بەڕێز کاک سامان نەقشبەندی٭٭، وێم سەرنویسەروو ئی گۆڤارۍنا، ئینەیچ واتەو سەرنویسەری وێما:

واتەو سەرنویسەری جە گۆڤارو وانیاری

خەیلێوه¬ن ئاخوو داخوو دماكەوته¬یو زوانه دەوڵەمەننەكەیما، جەرگوو دڵیما سۆچنای سۆچنۆو هەر ڕوێ پەی بەشێ جه فەرهەنگیما چەمەریانه گێڵنمێ. ھەورامی کە عانوو وێش زوانوو ئەدەبوو کۆردی بیەن زیاتەر جە سەدساڵان پێسەو مۆزەخانێوە تەماشەش کریۆ کەئیسە باوێش نەمەنەنوو گوایا پەی نویستەی بە کار نمێ، یا ئەگەریچ بەکار بێ تەنیا تاوی شێعرەش پەنە بنویسی . فره فره به داخەوه دەسەڵاتدارەكێچما تەنیا  بە دەم هەورامانوو هەورامی  بەشێ جه كۆردەواری زانا ، ئه ننا به ڕاسی پەی فەرهەنگه دەوڵەمەنه كەیش به تایبەت بەشوو زوانەكەیش ئەوپەڕوو كه متەر خەمی كەرا، پەوکی ھیچ داموو دەزگایێوە تازەشا پەی پارێزنایو ھەورامی نەوستەن کار.چەنی ئانەی کەچی چن ساڵەنە دەنگوو ناحەزیو وێما  یاونانما گۆشوو کار بەدەسا.، بەڵام ھەڵای ھیچ جوابێما نەگێرتەنۆ. تا یاگێ کە بڕێ جە فەرھەنگ دۆسەکایچ تاوانبارێما  کەراو ماچا شمە گەرەکتان وێتا جەکۆردی جیا کەردێوەو واچدێ نەتەوێ تەرندێ .مەتیێ کەڕەو دەگا پەڕە.چوون ئێمە ھەرگیز شۆنوو ئانەیوە نەبیێنمێو نیەنمێ . تەنیا داواو ئێمە ھەقوو وێمان کە ئادێچ پارێزنایو زوانی ئەداییمان جەلافاوو فۆتیای. مەزانوو چی؟ وەلێ ئجیۆفرێ جە قەڵەم بە دەسە ھەورامی زوانەکایچما بە تەمامی باوڕشا کەردەن کە زوانەکەشا دەردوو نویستەی مەوەرۆ. پەوکی بەگرد زوانێ منویسا بەڵام پەی ئا زوانەی کە قسێش پەنە کەرا چیوێشا نیا. پێسە قەدیمی ماچۆ کەرگەو ئێمەنێو پەی یۆتەری ھێڵێ کەرا.ئینە یانێ فرەو جارا ئێمە وێمانمێ پەی واچەکاما کەفەن ورازمێو وێمانمێ بە دەسوو وێماپەی زوانەکەیما قەبرە کەنمێو زیننە بە چاڵش کەرمێ. فەرھەنگ ،  شناسنامەو ھەر وەڵاتێنوو زوان وەرچەمتەرین بەشوو فەرھەنگین. جا چی دەورەنە کە لرپێو دەریاو ڕۆزگاری بە حەزوو ئێمە مەویەرا، فرە فرە  بەیاگێو وەرچەما کەگردما یاگێو وێمانە پەی فەرھەنگەکەیما بەتایبەت بەشوو زوانەکەیش  قۆڵێ پیاوەتی ھۆرماڵمێوە و ژەنوو پیاو پیروو جوان ،  فرە فرە  فرزوو ئازایانە پەی ژیونایوەو وێماو فەرھەنگیما دەس بەکارێ بیمێ، ئەننا بیمێ بەیاگێو دژمانووو تانەو تەشەروو ئانیشا کە شۆنوو وێمارە مێنێ چوونکە ھیچ چیوێما جەفەرھەنگی پەی ناستێنێوە. ئێمەیچ پێسەو دڵسۆزێوەو فەرھەنگوو ھەورامانی ، بە ئەرکوو سەروو شانەو وێما زاناما کە جە زانکۆو کۆردستانینە گنمێ شۆنوو وەش کەردەیوگۆڤارێ کە سەرتاپاش بە ھەورامی نویسیا بۆ تا