ئا کۆڵبەرە نەوجوانەی کە زامڎاربیەبۍ چەمێوەش جە دەسدا
ڕۊو جومعەی کۆڵبەرێوە نەوجوان سەردەشتەنە بە تەقەو هێزەکاو دەوڵەتوو ئێرانی میاچەماش بە سەختی زەخمین بیەبۍ، دماو واڕایۊیش پەی خەسەخانەی بەرکۊت چەمێوەش جە دەسدان.
بە پاو هەواڵێوە کۆڵبەر نیوزی ئاریا مەمەندی تەمەن ١٧ ساڵ خەڵکوو شاروو سەردەشتی کە ڕۊو جومعەی سنووروو ئا شارەینە بە تەقەی راسەوخۆو هێزەکاو دەوڵەتوو ئێرانی بە سەختی زامڎاربی، چەمېوەش جە دەسدان.
هێزەکۍ دەوڵەتی جە مەودێوە نزیکەنە بە چەکی ساچمە تەقەشا جە میاچەما ئا نەوجوانەیە کەردەبۍ، یۆ جە ساچمەکا بیەن بە مەڵامەتوو ئانەی ئا کۆڵبەرە چەمێوەش جە دەس بڎۆ.
جە ئیساتێنە ئاریا مەمەندی ئینا خەسەخانێوە تەورێزینە چێروو چەمڎاری دکتۊرینە و باس چانەی کریۆ ئاژەو تەندروستیش خاس نیا.
