هامسەرۊکەو تەڤ-دەمی ڕوکەن ئەحمەدە، ناڕەزایەتیی وێش وەراوەروو هجوومەکاو دەوڵەتوو تورکی ئەرەگیری نیشانە دا و واتش: " مشۊم زیاتەر جە جارا پا گێرمێرە سەروو مدرامانی و خاوەنداری کەرمۍ جە ئازادی و خاکیما".
ڕوکەن ئەحمەدە واتش: "مشۊم گەلەکەما مدرامانوو ڕابەر ئاپۊی و زیندانییاو زیندانەکاو دەوڵەتوو تورکی پەی وێش کەرۊ بە نموونە و ڕیزەکاو مدرامانی قەوەت کەرۊ. مشۊم ئێمە بە تووڕەییما هجوومەکاو دەوڵەتوو تورکی ئەرەگیری پووچەڵۍ کەرمێوە. دەوڵەتوو تورکی پا گێرۊرە سەروو کۊچبەرکەرڎەی خەڵکوو مەنتێقەکەی و مشۊ ئێمەیچ پا گێرمێرە سەروو مدرامانی و خاوەندارییەتی پەی خۊڵقنای ندنی ژیواێوە ئازادی مەنتێقەکەنە".
ڕوکەن ئەحمەدە، هامسەرۊکەو تەڤگەروو گلێرگەی دیمۊکراتیک (تەڤ-دەم)ی، سەبارەت بە هجوومەکاو سوپاو تورکی ئەرەگیری سەروو ئیدارەی وێمانەو سەرنیشت و وەرکەوتوو سوریای پەی ANF قسێش کەرڎێ.
ڕوکەن ئەحمەدە واتش، کە دەوڵەتوو تورکی ئێساڵ فرەو جارا هجوومش کەرڎەن سەروو چێرخانوو سەرنیشت و وەرکەوتوو سوریای و واتش: "دەوڵەتوو تورکی ئا یاگا کەرۊ ئامانج، کە خزمەتگوزارییشا وەڵێکەوتەن. ئیدارەی وێمانەو سەرنیشت و وەرکەوتوو سوریای سەرەڕاو گەمارۊی و دەرفەتە کەمەکاشا تاواناشا مەنتێقەکەی ژووژناوە و خزمەتگوزاری پەی ژیوای خەڵکی مسۊگەر کەرا، وەلۍ دەوڵەتوو تورکی تەحەمولوو ئینەیە مەکەرۊ و چەمش پا ئیدارەیە ورنمێ. ئینەیچە بێتەحەمولی دەوڵەتوو تورکی جە پەیمانەی کۊمەڵایەتییەنە نیشانە مدۊ".
'گەرەکشانە گەلەکەیما کۊچبەر کەرا'
ڕوکەن ئەحمەدە سەبارەت بە ئامانجوو دەوڵەتی ئەرەگیروو تورکی واتش: "ئامانجە سەرەکییەکاو دەوڵەتوو تورکی بەئامانجگێرتەی چێرخانوو مونتێقەکەی و کۊچبەرکەرڎەی گەلین. ئا یاگۍ کە بۊردومانۍ کریێنۍ، ناوەندوو ڕێکوستەی و ئەرەمەرزیا مەدەنییەکاو مەنتێقەکەینێ. خەڵک چا یاگانە خەبات کەرا، هەرپاسە ئا یاگێنۍ کە خەڵک و واتەنشا ئەگەر هیچ نەمەن وەرمۍ خاکەکەیما وەرمۍ و جیاش نمازمێ. دەوڵەتوو تورکی وەراوەروو پاگێریی خەڵکینە تەحەموڵش نەمەنەن. گەرەکشا ڕووبەروو گەلێوە تەسلیمکریا و مەڕیای بۊوە، وەلۍ گەلەکەما ڕۊبەڕۊ مدرامانیش گەورەتر کەرۊ. هەرپاسە بەشداربییەی خەڵکوو سەرنیشت و وەرکەوتوو سوریای جە هەنگامەو "ئازادیی پەی عەبدوڵڵا ئۊجالانی و چارەسەری سیاسی پەی کێشەو گەلوو کورد"ینە بە چالاکانە دەوڵەتوو تورکیش هەراسان کەرڎەن.
"ئامانجگێرتەی خەڵکی سڤیلی نیشانۍ بێچارەیینە"
ڕوکەن ئەحمەدە واتش، کە خەڵکی سڤیل کریا ئامانج، "بە ئامانجگێرتەی خەڵکی مەدەنیی، بێچارەیی دەوڵەتوو تورکی نیشانە مدۊ. گەریلاکاو ئازادیی کوردستانی سەرەڕاو بارودۊخی سەختوو زمسانی چالاکیی نایابشا مەنتێقەکاو پارێزنای میدیاینە کەرد. پی چالاکییە پەشتیوانییشا چا مدرامانەیە کەرد، کە بە سەرمەشقایەتیی ڕابەر ئاپۊی ئیمراڵیینە کریۊ. بەڕێوەدەچێت. دەوڵەتوو تورکی بۊنەو شکستەکاشۊ وەراوەروو کۊشەراو تەڤگەروو ئازادیی کوردستانیوە، چێرخانوو مەنتێقەکەی و خەڵکی سڤیلی کەرۊ ئامانج".
"خاوەنداری کەرمۍ وەنەو خاک و ئازادیی وێما"
ڕوکەن ئەحمەدە هجوومەکاو دەوڵەتوو تورکیش پەی سەروو گەلی شەرمەزارۍ کەرڎۍ و دماییش بە قسەکاش پێسە ئارد: "مشۊم گەلەکەما مدرامانوو ڕابەر ئاپۊی و مدرامانوو زیندانییاو زیندانەکاو تورکیای پەی وێش بە نموونە ورگێرۊ و ڕیزەکاو مدرامانی قەوەت کەرۊ. مشۊم ئێمە بە چالاکی و کۊشیایما و مدرامانما ئازادیی جەستەیی ڕابەر ئاپۊی بەدەس بارمێ. مشۊم ئێمە دژوو هجوومەکاو دەوڵەتوو تورکی بەیمۍ مەیدانەکا و بە تووڕەییما هجوومەکاو دەوڵەتوو تورکی دلێنە بەرمێ. مشۊم گەلەکەما بەروو وەڵاتی و دۊسایچما ئانەیە خاس بزانا کە ئی هجووما پەی ماڕای ئیرادەو گەلەکەیمانێ. دەوڵەتوو تورکی پا گێرۊرە سەروو کۊچبەرکەرڎەی گەلی یاگەکاو وێشانە. مشۊم ئێمەیچ پەی ژیواێوە ئازادی وەڵاتێوە ئازادنە پا گێرمێرە و مدرامانمانیما قەوەت کەرمێ".