گە ورەییو ئی زوانی وزمێ جبەروو ڕۆشن بۆوە جەلاو گردیماوە کە ئارۆ ھە رچە نی تاومێ بەفارسیو ئینگلیزیو کۆردی سۆرانیو.... بنویسمێ تاومێ بە ھەورامیچ قسێو دڵوو وێما بە ھەر شیوە کە مەیلما بۆ بنویسمێ. ھە ر پاسە گەرەکمان بە نویستەیو بابەتە زانیاریەکاما ، شێعرەکاما، ڕازەکاماو... بیناو ئا ویری کە پێسەو مۆزەخانێوەو ئەدەبوو کۆردی ، تەماشەو ھەورامی کەرۆ، ماڕمێو واچمێ نەخەیر ھەورامی چەنی ئانەی کە سەدساڵێ زیادا تڵاش چەنە بریۆو تەنەکەش پەنە دریۆ ھەڵای قسێش پەی واتەی ھەنێو تاوۆ پێسەو ئەوێ زوانەکا  بەڵکوو خاستەر چادیشایچ وێش برمانۆ. بە یەکدەنگیو ئا کەسا کە پەی وستەی ڕاو ئی گۆڤاری مانیێ ، نامێما نیا وانیار. یانێ یاروو وانای(دانشجو).چوونکە بەیاردەیو وانیارە کاوە کەوت ڕا. ئەڵبەت گۆشێ چەمیچما پەی ئانەی بێ کەوانیار بە ماناو کەسێ کەخەریکوو وەنایوە بۆ  بێو، تاوێنمی واچمێ بۆنەو وانیارەکاوە نامێما نیا وانیار. وە بەدڵ داواما کەرد جەقەڵەم بەدەساو ھەورامانی پەی دەوڵەمەن کەردەیوەو وانیاری بەکیانایو بابەتەکاشا یاردەیمابدا.بەڕاسی کە یاردەیچشا دایمێ. وانیاری ئازیز، ئینە کە ئینا خزمەتوو تۆنە، بەشێ چا بابەتوو دلێ دەقانێ کە یاوێنێ دەسوو ئێمە. ھۆشیچما نەشۆوە ئینە وەڵەمین چاپوو وانیارین. جا بۆنەو ئانەیوە کە ئێمە  جە نویستەینە ھەڵای شێوەنویستەیێوە یەک دەنگما نیا،  کریۆ نویستەی بڕێ جە واچەکا بە حەزوو بڕێ جە شمەی قەڵەم بە دەسی وەشەویسی نەبۆ. ھەر پاسە مشیۆ زانمێ کە ئانە پەی ئێمە جە ڕیک وستەو ئی مەجەلەینە وەرچەما ، تەنیا وستەی جبەروو گەورەییو ئی زوانینە ، نەک  پەسینای یا یاونایو ویرێوە تایبەتی. پی بۆنەوە داواتا چەنی کەرمێ ویڕووڕاو وێتا جەگرد بارێوە کیاندێما پەی ، تا جە چاپەکای تەرینە ھەڵەتەکاو وێما وەشێ کەرمێ.  فرەفرە بەیاگێش زانوو چا کەسا کە مانیێو چیوشا پەی نویستێمێ ، دەسوەشیێ گەرم کەروو. بە تایبەت بەیاگێن کە بێقەزایێ گەرم واچوو بە ڕێزدارا کاکە ھۆمایۆن محەمەد نژادیو کاکە مەسعوودی ڕۆستەمیو کاکە مەنسووری ڕەحمانی کاکە  سەباح پەرەستەی کاکەھۆشیاری ئەزەغیو کاکە جەواد حسەینی کە بە ڕاسی پەی وستەیو ڕایو وانیاری فرەتەر یاردەیشا دایمێ. قسێوەم نەمەنێنە ، تەنیا جارێ تەر داوا کەروو جە تەماموو قەڵەم بەدەسە کاما، مامۆسایاو زوانشناسیو ئەدەبیو ئایینیو کۆمەڵ ژناسیو ڕەوان ژناسیو... شاعێرە ناسک خیاڵەکاما، بە تایبەت چینوو وانیارەکا کە ئۆمێدوو ئاواتوو چێ دمایو وەڵاتینێ پەی دەوڵەمەن کەردەیوەو ئی گۆڤاری کەمتەر خەمی نەکەراو یاردەیما بدا.

