وەڵوەچ یام وەڵگیٛرو”هوٙر: ور”ی زوانو هەورامینە فرە چالاکەن و مەلوٙنە سەرو چەمە سادەکان، مەکەروٙنشان بە چەمەی ئەرەتاشیا، چەنی ئانەیچ ماناکیٛشان مەفاڕوٙ، وەرو ئانەی چی باسەنە هەتا پەیمان بکریوٙ ئا چەمان مەنویسمیٛ هەکە وەڵوەچو هوٙری مەلکوٙشان پوٙرە، چەنی ماناکەرڎەیشان ڕوٙشن مەکەرووە، پاسە بزانو بە پاو دەگا و ناوچە و لەهجەکانو هەورامانی ئی چەمیٛ هەکە هوٙر مەلکوٙشان پوٙرە فەرق مەکەران، هەریاگیٛونە بە جوٙریٛوەن، ڕەنگا من نەتاوٛابوٙم گردو چەمەکان چیٛگەنە کوٙگام کەردیٛبان، چنڎ سەرنجێوی تەریچ ئانەن کە دەنگو(هوٙر: مەفاڕیوٙ پەی: ور) ئینە بەخاترەو ئاسان درکناین، دلیٛ زنگنەو باجەلانیچنە هەر(ور) مەواچان، زوان هەمیشە هەوڵیٛ مەڎوٙ پەی ئاسان بیەی. هەرپاسە زوانو گوران- هەورامینە  وەڵوەچەکیٛ پیٛسەو دماوەچەکان هەرمانە مەکەرانیٛ، یانی بەئاسانی وەرو پەشت مەکەران بیٛ ئانەی ماناو چەمەکەی بفاڕیوٙنە،  وەلێم هوٙر نمەلوٙنە دماو چەمەی، مەلوٙنە سەرو بڕێ واتان، پیٛسەو نامیٛ و یاوەرکەردەوەی، یانی هەم وەڵگیٛرەن هەم دماگیٛرەن، وەلێم ئی خاسیەتە خەریکەن کاڵ بیەنوە تەنیا هەورامانو تەختی دەگاکیٛ دەورو پەشتیش و بڕێ کەسیٛ پیریٛ پەنەش مەدوان، ئەگەر سەرنجە بڎەیمیٛ وەڵگیٛر و دماگیٛر زوانو گوٙرانینە هیچشان ئەو زوانو فارسی و کوردی و زوانەبراکانی تەریش نمشانیٛ، گرنگیێ تەرو وەڵگیٛری ئانەن چەمەی سادە مەکەروٙ بە ئەرەتاشیا و ماناکیٛش تەمام مەفاڕوٙنە، وەرپانە و فراوانەش مەکەروٙنە، یانی متاومیٛ بواچمیٛ مەکەروٙنەش بە ئیدیەم idiom، شوٙنیەرە ئی وەڵوەچە مەشوٙ بلکوٙ گردو چەمەکانرە، وەلێم ئیسە تەنیا بڕێ چەمیٛما هەنیٛ کە سەرشانوە بەکار مەیوٙنە، ئەکید وەرو بەکار ناوردەیشان، ئیتر سەرو زوانیوە بەکار ئاوردەیشان نەمەنەن. باسو وەڵوەچ و دماوەچو هوٙری ڕەنگا ویٛش تاق کتیٛبێش سەر بنویسیوٙ، وەلێم من چیٛگەنە کوڵم کەردەنوە، ئەوی تەرش سەرو جوٙیاکارەکانەن. دماجار گلکە مەکیٛشنو پەی دماگیٛرو”هوٙر”ی، سەرنجە مڎەیمیٛ نمەلوٙنە سەرو چەمەی، وەلێم مەوینمیٛ مەلوٙنە دماو نامیٛوە، ئینە بوٙنەو فاڕیای زوانین، چون گرد وەڵگیر و دماگیرەکان مەلانیٛ سەرو چەمەی. ئیسە هەورامانو تەختی و ژیواری و بڕێ دەگایانی تەری بەکار مەیوٙ، وەلێم دەگاییٛ تەرنە بەکار ئاوردەیش کاڵ بیەنوە، پیٛسەو جادەهوٙر بلمیٛ، دەگاهوٙر بلمیٛ، فکرێ ئاما سەرم هوٙر، قسیٛم دڵ هوٙر مێ، بلمیٛ یاگەهوٙر گیٛڵمیٛ، لوە سەرهوٙر، ویرێ ئاما سەرەم هوٙر، هوٙر پیٛسەو دماگیری ئەچیٛگەنە هەمان ماناو جمای وارۆ پەی سەرین. دڵنیانان کە ویەردەنە گردو چەمەکان وەڵگیر و دماگیرو هوٙریشان بیەن، وەلێم بە لوای کاتی نەمەنەن. بفەرماودیٛ چەنی باسەکەی.

