چوارچوەو ئامادەکارییەکاو نەورۆزینە؛ ئارۆیچ خەڵک بەجۆش و خرۆشێوە فرەوە، سەربارو وارای وارانێوە فرەی، ئینێ جە چەمەڕوانیی نەورۆزو ٢٠٢٤ینە. پەوکای گرد لایێوە کوردستانینە و بەتایبەت پانیشتو کوردستانیوە. وەڵێ ڕۆێنە مەیدانو نەورۆزو قەندیلینە ئامادێ بێنێ.

ئامادەبیێ سەڕەڕاو بەروستەی وەشحاڵییشا بانگەوازشا جە گەلو کوردی و بەتایبەتی گەلو پانیشتی کەرد، کە ڕووە بکەرانێ قەندیلی و پێوە نەورۆزی مەبارەک کەرا.

ماهر تونج گەنجێوە مەخمورین وەشحاڵییش بەروست و واتش: "ئەوەڵ بە ڕوحو مەزڵوم و زەکییاوە مەبارەکبایی نەورۆزی وەنەو ڕابەر ئاپۆی و زیندانییە سیاسییا، گەریلاکاو ئازادی و جەنگەوانا سەنگەرەکاو مدرامانی مکەرو".

هەرپاسە گەنجێوە تەر بە نامێ عەبیل غانمی بە زوانی عەرەبی مەبارەکبایی نەورۆزیش وەنەو گەلا کەرد و واتش:" نەورۆز جە ڕابەرو گەلا عەبدوڵا ئۆجەلانی و تەمامو گەلو کوردی و گردو ژەناو جیهانی مەبارەک مکەرو، ئی جەژنێ پەی گردو گەلانە نەک تەنیا کورد".

هەرپاسە گروپێوە جە گەنجە میاننەتەوەییا بەشداریی ئاهەنگو نەورۆزو ئێساڵو قەندیلی بێنێ، سرودێوە  شۆڕشگێڵنییەشا بە زوانی ئەڵمانی پەی مایکو ئاژانسو هەواڵو فورات (ANF)ی پێشکەشە کەردە و واتشا:"نەورۆز جەژنەو پێوەیی و ئازادیینە، پێسە گەنجە میاننەتەوەییا وەشحاڵێنمێ کە کوردستاننە ئامادێنمێ و ئا یادەیە مەبارەک مکەرمێ".

تاریق لەتیف تاتەو گەریلێوە گەشمەردێ هەڵەبجەی شەهیدۆ ئامان قەندیل، نەورۆزش مەبارەک کەرد و واتش:" داوا وەنەو گەلو پانیشتو کوردستانی مکەرو، کە بەشداریی نەورۆزو تازەوەبییەی بکەرا قەندیلنە".

هەرپاسە ئەداو گەشمەردێوە واتش:" جەژنەو نەورۆزی جەژنێوە فرە مانادارەنە پەی کوردستانی، هومێدەوارێنمێ گلێرگەو ئێمە جە ڕووەو فکرییوە زیاتەر وێش ئازاد بکەرۆ و بیاوۆ ئامانجەکاش".

ئیساتێنە مەبارەکباییەکێ قەندیلنە بە چالاکیی هەمەچەشن بەردەوامێنێ هەر ئێشەو ڕاپیمای بەمەشخەڵی کریا، سەوایچ ئاهەنگو نەورۆزی قەندیلنە بەشێوێوە جەماوەری مکریۆ.  

بەپاو زانیارییەکاو ئاژانسو هەواڵو فورات (ANF)ی قەرارا سەوای ئاهەنگەکەنە پەیامو کۆنسەو ڕاوەبەریی کەجەکەی بونیۆوە.