وڵاتپارێزاو پانیشتوو کوردسانی پەشتیوانی ۋېشا پۍ هەڵمەتەو "ئازادیی پۍ عەبدوڵا ئۆجالانی، چارەسەری سیاسی پۍ پرسوو کوردی" واوەی کەراوە و ماچا: "ئازاڎیی ڕابەر ئاپۆی، ئازاڎیی گەلوو کوردین".
تا مۍ پەشتیوانییەکۍ پۍ هەڵمەتەو "ئازاڎیی پۍ عەبدوڵا ئۆجالانی، چارەسەری سیاسی پۍ پرسوو کوردی" فراوانتەر بۆ، وڵاتپارێزاو پانیشتوو کوردسانی دەربارەو گرنگی هەڵمەتەکۍ و ئازاڎیی ڕابەروو گەلوو کوردی عەبدوڵا ئۆجالانیۆ قسېشا پۍ ئاژانسوو هەواڵوو فورات (ANF)ی کەرڎۍ.
"ئێمەی گەلوو کوردی نە بڕیەیمۍ، نە ئەسڕیەیمۍ"
ئەڎاو یەرۍ گەشمەرڎا ڕاو ئازادی کوردسانی، ئەڎا کوردسان-ە سەرەنجش وست سەروو گرنگی ئازاڎیی ڕابەروو گەلوو کوردی عەبدوڵا ئۆجالانی و واتش: "پېسە ژەنېوە کوردۍ و ئەڎېوە گەشمەرڎەی پەیاموو من ئانەن حەرچی زووا ڕابەروو گەلوو کوردی، ڕابەروو ئاشتی و ئازاڎیی و ئارامی، ئازاڎ بۆ، ئازاڎیی ڕابەر ئاپۆی ئازاڎیی گەلوو کوردین و ئەگەر ڕابەر ئاپۆ ئازاڎ نەبۆ، ئێمەی گەلوو کوردی ئازاڎۍ مەبیمۍ".
ئەڎا کوردسانە ئاماژەش بە هجوومە وەحشیانەکاو دەوڵەتوو ئەرەگیری تورکی پۍ سەروو پانیشتوو کوردسانی و هەرێمەکاو گەریلای کەردوو، واتش: "دەوڵەتوو تورک کیماۋیی سەروو هەڤاڵامارە کەرۆ، ئێمەیچ نە بڕیەیمېوە نە ئەسڕیەیمۍ، ئێمەی گەلوو کوردی هەر مەنمۍ".
"چارەسەری ئەساسی ئینا لاو ڕابەر ئاپۆیۆ"
تاتەو گەشمەرڎەی، ئامانج حەمەڕەشید، واتش: "ئی کەمپینە تا ١٤ و شوباتی، بە وەڵاوکەرڎەیۆ کتێبەکاو ڕابەر ئاپۆی و کۆڕ و سیمینارەکا بەردەوام بۆ، ئێمەیچ پېسە گەلوو پانیشتی بەشدارۍ بیمۍ چی کەمپینەیە تا ئازاڎیی جەستەیی ڕابەر ئاپۆی".
حەرپاسە جە درێژەو قسەکاشەنە واتش: "بێ ڕابەر ئاپۆی پرسوو کوردی جە حیچ پارچېوە کوردسانینە چارەسەر مەکریۆ. چارەسەری سەرەکی ئینا لاو ڕابەر ئاپۆیۆ".
"پێویسا گەنجا و ژەنا بەشداری وېنیشاندای کەرا"
ژەنە چالاکۍ، ئەدیبە عەلی-ە ئاماژەش بەگرنگی هەڵوێسوو گەنجا و ژەنا ئازادیوازی کەرڎ کە بەشدارېنۍ جە وېنیشانداینە و واتش: "پېسە ژەنێوە ئازاڎۍ پۍ ئازاڎکەردەی ڕابەر ئاپۆی و ئازاڎیی گەلوو کوردی، داوکارەنا جە گەنجا و ژەنا ئازاڎیوازی بەشداری جە ۋېنیشانداینە کەرا پۍ ئازاڎیی ڕابەر ئاپۆی، پەیامم پۍ گەلوو کوردی ئانەن گرڎ وەختۍ ۋېنیشاندای کەرا تا ڕابەر ئاپۆ جە زینڎان و گۆشەگیرینە ئازاڎ بۆ".