کەوتەی: هوٙرکەوتەی، هوٙرگنای: هەورامان دلیٛ کەشانە هوٙرکەوتەن، پیرشالیار پیایێ هوٙرکەوتەو هەورامانی بیەن، ولی سەوروٙگانە هوٙرمەگنوٙ، فرستێوی خاسم پەی هوٙرکەوت، پام هوٙرکەوت خەریک بیٛ بگلیٛرو، دڵم هوٙرکەوتەن چەنەت، فرسەتی چیمنە هوٙرنمەگنوٙوە.
2.       گوٙزتەی: هوٙرگوزتەی، هوٙرگوٙزای، هوٙرگوٙزیای: ئاوهوٙرگوٙزتەی، ئاوی هوٙرگوٙزای گوٙزوٙ، فرە هوٙرگوٙزیای( هانێونە ئاوی هوٙرگوٙزی تەوەنیش مەوزەنە).
متەی: هوٙرمتەی، هوٙرمجای، هوٙرمجیای: گەنم هوٙرمتەی، گەنمەکا هوٙرمجای مجوٙ، دیٛرهوٙرمجیای، داخەو دڵی هوٙرمتەی. هوٙرمجای مجو.
وەزتەی: وەستەی: هوٙروەزتەی، هوٙروەزای، هوٙروەزنای: هوٙروەزتەیو وەزیٛ و تفیٛ و چناری زاتش گەرەکەن، هوٙروەزای وەزوو، کەسیٛوە هوٙربوەزنە تفەکیٛ، هوٙروەستەی سەرو بانی، هوٙروەستەی پەی سەروکەپریٛ، پەی دلیٛ ماشیٛنی، بە پەیجە هوٙروەست، پلەکانەکانە هوٙروەزای وەزوٙ.
کیٛشتەی: هوٙرکیٛشتەی، هوٙرکیٛشای، هوٙرکیٛشیای: درەخت هوٙرکیٛشتەی، شەتڵ هوٙرکیٛشتەی، هوٙرکیٛشای کیٛشوٙ، دیٛرهوٙرکیٛشیای، ئاوی هوٙرکیٛشە سەر دلیٛ بیرەکیٛنە، پانتوٙڵ هوٙرکیٛشتەی، ویٛ هوٙرکیٛشتەی، ڕیٛخەنە هوٙرکیٛشتەی. هوٙرکیٛشتەی مەکیٛشوٙ، هوٙرکیٛشای مەکیٛشوٙ. هوٙرمەکیٛشای مەکیٛشوٙ.
شیٛلتەی: هوٙرشیٛلتەی، هوٙرشیٛلای، هوٙرشیٛلیای: هەڕەهوٙرشیٛلتەی، هوٙرشیٛلای شیٛلوٙ، فرە هوٙرشیٛلیای، هەڕەی نیمەسمەرە هوٙرشیٛلتەی، هەمیرهوٙرشیٛلتەی.