ھەیاس (ئەیاز) غەریبی

سەرنجە:
گۆڤاروو وانیاری، گۆڤارێوەن تایبەت بە زوانوو ھەورامی کە بە یاردەیو بڕێ جە وانیارەکان (دانشجوەکان)و زانشگاو کوردستانی جە شارو سنەی به تایبه‌تی کۆچ‌که‌رده‌ی ناسک خیاڵ  مامۆسا هه‌یاس غه‌ریبی؛ بەرکریان و یۆهەمین چاپش جە مانگوو پاژەرەژوو ساڵوو1393 وەڵاو بییەنەوە.

 

کوڵە ژیانامەو هەیاس غەریبی

هەیاس جەمال حەمە غەریب ئەشناسیا بە ھەیاس (ئەیاز) غەریبی، ساڵەو 1985ی کرستیانی جە شارو هەورامانو تەختی جە بەشو وەراسان (وەرهۆر)و هەورامانی جەئەڎای بییەن.  هەر پاسە کە وێش جە پۆستێوشەنە جە دیجتاڵ میدیاو فەیسبوک-یەنە نویستەنش؛ جە شش ساڵی تەمەنیشەنە بابەیش کیاستەن حوجرە و بییەن بە فەقی. جە پانزە ساڵینە عاشقو کناچێوێ مەبۆنە، بەڵام چەنی کەشێوی تەری هامسەرگیری مەکەرۆنە. ئانەیچە کاریگەری سەرش منیۆرە و دەرەنجامەکەش پاسە مەگنۆوە کە غەریبی دەش دان نویستەی بە تایبەتی شیعرێ. دمای ئانەیە غەریبی هەر زوو جە ڕاو شیعرەکانشەوە، نامێ و نامبانگش وەڵاوە مەبۆنەوە و جە فرێوە کە کۆڕێ و گلێرەوبییەکانە بە ئەوانای شیعرەکانش بەشداری مەکەرۆنە، بە تایبەتی جە بۆنە ئایینیەکانە هەمیشە ئامادەییش بییەن.

 هەرپاسە کە وێش نویستەنش؛ شیعرەکێش ئانڎە ئاست بەرزێ بیێنێ بە "نالی‌ سەردەم"ی ئەشناسیان. هامتەریب چەنی شیعرێ و نویستەی، جە فەقێیاتیەنە کارمە و چەنە ئاما بییەن و زانستە ئایینەکانە فرە وەڵێ کەوتەن و تەنها دوێ ساڵێ تەرێ وەسێ بێنێ تا بڕوانامەو مەلایەتیش پنە بدریۆنە، بەڵام مەرگی ناوەتی مەوداش نەڎا و جە 12-10-2015ی جە شارو هەورامانو تەختی جە ڤییەرێوی هامۆشییەنە گیانی پاکش جەدەستدا و تەرمەکەش هەر جە ئا شارە بە مەڕاسیمی جەماوەری و شۆدارانە ئەسپەردە کریا.

