چالاکی دژو نیارەو قەیومی سەرو شارەوانی سێرتینە بەردەواما. هاموڵاتیێ وەردەمو شارەوانی گلێرێ بیێوە و درووشمو "بژیوۆ مڏرامانوو وەرنیشتی" و "بژیوۆ مڏرامانوو گەلوو کوردی" و "قەیوم دزا" و "ژەنی ژیوای ئازادی"شا بەرزکەردۆ. هامسەرۆکا شارەوانی سێرتی کە قەیوم یاگەکێشانە نریانەرە و پەرلەمانتارا دەم پارتی و ئەنداما پارت و ڕێکوزییەکێ و هاموڵاتیێ بەشدارێ بیێ.

هامسەرۆکو شارەوانی سێرتی محەمەد قەیسی ئەرەیاوناش ٢٠ ئەندامێ ئەنجوومەنو شارەوانی جە پشکو دەم پارتی و ١١ ئەندامێ جە پشکو ئاکەپەینە هەنێ، ئەنداما ئاکەپەی ڕاشا نەرا ئەندامەکێ دەم پارتی بلانە دلێ شارەوانی، داواش کەرد ئی هەرمانە نایاساییێ مدرنۆنە.

هامسەرۆکەو شارەوانی سۆفیا ئالاگاشە ئەرەیاوناش جە جەهانەنە ژەنێ کوردی دەورێ سەرەکی گێڵنانە و بیێنێ بە هیواو گرڏیما، واتش: "زیهنیەتو قەیومی هرووژما دژو هامسەرۆکایەتی. هرووژما دژو دەسکەوتەکا ژەنا. قەیوم کۆڵۆنیاڵیستا. هرووژما دژو کلتووری و زوانی".

سۆفیا ئالاگاشە ئەرەیاوناش درێژە بە هەرمانەو وێشا مڏانە و قەرارو نیارەو قەیومی قەبووڵ مەکەرمێ.

ئینجا گلێرۆبییەیۆ ئەنجوومەنی دەسش پنە کەرد، نیارەو قەیومی بیی بە ڕۆژەڤو گلێرۆبییەکەی.

گلێرۆبییەکەی بە درووشمو "ژەنی ژیوای ئازادی" و "بژیوۆ مڏرامانو گەلوو کورد" ی دمایش ئاما.