گیٛرتەی: هوٙرگیٛرتەی، هوٙرگیٛرای، هوٙرگیریای: زەمین هوٙرگیٛرتەی، پارچیٛوی زەمینش هوٙرگیٛرتەن، زانکوٙنە هوٙرگیٛریای، کوٙڵ هوٙرگیٛرتەی، زەڕهوٙرگیٛرتەی، ژمارە هوٙرگیٛرتەی، هوٙرگیٛرای گیٛروٙ،  ژەن هوٙرگیٛرتەی”هورگیریای”. سەرە هوٙرگیٛرتەی. سەرەو ویٛش هوٙرگیٛرتەن، پاهوٙرگیٛرتەی، پاهورگیٛرە دیٛرما پەنە بیەن، دەس هوٙرگیٛرتەی، سات چنڎ دەس هوٙرگیٛرمیٛ جە هەرمانیٛ.
پاتەی: هوٙرپاتەی، هوٙرپاچای، هوٙرپاچیای: درەخت هوٙرپاتەی، قژ هوٙرپاتەی، کاوڕی هوٙرپاچیا، نەرەکەی هوٙرپاچای پاچوٙ.
وەتەی: وەژای، وژنای، وژیای: هوروژنای: بەرە هوروژنای، گیٛجەنیٛ بەرەکەیم هوٙروژنا.
وریٛژنای: هوٙروریٛژنای: تاوەو وارانەکەی هوٙرش وریٛژنا، یانی مدراوە، هەورەکە هوٙرش وریٛژنا، ئاسمان ساماڵ بی، ئی چەمە بەکار ئاوردەیش فرە کەمەن هەر ئیٛنڎەش چەنە بەرکەوتەن.
کڵاشتەی: هوٙرکڵاشتەی، هوٙرکڵاشای، هوٙرکڵاشیای: دارهوٙرکڵاشتەی، زەمین هوٙرکڵاشتەی، کاسەی هوٙرکڵاشیا، هوٙرکڵاشای کڵاشوٙ. دارو کەکەوەکیٛش هوٙرکڵاشتەن و کاسێوە ئاو و دوٙیش وەشکەردەن.
وراستەی: هوٙروراستەی، هوٙرورازای، هوٙرورازیای: خەرارهوٙروراستەی، خەراری هوٙرورازیا، هوٙرورازای ورازوٙ ، دەمو گوننی هوروراستەی.
13.   بەستەی: هوٙربەستەی، هوٙربەسای، هوٙربەسیای: دروٙهوٙربەستەی، منارەهوٙربەستەی، یاگیٛنە هوٙربەسیای، کیٛلەکیٛ هوٙربەسای بەسوٙ، درویٛش پەی هوٙربەستەن.
14.   وستەی: هوٙروستەی، هوٙروزای، هوٙروزیای: مەکینەکەی هوٙروزای وزوٙ، مەکینەی هوٙروزیا، مەکینە هوٙروستەی.
ئیٛستەی: هوٙرئیٛستەی، هوٙرئیٛزای، هوٙرئیٛزنای، هوٙرئیٛزیای: زووهوٙرئیٛستەی، هوٙرمئیزای مئیٛزوٙ، مریچڵە هوٙرئیٛزنای، وەرمەنە هوٙرئیٛزنای، باڵەپڕ هوٙرئیٛستەی.
پیٛتەی: هوٙرپیٛتەی، هوٙرپیٛچای، هوٙرپیٛچنای، هوٙرپیٛچیای: گوٙپیتە هوٙرپیٛتەی، هەراڵە هوٙرپیٛتەی، هوٙرپیٛچای پیٛچوٙ، هەراڵە هوٙرپیٛچنای، ساوەکیٛ هەراڵەکەش هوٙرپیٛتەن.
17.   نیشتەی: هوٙرنیشتەی، هوٙرنیشای، هوٙرنیشنای: باڵدار هوٙرنیشتەی سەرو لەقو تفیٛوە، هوٙرنیشای نیشوٙ.
