشیای ڕەگەزی بییەن مەیدانی سەرەکیی کۆشیای و ژەنێ یانەنە و کووچە و کارگەکانە و مەیدانەکانە خاوەنداریی جە ئازادی و ماف و بەها و ڕەنجوو وێش کەرۆ. ئاماژە پانەیە کریان، جەنگوو دژوو ژەنانە، وەڵێ گرد لاێوەنە ژەنە سەرمەشقاو کوردی کریێنێ ئامانج، ئانێ ناگیهان ئاکارسەل و ئەڤین گۆیی و فریال سلێمانەشا تیرۆرێ کەردێ مشۆم بزانا، کۆشیای ئازادیی ژەنا بێگومان سەرگنۆ.

ئاماژە کریان، جە ڕاو "سیاسەتوو جەنگی تایبەت"یوە کە کوردستاننە پێسە سیاسەتوو دەوڵەتی کریۆ، تندوتیژی و قڕکەردەی یاوان ئاستێوە بەرز، جە ڕاو ئەرەمەرزیا ئایینپەرسەکا و قەیومەکاوە، گرد یاگێوەنە زیهنیەتوو پیای و کۆیلایەتیی ژەنێ سەپییۆ. سیخوڕی و ماددەی هۆشبەر و لەشورەشی پێسە ئامرازوو جەنگی ئایدۆلۆژی بەکار مێ، هەرپاسە دەسدرێژی و بەکارئاردەی زارۆڵایچ. ماچاشۆ دژوو ئی سیاسەتا دوژمنایەتی ژەنا و گەلی کەرۆ، گلێرگەی پارێزنا و مدرامانی گەش کەرا.

تەژەئا واتش پەی ورچنیەی وێمانەی ئامادێنێ، پەی بنیاتنیای شاروو ئازادیپارێزنیی ژەنێ، ئێمە ئا زیهنیەتەیە فاڕمێ، کە ئیدارەی وێمانە پێسە مەیدانی سرووشتی زیهنیەتوو پیاسالاری موینۆ، ڕاو هێزوو فاڕیای ژەنێوە سیاسەتی دیموکراتیک و ژیوای یەکسانیپارێزن ئەرەمەرزنمێ. باوڕما چانەن بە هامسەرۆکایەتی و نوێنەرایەتیی یەکسان ئیرادەو ژەنێ یاگەدارتەر کەرمێ و زیهنیەتوو ئیدارەی وێمانەو دیموکراتیکی جڤاکنە وەڵا کەرمێوە. سەرکەوتیمێ و دەسکەوتما بێ، ئیساتێ وەختوو قەوەتکەردەی سەرکەوتەی و دەسکەوتەکامانە.

"ئازادی جەستەیی عەبدوڵا ئۆجالانی مارمێ دی "

تەژەئا ماچۆ تا گۆشەگیری سەروو ڕابەروو گەلوو کوردی عەبدوڵا ئۆجالانی قووڵتەر بۆ، تەماموو جڤاکی و بەتایبەت ژەنی زیاتەر سەرکوتێ کریا، ماچا : " ٨ ئاداروو ئێساڵیوە جارێوە تەر ماچمێ، چارەسەرێوە دیموکراتیک و ئاشتییانە پەی پەرسەو کوردی، موخاتەبی سەرەکیی چارەسەروو گردوو کێشەکا بەڕێز ئۆجالانا و واوەی ماچمێ پێویسا دەمودەس چەنیش کوێ باوە. وەراوەروو سیاسەتوو نکۆڵی و سڕیەیۆ، پارادایموو جڤاکی "دیموکراتیکی و ژیوگەپارێزنی و ئازادیی ژەنێ" کە بەڕێز ئۆجالان وستەنش وەڵێ، هەنگامەی هەرە گرنگە بەرەو ژیواێوە ئاشتییانە و جڤاکێوە دیموکراتیک. تاکە ڕاو شۆنکەوتەی پارادایمەکەیش، ڕەخسنای هەلومەرجوو ئازادیی جەستەییشا".

لەم چوارچوەنە سڵام جە ئێشکگێری دادپەروەری و مانگێرتەی جە واردەیەکا کەرۆ و داوا جە ڕێكوزیا و دەزگا میاننەتەوەییەکا کەرا، کە داواکاشا بیاونا یاگێ.

تەژەئا داوا وەنەو ژەناو کوردی و تەماموو ژەنا کەرۆ وەراوەر بە فاشیزمی و پیاسالاری پەشتگیریی جە مدرامانی کەرا.