کوردا و دۆسەکێشا ۋەروودەم و کۆشکەی چەرمۍ ئەمریکاینە بۊنەو ساڵیاڎوو پیلانگێڵنیی میان نەتەوەیی سەروو ڕابەروو گەلوو کوردی عەبدوڵا ئۆجالانی چالاکی ناڕەزایشا ئەنجامدا، جە چالاکییەکەنە داواو ئازاڎیی ڕابەروو گەلوو کوردی عەبدوڵا ئۆجالانیشا کەرد.
ۋەروودەم و کۆشکەی چەرمێنە جە واشنتن و پایتەختوو ئەمریکای بۊنەو ساڵیاڎوو پیلانگێڵنیی میان نەتەوەیی سەروو ڕابەروو گەلوو کوردی عەبدوڵا ئۆجالانی چالاکی ئەنجامدریا. چالاکییەکە بە سەرمەشقایەتی (Emergency Committee for Rojava) ئەنجامدریا. جە چالاکییەکەنە ئاڵاو ڕابەروو گەلوو کوردی عەبدوڵا ئۆجالانی و لافیتەو "ئازاڎیی پۍ عەبدوڵا ئۆجالانی" بەرزکریاوە. سەرەمڕە دروشمەو "بژیۋۆ سەرۆک ئاپۆ"ی وچیاوە.
جە چالاکییەکەنە کۆمیتەو نەتەوەو ئەرمەنی جە ئەمریکا، میترۆ دی سی (میترۆ دی سی سۆسیالیست دیموکراتەکا ئەمریکا)ی و ئەنداموو کۆنگرەو نەتەوەیی کوردسانی (کەنەکە) سەعید ڕەزا دێرسیمی و چنڎین نوێنەرۍ قسێشا کەردۍ.
قسەکەرا سەرنجشا وست سەروو گۆشەگیری ئیمراڵی و دەوروو ئەمریکای جە پیلانگێڵنیەکەنە، واتشا: "ئەمریکا مەتاوۆ ۋێش چی ۋەرپرسیارییە دزۆوە. گرڎوو ئامانجوو ڕابەروو گەلوو کوردی عەبدوڵا ئۆجالانی ئاشتیا، بەڵام بە جەنگ جواب دریاوە. پیلانگێڵنییی میان نەتەوەیی هەڵای بەردەواما. ڕووۍ نیا دەوڵەتوو ئەرەگیروو تورکی هجوم نەکەرۆ سەروو هەرێمەکاو پارێزنای مەدیای و ۋەرنیشتی. ئێمە داواو ئازاڎیی ڕابەروو گەلوو کوردی عەبدوڵا ئۆجالانی کەرمۍ و داوا کەرمۍ ئەمریکا ئیتر هامکاری جەنگوو دەوڵەتوو تورکی نەکەرۆ ۋەران ۋەر بە کوردا".
چالاکییەکە بە درووشمەکا "بژیۋۆ سەرۆک ئاپۆ" و "ژەنی، ژیۋای، ئازاڎیی" و "بێ سەرۆکی ژیۋای مەبۆ" و "وڕۆ فاشیزم" دمایش پنە ئاما.