18.   لوشتەی: هوٙرلوشتەی، هوٙرلوشای، هوٙرلوشنای، هوٙرلوشیای: ئاوهوٙرلوشتەی، نەوت هوٙرلوشای، هوٙرلوشای لوشوٙ.
19.   کەندەی: هوٙرکەندەی، هوٙرکەنای، هوٙرکنیای: یاگیٛنە هوٙرکنیای، درەخت ڕیٛخەنە هوٙرکەندەی، هوٙرکەنای کەنوٙ، وەتەن هوٙرکنیای.
20.   کەرڎەی: هوٙرکەرڎەی، هوٙرکەرای، هوٙرکریای: قول هوٙرکەرڎەی، قوٙڵ هوٙرکەرڎەی، ئاو هوٙرکەرڎەی، واگژە هوٙرکەرڎەی: ئاوەکیٛ هوٙرکەرای کەرو، قولیٛ هوٙرکەرای کەرو، سیاواکە هورشکەرد، قوٙڵش هوٙرکریابیٛ، یاگەکیٛش هوٙرم کەردیٛنە” یانی مزانو ئینا چکوٙنە”، گل هوٙرکەرڎەی، ڕەنگاوڕیٛس هوٙرکەرڎەی، بەن هوٙرکەرڎەی، بوٙهوٙرکەرڎەی، بوەش هوٙرکەردیٛنە،
ئاوردەی: هوٙرئاوردەی، هوٙرئارای: بزڵەکان هوٙرمارای مارو، وەرەکا هوٙربارە دلیٛ گەلەکەینە، قوماشەکەی هوٙربئارە، گجیەکەم هوٙرئاورد، هوٙرئاردەیوە، واردەکەم هوٙرئاردۆ، مەتەڵەکیٛم هوٙرئاردە، کەرگەکیٛ هێڵەکیٛش هوٙرئاردیٛ، (هورئاردەی: هوٙرئامای).
22.   ئەسپەردەی: هوٙرسپەردەی، هوٙرسپارای، هوٙرسپارنای، هوٙرسپاریای: دارەکەم هوٙرسپەرد، تفەنگەکەم هوٙرسپارنا، هوٙرسپاریابیٛ .
23.   شیەی: هوٙرشیەی، هوٙرشای، هوٙرشیای: شوٙت هوٙرشیەی، شوٙتەکە هوٙرمشای مشوٙ، شوٙتەکە هوٙرشیەبیٛ. هوٙرمشای مشوٙ.
24.   بیەی: هوٙربیەی: یانی توڕە بیەی: فڵانەکەس هوٙربیەبیٛ بە دەکەسیٛ نەگیرییٛ، پەی تەشکەکانی تەری ناڕەحەت مەی سەرو زوانی، کابرا هەر پاسنەن هوٙربای بوٙ.
25.   دڕیەی: هوٙردڕیەی، هوٙردڕای، هوٙردڕنای، هوٙردڕیای: تەقەڵ هوٙردڕیەی، تەقەڵەکان هوٙردڕای  دڕوٙوە، تەقەڵ و جل هوٙردڕیای، بەرەو گوننی هوٙردڕیەی، خەرار هوٙردڕیای، بەرەوقسا هوردڕیەی، زەمین هوٙردڕیەی، هەوریٛشە زەمین هوردڕۆ پەی هیلیانیٛ. قوماشەکەم هوٙردڕناوە.
26.   ڕنیەی: هوٙرڕنیەی، هوٙرڕنای، هوٙرڕنیای: باخەکە هوٙرڕنیا، باخ هوٙرڕنیەی، هەنارهوٙرڕنیەی، هەنارەکان هوٙرڕنای ڕنوٙ .
