بۆنەو جەژنۊو قوربانیوە عومەر ئۆجالان برازاو ڕابەر ئاپۆی و پەرلەمانتارو ڕحاو دەم پارتی چنی عەلی ئۆجالانی مەتیەزایش و دووە کناچەکاش کە مەکەرۆ نەوۍ فاتیمە ئۆجالانې، سەرشا ۋنەو ڕابەر ئاپۆی دا. جە بارەو دیدارەکەیۆ عومەر ئۆجالان پەی ئاژانسو هەواڵو فوراتی (ANF)ی قسێش کەردۍ و واتش: "سەرۆک مەعنێوە جیاوازە مڎۊ بە دەم پارتی، هەرپاسە فرە بە ئەهمیەتۆ تەماشەو ئا کۆمیسۆنەیە مەکەرۆ کە قەرارا جە پەڕلەمانەنە وەش بکریۆ."

'سەرۆک فرە بە مۆراڵ بۍ، قەڵەمێوەش پێشکەش بە من و زاوڵەکا کەرڎ'

عومەر ئۆجالان باسش چانەی کەرڎ دیدارەکە زیاڎ جە سەعاتێش خواینا و فرە بە عالی ۋېیەرد و دەسنیشانش کەرڎ مۆراڵ و ئاژەو ڕابەر ئاپۆی فرە عال بۍ. عومەر ئۆجالان ئەرەیاۋناش یووەمجارا ڕابەر ئاپۆ عەلی ئۆجالانی وارەزایش و دووە زاوڵە کناچەکاش موینۆ و واتش: "سەرۆک قەڵەمېوەش پێشکەش بە من و زاوڵەکا کەرڎ. سەرۆک جەختش چانەیە کەرڎۆ کە مشۊم زاوڵۍ ئیرادێوە ئازادشا بۆ. داواش جە زاوڵەکا کەرڎ قەوەتۍ با."

'فرە بە گرنگی تەماشەو ئا کۆمیسۆنەیە مەکەرۆ کە جە پەرلەمانەنە وەشمکریۆ، گەرەکشا چنی گرڎو لایەنەکا گلېربۆوە'

عومەر ئۆجالان ئەرەیاۋناش ڕابەر ئاپۆی مامۊش باسو دەم پارتی و ئەرکەکاش کەردەن و واتش، "سەرۆک مەعنێوە جیاواز مڎۆ بە دەم پارتی. ماچۆ دەم پارتی بە تەنیا پارتێوە کوردا نییا، بەڵکم پارتو واڵەو-برایەتی بەینو گەلو کوردی و تورکیچا. باسو پارادایمێوە تازەیش کەرد، کە بە پاو سەڎ ساڵۊو دووەمینو کۆمارو تورکیایا. پارادایمێوە کە نیشانەش مڎۆ فاڕیای شەرتێوەنە پەی ئانەی کورد و تورک ئی چەقبەستەیە پۊڕنا. ئینەیچ بە ماناو تازەبیەیۆ گرڎ چێوۍ مۍ. ۋەرو ئانەی ئی سیستەمۊو ئیساتۍ تورکیای سەرشیەن. هەرپاسە سەرۆک فرە بە گرنگیوە تەماشەو ئا کۆمیسۆنەیە مەکەرۆ کە قەرارا جە پەرلەمانەنە وەش بکریۆ، گەرەکشا چنی گرڎو لایەنەکا گلېربۆوە و پېوەس بە پرۆسەکەی ڕاوێژ بکەرۆ."