بەپاو هەواڵێوە تۆڕەو مافەکا مرۆڤوو کوردسانی ڕۊو یەرە شەممەی وەریشە مورادیە، ئەندامەو جەمەو ژەنا ئازاڎیی ۋەرکەوتوو کوردسانی (کژار)ی کە جە سەرەتاو مانگەو ئاب و ساڵەو ٢٠٢٣ێوە گیریێنە، بە ئەمرەو دادوەر سەلەواتی جە گێرتەخانەو ژەنا زینڎانەکەیۆ واڕیێنۆ پەی زینڎانی ٢٠٩ی جە وەزارەتوو ئیتلاعاتی چا زینڎانەنە و پا مەڵامەتۆ مورادیە مانیش جە واردەی گێرتێنە.

هاموەخت پەخشان عەزیزیە چالاکەو ژەنا کە ئینا چا زینڎانەنە دژوو واڕایۆ وەریشە مورادیۍ پەی زینڎانی ٢٠٩ ی مانیش جە واردەی گرتێنە.

ئا ژەنە چالاکە زینڎانیۍ دماو ئەژنەۋییەو هەواڵوو واڕایۆ وەریشە مورادیۍ سەرەتا ۋەروودەم و بەشوو پاسەوانا زینڎانینە چالاکی ئەرەنیشتەیش ئەنجامدابۍ، دماتەر جە ڕۊو چوارشەممەیۆ مانیش جە واردەی گرتێنە.

وەریشە مورادیە جە ١و ئابی نزیک بە شاروو سنەینە و پەخشان عەزیزیە جە ٣ۍ ئابی تارانەنە گیریۍ، دماو نزیکەو ٥ مانگا ئەوەکۊڵیای جە ناوەنڎەکا ئیتلاعاتینە واڕیێوە پەی بەشوو ژەنا زینڎانی ئەڤینی تارانی و سەرەڕاو ۋییەرنای نۆمانگا سەروو گێرتەیشانە هەڵای دادگایی نەکریێنۍ.