ئا ڕۊنامەنویسۍ هەواڵێشا بارەوە ژینێوە وەڵۍ کەردێبێنیوە، زینڎانەنە سزای تازۍ دریا
ئەرەیاونیا، ئا ڕۊنامەنویسۍ هەواڵێشا سەروو مەردەی ژینا ئەمینی-یۍ وەڵا کەردێبێنوە و پا مەبەسە گیریێبێنی، پەیوەندیی تەلەفونی و سەردای بنەیانەکاش وەنە قەدەغە کریان.
ئێران جەلیلیە ئەداو ڕۊنامەنویس نەسیم سوڵتانۍ ڕۊو ١٠و کانوونوو یوەموو ٢٠٢٣ ئەرەیاوناش، کە ئیلاهە محەمەدییە و نیلوفەر حامدییە ڕاشا نەدریان پەنە چەنی بنەیانەکاشا دیدار کەرا،جەلیلییە پەی میدیاکاو ئۊپۊزسیۊنی ئێرانی قسێش کەردێو واتش:"نەسیم سوڵتانە، ئیلاهە محەمەدییە و نیلوفەر حەمیدییە پەیوەندیکەردەی و چەمپەنەکەوتەیشا چەنی بنەیانەکاشا وەنە قەدەغە کریان".
ڕۊو ٢٣ تشرینوو یوەمی، دادگای باڵاو ئێرانی سەبارەت بە ٢ ڕۊنامەنویسا ئیلاهە موحەمەدییە و نیلوفەر حامدییە قەراروو وێش بەرکرد کە پەی ئەوەڵ جاری هەواڵوو کوشیای ژینا ئەمینیێشا وەڵا کەردەبێوە، کە ١٦ ئەیلوولوو ٢٠٢٢ پۊلیسوو ئەخلاقوو ئێرانی کوشتە.
بەپاو قەرارەکەی، ئیلاهە و نیلوفەرە بە یەرۍ دۊسیۍ جیاوازۍ سزا دریێنێ. ئیلاهە بە تاوانوو "هامکاری چەنیی ئەمریکای کە بە دەوڵەتی دوژمن مشناسیۊ"، و هەرپاسە تاوان دژ بە ئاسایشی نەتەوەیی و پڕوپاگەندە دژوو کۊماری ئیسلامی سزاو شش ساڵا زینڎانییش ملەرە سەپیێنە.
هەرپاسە نیلوفەر حەمیدییە بە تۊمەتوو "هامکاری چەنی ئەمریکای بە هەمان شێوەو ئیلاهەی بە تۊمەتوو پڕوپاگەندەی دژوو کۊماری ئیسلامی، بە ٥ ساڵۍ زینڎانی سزا دریێنە.
هەرپاسە به پاو ماددەو ٢٣ جە یاساو سزادای ئیسلامی ماوەو ٢ساڵا قەدەغەو ڕۊنامەنویسۍ نامێبریۍ چەنی پارت، گرووپ و ڕێکوزیا سیاسییەکا حەرجۊرە پەیوەندییوەشا بۊ. ئێران جەلیلییە قەراروو قەدەغەکەردەی پەیوەندییەکاش چەنی بنەیانەکا شەرمەزار کەرد و ناڕەزایەتییش نیشانە دا.