بڕیەی: بڕیٛ یاگیٛ هەورامانی مەواچان هوٙربڕیەی، هوٙربڕنای، دزەکەم هوٙربڕنا، یانی یاگیٛ ویٛشەنە ڕەمنام، یام سەرم هوٙربڕنا کابرام دی، هام ماناو هەڵبڕین و سورانین، لاو ئیٛمە بەکار نمەیوٙ.
28.   چنیەی: هوٙرچنیەی، هوٙرچنای، هوٙرچنیای: هوٙروچنای، لەهجەو تەویٛڵیٛو چنڎ دەگیٛوە دەوریشنە بەکارمەیو، کەڵەک هوٙرچنیەی، ساوی هوٙرچنای چنوٙ، دیواری بە دیمەک هوٙرچنیا، ساوە لاسورەکا هوٙربچنە، کەسیٛوە خاس هوٙربچنە پەی دەمڕاسو دەگای، پەتڵەکەی هوٙروچنە.
نیای: هوٙرنیای، هوٙرنیای یانی هاندای، کابراش هوٙرنیان تا بلوٙ گژیٛشرە.
30.   ئامای: هوٙرئامای: ڕوٙجیارهوٙرئامای، هیٛڵە هوٙرئامای، هەمیرهوٙرئامای، چیٛروپای هوٙرئامای، هوٙرئامایوە، سمورەکە هوٙرمێوە، ئنڎە هوٙرئاماوە مانیا، دڵم هوٙرئاماوە(ڕشیاوە).
31.   لوای: هوٙرلوای: لاولاوەکە هوٙرلوان دیوارەکەرە.
32.   ویارای: هوٙرویارای: قوڵپچەکەی هوٙرویارە، یەخە هوٙرویارای.
33.   ناوای: هوٙرناوای: یانی چەرب کەرڎەی، بە مەڵهەم مازیت هوٙرناوان .
34.   فشارای، وشارای: هوٙرفشارای: هەنارهوٙرفشارای، هوٙر وشارای، جل هوٙروشارای .
35.   ترەکای: هوٙرترەکای، هوٙرترەکنای: خواو ئیٛمە هوٙرترەکا، خوای هوٙرترەکنا ” تەمڵیٛ ئاردش بارش مەکی  یاخوڎا تەمڵیٛ هوٙرترەکی ” دا بنیشەرە هوٙرترەکی” .
36.   ماسای: هوٙرماسای، هوٙرماسنای: لەم هوٙرماسای، گوپ هوٙرماسنای.
37.   مدرای، مردای: هوٙرمدرای، هوٙرمدرنای، هوٙرمردای: بەرەو وەنگاکەینە هوٙرمدرابیٛ، هەرمانبەر هوٙرمدرنای. هورمردان ئاوەکیٛرە، نوٙبە ئاوشەن. پاوە مەواچان مندرای، یارسان و شەبەک و باجەلانیچ مەواچان مندرای.
38.   گیٛڵای: هوٙرگیٛڵای، هوٙرگیٛڵنای: ڕەگومازی هوٙرگیٛڵای،  هوٙرگیٛڵای ماناش فرێنە، ڕەگو مازی هوٙرمەگیٛڵوٙ، ڕەنگەش هوٙرگیٛڵا، یانی ڕەنگەش فاڕیا، هورگیٛڵانوە یانی حەرام گیٛڵان، تامش خراپیان. نویستەی هوٙرگیٛڵنای، هوٙرئەوە گیٛڵای:  وەرگەکە هوٙرئەوە گیٛڵاوە پەی مەیەکیٛ، ڕازەکیٛش هوٙرگیٛڵنا پەی زوانو هەورامی.
39.   پڕای: هوٙرپڕای، هوٙرپڕنای: زەماونڎەنە هوٙرپڕای، زاڕوٙڵە هوٙرپڕنای(پاوە ماچا هوٙرپڕکیٛ، وەلێم ئینە نامیٛنە، پیٛسەو چەمەی هەرمانە نمەبەروٙنە).
