واتەواچەو یەژەکە-ئەی کەزەبان دۆغانە ئانەش یاڎ ئاردۆ کە بە سەرمەشقایەتی ژەنا چالاکی ١٥و نیسانی ستراسبۆرگەنە ئەنجام مڎریۆ و واتش: "تا ماڕای سیستمۇ گۆشەگیری و مسۆگەرکەردەی ئازاڎیی جەستەیی ڕابەر ئاپۆی بەردەوامۍ بیمۍ."
چوارچێوەو هەڵمەتەی میان نەتەوەی"ئازاڎیی پەی عەبدوڵا ئۆجالانی، چارەسەری پەی پرسۇ کوردی"نە چالاکی ١٥و نیسانی جە شارۇ ستراسبۆرگ و فەرەنساینە ۋەروودەم و کۆنسەو ئەوروپای و سی پی تی-نە چالاکی 'ئەرەنیشتەی' ئەنجام مڎریۆ. یووە جە ئاماڎەکاراو چالاکیەکەی واتەواچەو یۊبیەو ژەنا کوردی ئەڵمانیانە (یەژەکە-ئە) کەزەبان دۆغانە پەیوەس بە ئامانج و چالاکیەکەی پەی ئاژانسوو هەواڵوو فوراتی (ANF)ی قسێش کەردۍ.
ژەنی سەرمەشقایەتی چالاکیەکەی مکەرا
واتەواچەو وەختیەو یەژەکە-ئەی کەزبان دۆغانە ئاماژەش پانەیدا کە پەی ئانەی سەرنج وزمۍ سەرۇ گۆشەگیری ڕابەرۇ گەلۇ کوردی عەبدوڵا ئۆجالانی و داواو ئازاڎیی جەستەیی ڕابەرۇ گەلۇ کوردی بکەرمۍ، ۋەروودەم و سی پی تی نە چالاکیەکەی ئەنجام مڎەیمۍ.
کەزەبان دۆغانە واتش: "پەی مسۆگەرکەردەی ئازاڎیی جەستەی ڕابەریما، پېسە وەڵتەریچ کە سەرمەشقایەتی چالاکیەکاما کەردەن، چی چالاکیەیچەنە سەرمەشقایەتی مکەرمۍ."
کەزەبانە ئەرەیاۋناش پەی بەشداربیەیۍ بەقوەتی جە چالاکیەکەنە جە چنڎین شارۍ ئەڵمانیاینە هەرمانەی جیاوازە ئەنجام مڎریۆ و واتش: پېسە یەژەکە-ئەی جە ئەڵمانیانە بەشێوەو گروپی، دەسوەڵېوستەی و ئەنجوومەنی ۋېما ڕێکوستەن. پەی ئەنجامدای چالاکی ١٥و نیسانیچ ماوێوە فرەن ئاماڎەکاری مکەرمۍ. هەرمانەکېما جە شێوەو سەردانیکەردەو یانا، کارگەکا، دوکاندارانە دیڎارۍ ملا ڕاوە. چالاکیەکەیما ۋەروودەم و سی پی تی و کۆنسەو ئەوروپاینە ساز مکەرمۍ، کە جەگۆشەگیرینە دەورشا هەن، سیاسەتەکاشا ئاشکرا مکەرمۍ. پەی ئانەی نیشانەشا بڎەیمۍ کە یاساکاو ۋېشا پاشێل مکەرا و پەی ۋیرئاردەیۆ ئەرک و ۋەرپرسیاریەتیشا جە لادای گۆشەگیرینە، ئێمە چا بیمۍ."
کەزبان دۆغانە ئاماژەش بە ئامانجۇ چالاکیەکەی کەرد و واتش: "پېسە ژەناو کوردی جە تاراوگەنە ٢٥ ساڵېن تاکە دروشمێوەما هەنە و ماچمۍ 'ئازاڎیی ڕابەر ئاپۆی ئازاڎیی ژەنان' گۆشەگیری سەروو ڕابەر ئاپۆی گۆشەگیریچا سەرۇ ئێمۆ. ٢٥ ساڵېن داواکاریێما هەن ئاڎیچ مسۆگەرکەردەی ئازاڎیی جەستەی ڕابەریمانە. چی چالاکیەنە ویستەکا ۋېما بەربڕمۍ. داوا چا ئەرەمەرزیا بکەرمۍ کە بە پاو ئامانجەکا ۋێشا جماوە. داواشا ۋنە بکەرمۍ کە دژوو گۆشەگیری مرداوە کە جە کەسایەتی ڕابەر ئاپۆینە دژۇ تەماموو مرۆڤایەتی ئەنجام مڎریۆ. تا پارچەکەردەی گۆشەگیری ئیمراڵی و مسۆگەرکەردەی ئازاڎیی جەستەیی ڕابەر ئاپۆی بەردەوامۍ بیمۍ. پی چالاکیەیە جارێوەتەر نیشانەش مڎەیمېوە کە ڕابەر ئاپۆ ئیراڎەو ئێمەن."