هەڵبەتە یاگۍ باس کەردەیەن کە مامۆسا هەیاس غەریبی فرێوە جە شیعرەکێ وێش بەدەنگ و ڕەنگو وێش تۆمارێ کەردێنێ و هامکات شعرەکێش جە دیوانێوەنە چاپێ و وەڵاوێ کریێنێ.

چەنڎ نمونێ جە شیعرەکێ مامۆسا هەیاس غەریبی:

داگیرکەر 

وێران یانه بی ئه‌ی وێران که‌رو به‌رو بوومو کورده‌واریم...
بێناز که‌رو په‌پووسڵێمانەو هەواریم...
ئاویت کەرده به زوخاوێ...
ونیت وارده پیسەو ئاوێ...
نەپەرسات و بەزەیت ناما هەرسو چەمو هەتیماره...
لەرزەو دەسو فەقیراره...
قیژه و ناڵه و واڵه و براڵەی خەمباریم...

یانەما بی یانەکۆڵەت...
وڕنات... هەر عان مەیلیت کێشا...
دەک کۆشکەکێت وڕۆ به ئاخو زگاریم... 
دەک کۆشکەکێت وڕۆ به ئاخو زگاریم...

هیجران وتەی... مۆبەت مەرده...
مەده دەرده...
بنیه چەمێت دەرمانەکەیت...
دەک به دۆعاو پیرەژەنه ڕۆڵه مەردا...
ئاخو ڕیش چەرمه دڵ سەردا...
وێت بی ئاویرو یانەکەیت...
وێت بی ئاویرو یانەکەیت..

٭٭٭٭٭

به عه شقی گەرمم به ئاخی چیام
من جه فەرهادی بیستوون جیام
نەقشەکەی شیرین، شیوه که ی سه وزه
ئەو وه سەنگ کێشا من وه دل نیام