40.   گڕای: هوٙرگڕای، هوٙرگڕنای: ئایرهوٙرگڕای، ئایرهوٙرگڕنای، ئاشوب هوٙرگڕنای. 
41.    بینای: هوٙربینای، هوٙربینیای: درویٛ هوٙربینای، تاریخ هوٙربینای.
ماڵای: هوٙرماڵای، هوٙرماڵیای: هەورهورماڵای، هەورهوٙرماڵیای، لەم هوٙرماڵای، ڕووهوٙرماڵای، قوٙڵ هوٙرماڵای.
کوای: هوٙرکوای، هورکوای سەر، یانی تەپش پیٛکا سەر .
44.   دای: هوٙردای، هوٙردریای: توٙپ هوٙردای، خەیمەهوٙردای، چەترهوٙردای، قولین هوٙردای(گرەوای بەکوڵ)، قولاپ هوٙردای، تەوەن هوٙردای، مەتەڵ هوٙردای، گوٙل هوٙردای، لنگ هوٙردای، توٙکڵ هوٙردای، توٙک هوٙردای، نوٙشابە هوٙردای(هوودای).
45.   نیای: هوٙرنیای، هوٙرنریای: هوٙرنیای یانی هاندای: هامڕا هوٙرنیای، خەڵک هوٙرنریای.
46.   شانای: هوٙرشانای، هوٙرشنیای: جوزلیٛ هوٙرشانای، لەقە هوٙرشانای، نەخشە هوٙرشانای، یانەهوٙرشانای، پلان هوٙرشنیای، زەمین هوٙرشنیای.
47.   دارای: هوٙردارای، هوٙردارنای، هوٙرداریای: کوڕهوٙردارای، یوٙ هوٙردارنای، کەشوٙ هوٙرداریای، سەرە هوٙردارای(سەرەبەرزکەردیوە). هوٙرداردەی.
48.   پیٛکای: هوٙرپیٛکای: قوڵپچە هوٙرپیٛکای، یەخە هوٙرپیٛکای: هوٙرویارای
49.   تەقای: هوٙرتەقای، هوٙرتەقنای، هوٙرتەقیای: هەلچی هوٙرتەقای، هوٙرتەقنای، تەقەڵ هوٙرتەقنایوە.
50.   خزای: هوٙرخزای، هوٙرخزنای، هوٙرخزیای: قاچ هوٙرخزای، چڵوٙسک هوٙرخزنای، ویٛ هوٙرخزنای سەرۆ، قاچ هوٙرخزیای .
51.   ئیژنای: هوٙرئیٛژنای، هوٙرئیٛژیای: یانی کیٛشیایرە: هورئیٛژیای، کەپرەکیٛنە هوٙرئیٛژیان.
52.   ویٛڵنای: هوٙرویٛڵنای، هوٙرویٛڵیای: ماشین هوٙرویٛڵیای، نان هوٙرویٛڵنای، کیٛلانیٛ هوٙرویٛڵنای، کەواو پانتوٙڵ هوٙرویٛڵنای “وەڵاو دیم کەرڎەی”، شەلەمین هوٙرویٛڵنای.
53.   تلنای،تلیای: هورتلنای، هوٙرتلیای: بەونیوە هوٙرتلیای، دەمیٛو ژەرەژی مەکوشیوٙ بە ونەو وێشەو هوٙرمەتلیوٙ .
54.   شیٛونای: هوٙرشیٛونای، هوٙرشیٛویای: یانی تیٛکەڵ کەرڎەی: چاشت هوٙرشیٛونای، هوٙرشیٛویای
شڵیٛونای: هوٙرشڵیٛونای، هوٙرشڵیٛویای، هام ماناو شیٛونای.
خیٛزای، خیٛزنای، خیٛزیای: هوٙرخیٛزیای”ڕاپەڕین ” هوٙرخیٛزنای .
وشکنای: هوٙروشکنای، هوٙروشکیای: هوٙروشکنای ماناو پەیجوری و جوٙیای مڎوٙ .
