جە چوارچێوەو هەڵمەتەو 'ئازاڎیی پەی عەبدوڵا ئۆجالانی، چارەسەری دیموکراتیک پەی پەرسو کوردی'نە بە سەرمەشقایەتی جمیەرو ژەنا ئازاڎیی (تەژەئا)ی، پارتو هەرێمە دیموکراتیکەکا (دەبەپە)ی و پارتو یەکسانی و دیموکراسی گەلا (دەم پارتی) جە چڼین شارۍ سەرنیشتوو کورڎەسانینە 'ۋەنایۆی ئازاڎیی' سازکریا.

جە فرەو شارا سەرنیشتوو کورڎەسانینە گرڎ ڕوۍ جەماوەر کوۍ مباوە و پارێزنامەو رابەرو گەلوو کورڎی عەبدوڵا ئۆجالانی مواناوە و گفتوگۆش جە بارۆ مکەرا.

چا چوارچێوەنە جە شارەکاو ئامەد، ئێلیح و وانی و ناوچە  و گەڕەکە جیاجیاکا ئا شارانە چن بەشێوە جە پارێزنامە و هۊرسەنگنایەکا رابەرو گەلوو کورڎی عەبدوڵا ئۆجالانی ۋنریێوە، بەتیابەتی مردای سەرو تیۆری گوڵی و مژارو ۋێپارێزنای کریاوە.

هەرپاسە دماو ۋەنایۆی پارێزنامەی، گفتوگۆ جەبارەو پەرسوو جەنگی تابەتی و رەهەندەکاشۆ کریا و مردای سەرو پەرسوو گۆشەگیری سەرو رابەرو گەلوو کورڎی عەبدوڵا ئۆجالانی کریا، کە ماوەو چارەکە سەدێوەن جە زیڼانو ئیمراڵینە زیڼانی کریان و ٤١ مانگێچا بە هیچ جۆرێ هەواڵش نمەزانیۆ و ئینا گۆشەگیری رەهانە و ئا گۆشەگیرییە شۆڕبیەنۆ پەی زیڼانەکا و پەی دلۍ گلێرگەیچ.