٭٭٭٭٭٭

بۆی ڕێحان ئاسای دیداری یار مێ 

 وەشتەر جە شەوبۆی هەرد و کۆسار مێ

هۆ دڵەی تەنیای مەلوولی بێ ناز 

 مزانی تەققەی پاڵای نازار مێ 

 لابەرە ژەنگی بێ زەوقی نە چەم

 تا وینی چەنی شەوق وە بازار مێ  

ڕەنگە ڕەژیلە ڕەشتەنش دێڐە

 نەرگس وە سەد ناز بە لەنجەو لارمێ
 
نە یاگەی وەروی دڵ تەنگی دڵ سەرڐ
 ئیسە ڕەنگاو ڕەنگ گوڵ وە گوڵزار مێ 

سەرشی شەوگاروو پاییزوو خەما 

مەڕیا تاریکیو فەسڵی وەهار مێ

دڵە ئەر کۆسار بەهەشت مرمانۆ 

 ئەر سارا وە سەد نەقش و نیگار مێ 

ئەر بوڵبوڵ بە گوڵ ڕۆشن بۆ چەمش 

هەراڵە برەیمی بە دیڐەی زار مێ 

 ئەر لاونۆ گۆش هاڕەو وەرواوا

 تاوی وارانی وێڵ و ساڐار مێ 

 ئەر شنیۆ شەماڵ ئەر مزیۆ سەوزە 

نە ڕووی گۆراڵان شەونم وەبار مێ 
مەعلووم بۆ وەنەت گرڐش وە بۆنەی 

 موستەفای ڕەسوول شاهی مۆختار مێ
 
 کەسێ جە پاکیو جە زەریفیو ڕووش 

ڕۆجیار وەیلان گوڵ شەرمەسار مێ 

 شەمعی خیاڵی ناسک خیاڵان 

 وە دەوری باڵاش پەپوولە وار مێ 

 بۆی عەترش بەرزی باڵاش نە خیاڵ 
ئەو وێنەی چنوور ئێڐ چوون چنار مێ 

 بارەگای شاهیش جە عەرەبسانەن

 دەنگی میلادش جە کورڐە وار مێ 

بازە با دۆسێ بەوەش بویارا 

 جە یانەی دژمەن دەنگی هاوار مێ 

بازە ناکەسێ سەر بڐا وەسەنگ 

 مەولوودی پاشای مەڐینە شار مێ 

هەتا ئاوازەو دەنگش باقی بۆ 

 تا یاڐش گر ساڵ وەشتەر جە پار مێ 

 تا ناڵەی ئەشقی بێ وێنەو میسلش 

 جە لای ئاشقان بێ عەیب و عار مێ

 تا بەشەر مەنۆ نە ڕووی زەمین دا 

 تا سەحەر دمای شەوگاری تار مێ 

ڕەسمش یادگار یاساش حەر مەنۆ 

جە شەرقۆ پەی غەرب تا ڕۆجیار مێ 

 وێنەی غەریبی ئەی دڵ ماتڵ بە 

 بزانە تا کەی سەوزەی هەوار مێ

 ٭٭٭٭٭

هەڵەبجەکەم

وێرەگا بێ و ئاسمان تن
دلێو شاری، نیمە ڕۆشن
وەهار بێ، دەوروو بڵبڵا
عانوو لەنجەو سوورەگوڵا
واڐەو چووزەو گەڵاو شادی
هەراڵەو داروو ئازادی
بەڵێ سەوز بێ، کەشوو سارا
بەڵێ وەش بێ، دڵوو یارا
وەلێ ئا وێرەگاو شاری
نەڐێ ڕەنگوو بۆو وەهاری
واچینی عانوو پاییزین
چۆڵیو هەواروو ئازیزین
مریچێڵێ سەروو چڵا
وستەبێشرە نەهەو دڵا
هەورێ ئەجیێ تەرسێنێ پۆخت
مەردێ بێنێ سیاو و سۆخت
سەروو کەلا، سوور بیەبێ
یا ڕەببی چێشش دیەبێ
کۆڵانێنە، زاوڵێ وردێ
پاکێ، بەچکە شێرێ کوردێ
واتشا تاکەی بێمێ وێڵێ?
بێدێ سەبا بلمێ کێڵێ
بە ویری پاکی وێشانە
دنیاشا کەردە کێشانە
لێوەتەرۆ دوێ کناچێ
یوەشا، پەوێشا واچێ
کنا،سەبا هەوا وەشا
نەلمێ سەیرانوو ئا کەشا?
تا وێرەگا وەش ویارمێ