سوڕنای: هوٙرسوڕنای، هوٙسوڕیای: یانی چالاکیو فرە جوڵیای، سەیرا دینارێ هورسوڕیوٙ پەی کوٙکا ” یانی خوا یاونوٙش هەرمانێوە کەرو و بەشو کوٙکاکوٙلایوە پەیڎا بکەروو ” شاهوٙ هەرمانبەرێیٛوی هوٙرسوڕیان”
59.   تاونای: هوٙرتاونای، هوٙرتاویای: “میتابۆلیزم “metabolism  ” زینڎە چالاکی لاشەی پەی تاونای و هەزم کەرڎەی واردەی.
60.   چەرخنای: هوٙرجەرخنای، هوٙرچەرخیای: زەمانە هوٙرچەرخیای.
61.   تلورنای: هوٙرتلورنای، هوٙرتلوریای: کەشۆ هوٙرتلوریای، یانی تل واردەی.
62.   کزنای: هوٙرکزنای، هوٙرکزیای: گوٙشت هوٙرکزنای، گوٙشتی هوٙرکزیا.
63.   کڕنای: هوٙرکڕنای، هوٙرکڕیای: یانی چیٛوێت دەس بگنوٙ: خەڵاتیٛوەم هوٙرکڕنا.
64.   پڕوسقنای: هوٙرپڕوسقنای، هوٙرپڕوسقیای: گەڵا وٛڵ هوٙرپڕوسقنای، شوٙتەکە هوٙرپڕوسقیان.
65.   تەکنای: هوٙرتەکنای، هوٙرتەکیای: بان هوٙرتەکنای، کوٙڵ هوٙرتەکنای، نمەڎ هوٙرتەکنای، قاڵیە هوٙرتەکنای، قلیچکە هوٙرتەکنای، بەڎەن هوٙرتەکیای ((سایەقەی دووری هوٙرتەکنا[1] ئەعزام  دەخیلم ساقی جەمین ئایر فام )) .
66.   گیسنای: هوٙرگیسنای، هوٙرگیسیای: جەنگ هوٙرگیسنای، ئایرهوٙرگیسیای.(گریسنای)، ژاوەروٙنە مەواچان گریسنای، هەرپاسە دەگاو خەرپانی لاو ویٛچما ئەپاسە مەواچان.
67.   پڕوزنای: هوٙرپڕوزنای، هوٙرپڕوزیای: سەرەو پا هوٙرپڕوزنای، قژیٛ هوٙرپڕوزیای. گوڵەپڕوزە.
68.   قوٙڕنای: هوٙرقوٙڕنای، هوٙرقوٙڕیای: ئاو و دوٙ هوٙرقوٙڕنای، ماشڵەین هوٙرقوٙڕنای، شەلەمین هوٙرقوٙڕنای .
69.   چوٙڕنای: هوٙرچوٙڕنای، هوٙرچوٙڕیای: ئاوەو جامڵەلەکەی م هوٙرچوٙڕنا، یانی تکش چەنە نەمەنە.
70.   فلیٛقنای: هوٙرفلیٛقنای، هوٙرفلیٛقیای: بایجان هوٙرفلیٛقنای پەی ڕب گیٛرتەی.
71.   قوٙڵتنای: هوٙرقوڵتنای، هوٙرقوٙڵتیای: ئاوهوٙرقوٙڵتیای، هانەهوٙرقوٙڵتنای، هوٙرقوڵیای.
72.   قڵیشنای: هوٙرقڵیشنای، هوٙرقڵیشیای: هیٛزم هوٙرقڵیشنای، قوٙتەرە هوٙرقڵیشنای.
73.   تڵیشنای: هوٙرتڵیشنای، هوٙرتڵیشیای: لنگا و لنگ هوٙرتڵیشیای، خەرارهوٙرتڵیشنای.
