دماو ١٣ ڕووا جە مانگېرتەی مامۆسایا، ئارۆ بە مەبەسو لوای پەی هەولێری مامۆسۍ ناڕازیۍ بەرەو شارو هەولێری کۊتۍ ڕا، دماو یاوایشا بە نوقتۍ وشکنای دێگەڵەی هێزەکاو پەدەکەی بە تنوتیژی ڕاگیریشا جە پڕایۆ مامۆسایا گېرت.
جە ئەرەیاۋنێوەنە وەزارەتو دلېینەو دەسەڵاتداری پانیشتوو کوردەسانی (حکومەتو هەرمانڕایکەری)، کە پشکو پەدەکەین، جیای پارېزنای گیانو مانگېرتا کە گرڎ جۆرە تنوتیژیێوەشا جە نوقتۍ وشکنای دێگەڵەو سەر بە پەدەکەینە دەرحەق ئەنجامدریا (دایونە، هەڕەشۍ و متەی گازی هەڵسمجی) جە ئەرەیاۋنێوەنە ئاماژەش پانەی کەرڎەن، "لایەنۍ جبەری بەکارشا مارا و لایەنە جە یاسا بەرشیەکۍ ئیسفاڎە چا دەرفەتیە هۊرگېرا و نیازشا هەن پەی شێونای ئاسایشو ناوچەکا تەرو هەرێمی بەکارش بارا."
جە بەشێوەتەرو ئەرەیاۋناکەو وەزارەتو دلېینەو پەدەکەینە هەوڵو چەواشەکەردەی داوا ڕەواکا مانگېرتا مڎۆ و ماچۆ: "ئانەی یاگۍ هەڵوێستەسەرکەردەین، جەمۍ کەسۍ و لایەنۍ جبەری و دلېینەی جە عێراقەنە گەرەکشانە ئی داواکارییا بە کار بارا پەی مەبەسی گوماناویی ۋێشا و بڕۍ لایەنۍ ئەوەمەڼۍ، لایەنە جە یاسا بەرشیەکا، پ. ک. ک. و کەسانۍ تەرۍ ئیسفاڎە چا دەرفەتیە هۊرگېرا و نیازشا هەن پەی شېونای ئاسایشو ناوچەکا تەرو هەرێمی بەکارش بارا و پینەیچ داواکارییە ڕەواکا فەرمانبەرا تێکەڵ بە مەرامەکاشا مکەرا."
جە ئەرەیاۋناکەینە کۊششەکۍ مامۆسایاشا بە گێجەڵ شێونای نامۍ بەردەن و ماچۆ: "هەر هەوڵێوە پەی شېونای ئاسایشو هەرێمو کوردەسانی ڕاشا ۋنە گیریۆ و هەر هەوڵێوە بەدەر جە یاسۍ و ڕانماییەکا بۆ ڕاش پنە نمەڎەیمۍ."
ئی ئەرەیاۋناو وەزارەتو دلېینەی، ئینا کاتێنە کە تیمو پەشتیوانیی مانگېرتا په‌یامێوەشا وەڵاکەردۆ چنەشەنە باسشا جە هەوڵەکاشا کەردەن و ماچۆ "ئێمه ئارۆ ئامایمۍ جە پایته‌ختۆ جاڕو به‌ده‌مه‌وه ئامای و ویژدانی چڵاکنۊتارە، پەی ڕزگاركەردەی گیانو مانگېرتا هەمڕا وێڕاگرەکاما بڎەیمۍ."
ئاماژه‌شا پانەیچ کەرڎەن، "گیانو هەمڕا مانگېرتەکاما ئینا مه‌ترسینە؛ ئه‌ر كه‌رامه‌ت و ئه‌خلاق و ویژدانتان مەنەن! به زوویی داواكارییه‌كاشا جابه‌جێ بكه‌ردۍ، ئه‌‌رنا قەسەم پا خوڎایەی کە فیرعه‌ون و هامان و زوحاك و سه‌دام و قه‌زافی و ئه‌سه‌دش کەردۍ به پەڼنەو زه‌مانهی؛ گیانو هه‌ر هەمڕێوەما ۋەرا ۋەرا به گیانو سه‌ڎان تاڵانكارا و پیسوەرا و نۆكه‌را پېسە شمەی و ژیۋای یۆ بەیۆیتا شێونمۍ."
هەر جە پەیامەکەنە ڕووەو دەمیشا جە پەدەکەی کەردەن و بە خێڵگەرا نامێشا بەردێنۍ و ماچا: "شمە چونكی به كلتوورو خێڵی و ته‌سكوینای حوكمڕانی مکەردۍ؛ جیای ئانەی دەمو داوا سه‌ره‌تاییه‌كا ئاڎیشا و تەمامو موچه وەراوە بەیدۍ؛ پېسە پیشه‌یی هه‌میشه‌ییتا ته‌خوین و تۆمه‌تۍ بەخشدێوە. جە كاتێنە خودو ۋێتا ئه‌هریمه‌نۍ خیانه‌تی و چەمشۊڕی و ئه‌ڵقه جە گۊشۍ و نۆكه‌رێندۍ."