شنگو هاڵەکۆکێچ بارمێ
بەرز و نزم گەرم وچیا
جوان و پیر ژەن و پیا
هەر یۆ قەوڵ و قەرارێ دێ
واڐەو سەیرو دیارێ دێ
نەزانێنێ هەقشا وریان
قەرارێ تەرشا پەی دریان
عانێ کە ڕۆ واڐەش سەرشی
کە ڕۆجیار گێمانەش بەر شی
شەوە ئاما سیاوپۆشە
ئازیەت بارەو دڵ بە جۆشە
ڕەنگەش پڕا مانگە شەوە
بی هەرسی هەسارە کەوە
مەڕێنە ماتێو کزۆلێ
لووریێنێوە تووتە کۆڵێ
ئا شارە بی کانوو ئێشا 
واچێ خۆڐا، ئیشەو چێشا?
مانگوو هەسارە و چڵ و دار
پەی چێشینی مات و خەمبار?
پەی یانەکەیم پەی ڕۆڵەکام
کێ کەردەنش، خیاڵی خام?
شەرتە بینوو، شەرتەو پیای
لایە لایەم بۆ تا سەوای
نمازوو کەس، یانەش دێویۆ
تاقە ڕۆلێم وەرمش شێویۆ 
خۆراسش وات هەڵەبجەی مەرد
تا ساعبێ لایە لایەش کەرد
وسنێش بێ خەموو خیاڵێ
براو تاتەو ئەداو واڵێ
بەڵام جە کۆشکوو زڵموو شای
تەگبیر کریا بێ پەی گەڐای
خۆڐا نەژناستەرین پیا
ئاژاولێش پەی کوردی نیا
پیا نەخێر وەرگیوی هار
ون وارێوە ناڕێک و لار
بی مۆبەتێ دەروون سیاو
نەورۆزما کەردش زۆخاو
واتش بەینێن پێسەو پەسی
نەمتتێنەم ونوو کەسی
کۆردە شڕڕێ جە گرد لاوە 
زیننە زیننەی گرد خولیاوە
هەرچی کوردی وینوو ژیرا 
ئێجیۆم قۆلاپەما گیرا
جە بابۆلێو بێشکەکێشا
تا جوان و پیرو وێشا
ئشیۆ خەمیوەشا وەروو
شیمیا بارانێشا کەروو
ئاویر وزوونە هۆزیشا
کەروو زۆخاو نەورۆزیشا
ئا نامەردوو رۆزگاری
ڕوەش نیا کۆردەواری
هەڵەبجەکەو هەورامانی
کەوت داموو شیمیابارانی
جە بابۆڵەی بێ گووناوە 
لچێش خوێ فریشتاوە 
جە زاوڵەی هاروو هاجی 
جە ژەنێوە پاڵوو ساجی
جە جوانێ پڕ ئاواتی 
جە پیرێ بێ دەسەڵاتی
جە تاتێوە جە ئەڐایێ
جە دەوڵەمەن جە گەڐایێ
هەرچی بێما ژەن و پیا
لوێو ئاستیمێشا جیا
گرد بێ گوونێو بێ تاوانێ
گرد کرۆڵێو بێ باوانێ
هەر کەس مەنۆ چا ڕاساوە
واچێ خۆڐا چیت ئاساوە 
هەڵبجە دیش کە وێرانا
بەرزش کەردۆ ناڵەو هانا
ڕوەش کەردا ئاسمانی
واتش خۆدا هەقیم سانی
هەرکەس پیسەش کەرد دۆڵەکام
بی بە قافێزوو ڕۆڵەکام
مەگەر هەر تۆ خەمش وەری
یا ڕەببی ئاوڕووش بەری
ئەر ئینا قۆلێو قافێوە
ملیش وزی تەنافێوە
هەر پاسەیچ بێ جە ئاخر سەر
دۆعاکێش کەوتە کەلەبەر
تۆخوا سروەو لاو چنووری
ئەر لوای پەی شارەزووری
قسێت ماچوو تۆ واچە دەی
سڵامیم یاونە هەڵەبجەی
واچە ئیسەچ زاڵم مەنەن 
هەڵای خاک فرۆشما چەنەن
هێمای کوردی کرۆڵێنێ
تۆ خۆ دۆعێت قبووڵێنێ
ناڵیۆ خۆدای هەڵەبجەکەم
وڕاو زڵمی وینی بە چەم
ئەننا هەر ئاخروو خەتی
تەنافەنەو ملی پەتی
غەریبینا جە هەورامان
پەی تۆ هەرسوو دیدەیم ئامان