74.   قرچنای: هوٙرقرچنای، هوٙرقرچیای: ڕوەن هوٙرقرچنای پەی سەرو پڵاوی .
75.   دەمنای: هوٙردەمنای: تەماکوٙ هوٙردەمنای، یانی پاککەرڎەی، دشتەکەی جیا بکەریوە، وردەکەش مەمانوٙوە .
76.   جوزنای: هوٙرجوزنای: هەرکە هوٙرش جوزنا، یانی نەما قلیچکە وادای و لەق هوٙرشانای و  ڕەما و لوا .
77.   سەنگنای: هوٙرسەنگنای: یانی قیمەت نیایرە پەی چیٛوێوە جە مەژگو ویٛتەنە، ئایا تا چنڎە خاسا یام خراپا .
78.   تووتیای: هوٙرتووتیای: هوٙرتووتیان دەمشەرە “یانی وەختیٛو کەسیٛو قسیٛ مەکەروٙ یام نان مەوەروٙ، یوٙتەر وارۆ مڎیٛوٙ دەمشەرە، حەزش جە نان واردەکەیشا، یام گوٙشەقوڵاخو قسەکانشان ” ئینە پەنەش مەواچان هوٙرتووتیای”.
قونیای: هوٙرقونیای: وەختیٛ زاڕوٙڵیٛوٙ بەهانیٛ مەگیٛروٙ، سمکوٙڵانی مەکەروٙ و هوٙرقونیوٙ، یام کەرگی سەرەبڕی هوٙرمەقونیوٙ .
80.   زڵەپەتیای: هوٙرزڵەپەتیای: وەختیٛو وەرمەنە چڵاکیەیرە لچت هوٙرزڵەپەتیوٙ و بلوٙقی مەکەروٙ.
خڵتیای: هوٙرخڵتیای: دەمارو مازیش هوٙرخڵتیای، زەنگوٙڵش هوٙرخڵتیان، چیٛوێ چەربو  سفت بوٙ ن دەستۆ “دەسەنە هورخلتیای”. هوٙرخزوٙ و هوٙرگیٛڵوٙ.
بڵوٙقیای: هوٙربڵوٙقیای، هوٙربڵوقنای: ناکاوێنە کەسێوە بچڵاکیوٙرە ماچی هوربڵوقیا، پیٛسە بلوٙقیٛ کە ئاویش مزوٙنەو بەرزە مەبوٙوە جە پوٙسی.
بزرقیای: بزرقنای، بزرقیای: هوربزرقیای، هوٙربزرقنای: شوٙتەکە هوٙربزرقیان، سیراجەکیٛ هوٙربزرقیێنە
هورکورکنای، هورکورکیای: ئانزانەکە هورکروکیا، یانی ناکاوێنە چڵاکیورە، خەبەرێوە بژنەووٙ، بە ئاگا مێوە، یانی قوتەش کەرد.
شڵەپنای: دەنگو شڵەپەشڵپی، هوٙرشڵەپنای، یانی بەرزش مەکەریوە شڵپ مەکویشەرە واری.
تەقای: هوٙرتەقای: یانی چیٛرو زەمینەن سەرە بەرئاوردەی پیٛسەو هەلچیٛ چیٛرو خاکیەن، هوٙر مەتەقوٙنە..
87.   تڕای: هوٙرتڕنای: مەواچوٙ خاسش هوٙرتڕنان.
ڕوشکنای: هوٙرڕوشکنای: یانی هەرمانێت کەردێ بوٙ، پەشیمان بیوە چەنەش، هەم  بلیوە بنەڕاوە دەسش پەنە بکەریوە، یام پوزەوانیٛ بچنی، بەدڵت نەبوٙ، مەواچی با هورشان بڕوشکنوە، هەم دەس پەنە بکەروە.

سەرچەمە/ بەرگی دووەمو ڕازوانو هەورامی، نویسا: د. ناجح گوڵپی 2020
هەورامان نێت
نویسا: د. ناجح گوڵپی