حەنیفە ئاسڵانە وەرو ئانەی ئەڏیاو ئاشتیی بێ، سەرەڕاو ئانەی تەمەنش ٨٢ ساڵێ بێ و چنین نەوەشیێش هەنێ، ٣ ساڵێ زینانییە کریا. حەنیفە دماو ئازابییەیش واتش: "زینان دۆزەخو جەهانین. ٣ ساڵێ چا مەنانیۆ. چاکە زینانیێ نەوەشێ فرێ هەنێ، هەرپاسە مرۆڤێ بێتاوانێ فرێنێ. مشۆم ئازادێ کریانە".

ئەڏیاو ئاشتیی حەنیفە ئاسڵانێ، وەرو ئەوەکۆشای ٦ ساڵیشو ٣ مانگەیش زینانیە کریا. دماو ئانەی ماوێوە جە زینانە مەنۆ ئازادە کریا، بەڵام ساڵوو ٢٠٢٢ جە تەمەنو ٨٢ ساڵینە وسیاوە زینان. ماوەو ٣ سالا زینانیە کریا. حەنیفە ئاسڵانە حەفتەی وەڵین جە زینانەنە ئازادە کریا و پەی ئاژانسو هەواڵو فوراتی (ANF) قسێش کەردە.

حەنیفە ئاسڵانە واتش: "وەرو ئانەی تەنیانا واتم با ئاشتیی وەش بۆنە، با ئەڏایا نەگرەوا، سزاو زینانی کەردەیم دریا. چنی ئانەی بێتاوانە بێنە ساڵانێوە جە زینانە مەنانیۆ. ڕوی سەختێم ویەرنێ. تاوانەم تەنیا ئانێ بێ کە ئەڏا ئاشتیی بێنا. یاگێ ئەڏایا زینان نییا. ٣ ساڵێ زینانیم بە نەوەشی شەکرەی و ئەوەکۆشای ڕاوەبەرد. با کەس نەلۆنە زینان".

'با گرڏو زینانیا ئازادێ بانە'

جە دماینو قسەکاشەنە حەنیفە ئاسڵانە واتش: "با گرڏ مرۆڤەکێ ئازادێ بانە. زینان دۆزەخو جەهانین. چاکە زینانیێ نەوەشێ هەنێ، با گرڏو زینانییە نەوەشەکا و گرڏو زینانەکا تەرێ ئازادێ کریانە".