٭٭٭٭٭

بازه دڵ پەرێت هەر وێرانه بۆ
با هەر تەشریفت لای بێگانه بۆ

ئەر به ناوەشیم كەیفوو تۆ سازا
زانه نازەنين وەشیم ئانە بۆ

دووری مەتاوۆ کەم کەرۆ مەیلت
تۆ هەر نه دڵنی تا زەمانه بۆ

مەبڕۆ تەماعەت دیدٚەی بێ کەیفم
ئەر سەدٚ كه گۆشم پەڕ جه تانه بۆ

سەوزەو قەراخوو جۆگاو هەرسوو من
دا ساتێ ڕەحمت بەو هەرسانە بۆ

يۆسف چا میسره هەتا کەی مانی؟
ڕوێ مێ و مەیلت ئي كەنعانه بۆ

ئەر قابل زانی تا وه ڕۆي مەردٚەن
 دڵەی غەريبيت قەدٚيم يانە بۆ

٭٭٭٭٭

ﻻﯾﻪ ﻻﯾﻪ ﻻﯾﻪ ﻻﯼ
ڕۆڵە ﺋﺎﻭﺍﺗﻭ ﺳﻪ ﺑﺎﯼ
ﺑﻮﻭﺳﻪ ڕۆح ﻭ ﮔﯿﺎﻧﻪ ﻛﻪﻡ
ﻣﺎﻧﮕﻮ ﺋﺎﺳﻤﺎﻧﻮ ﺧۆﺩﺍﯼ
ﻻﯾﻪ ﻻﯾﻪ ﻻﯾﻪ ﻻﯼ
         
ﻭﻩ ﺷڵەﯼ ﻋﺎنێ ﮔﻪﻭﺭﻩ ﺑﯽ
ﺑﯽ ﺟﻮﺍﻧﻭ ﻻﺩﻩ ﮔﺎﯼ
ﻣﻠﯽ ﺳﻪ ﯾﺮﺍﻧﻭ ﻛﻪ ﺷﺎ
ﭘﻪ ﯾﺖ ﭘێچووﻩ ﻗﻪن ﻭ ﭼﺎﯼ
ﻻﯾﻪ ﻻﯾﻪ ﻻﯾﻪ ﻻی
         
ﺑﻮﻭﺳﻪ ﻣﻪﮔﺮﻩﻭﻩ ﺩﯾﺪﻩﻡ
ﻛوﺭﭘﻪ ﻭ بێ ﻧﺎﺯﻭ ﮔﻪﺩﺍﯼ
ﺑۆ ﺳﻪﺩﻩﻗﻪ ﻭ ﺑێشکەﻛێت
ﻛۆﺷک و  ﺗﺎج ﻭ ﺗﻪﺧﺘﻮ ﺷﺎﯼ
ﻻﯾﻪ ﻻﯾﻪ ﻻﯾﻪ ﻻﯼ

٭٭٭٭٭

نەپەرسی تۆ جه حاڵوو من، که بێ حاڵوو خیاڵیتنا
زەده و شێت و یەهەر سۆتەو،شەوۆ هێجرانی تاڵیتنا

په‌شێو و مات و ڕه‌نگ‌زه‌ردته‌ر،جه زڵفه ‌خاوه‌کاو تۆنا
جه شه‌مس و به‌خت و ئێقباڵنه،به وێنه‌و ورده‌خاڵیتنا

به گیانت گیانکه‌نشتی بێ جیاییما جیات ئاستا
نه مه‌رگێ هه‌ن نه ئارامێ،زه‌لیلوو مانگ و ساڵیتنا

نه‌وه‌شنا که‌وته‌نا یاگێ،نه‌کوو مه‌رده‌و غه‌ریبی بوو
سه‌رێوه‌م ده،حه‌واڵ په‌رسه،که زیننه به حه‌واڵیتنا

٭٭٭٭٭
شه وه ن تاریکین چه م لافاوی ئیش

ساراو ده روونیم خه ما که رده ن ریش

که ش و کؤ بئ ده نگ ئاسمانیچ بئ ره نگ

من کوشیای خه ده نگ بی وه فای دل سه نگ

عاله م گرد وته ن من بیداره نا

خه ریکی ناله ی شه وی تاره نا

پاسه دیارا ئیشه و مه بؤ رؤ

مه ر سازوو چه نی هاوارو  رؤرؤ

 

٭٭ نویستەی سەرین، مامۆسا هەیاس غەریبی پەی سامان نەقشبەندی، ئامادەکارو بەرنامەو ڕۆجیار-یس نویستەن و کیاستەن و بەشو هۆرامی فوڕات نیوز (ANF)ی متەنەراوە و بە ژیانامە و شیعرەکێ کۆچ‌که‌رده‌ی هەیاس غەریبی دەوڵەمەند و زەنگینش کەردەن.