دژوو بییەی دەوڵەتی ئەرەگیرکەروو تورکی هەرێمەکەنە، هەرپاسە دژوو هجوومە نەژادپەرسییەکا وەراوەروو هاموەڵاتە سوورییا شاروو قەیسەروو تورکیاینە و دژوو وەنەنزیکبیەیوەکاو ئی دمایەو بەینوو ئەنقەرەی و دیمەشقی، ناڕەزایەتییە جەماوەرییەکێ شارەکاو باب و ڕاعی و ئەعزاز و عەفرین دەسشا پەنە کەرد.  

بەپاو سەرچەمەکا و ئا دیمەنا کە تۆڕە کۆمەڵایەتییەکانە وەڵێ بیێنیوە، هاموەڵاتێ ناڕازیێ ڕای سەرەکییەو  شاروو بابیشا ڕووەو بارورگیرە تورکییەکارە وستێنەرە و هجوومشا کەردەن سەروو بارورگیرەکا.

شاروو ئەعزازیچەنە عەلەمەو تورکیشا سەروو بیناو شناسنامەی و ناوەندوو پۆستەخانەو تورکیوە گێرتەرە و کارمەندەکێ بەرێکریێنێ.

هەرپاسە شاروو عەفرینینە وێنیشانەدەرێ ورشا کوان سەروو بنکە و بارەگاکاو سوپاو تورکی، چەتەکێ دەسمجوو گولـلەیسا وەنەو وێنیشانەدەرا کەردەن.