جە ساڵەو ۲۰۱۲ی،، سوریاچ چوون چەنڎین وڵاتێ تەرێ عەرەبیێ سەرنیشتو ئەفریقای و وەرکەوتی میانی، دەستوەشو فاڕیای و ئاخێزی جەماوەری بی و جە گرد لایێ گەلێ و باوەڕیەکێ ئا وڵاتەیە دژ بە دەسەڵاتداری بەشار ئەسەدی و حزبەکەیش حزبو بەعسی بەپاخێزێ و پەیوەست پانەیە ناڕەزایەتیێ، ۋێنیشاندایێ و ڕاپیمایێ سەرجەم وڵاتشان تەناۋە. جەی بارودۆخەنە وەرنیشت (ڕۆژاڤا)و کوردستانی پشکەو شێری جە ناڕەزایەتیەکان ۋەرکەوت. چونکە ڕژێمە یۆ جە دمای یۆکانو سوریای تا بە ڕژێمەکەو بەشار ئەسەدی بیاوۆنە گەورەتەرین ستەم و زۆرداریشان دژ بە کوردی ئەنجام دابێ و ڕۆژاڤاشان ڕووبەڕوو قڕکەردەی، بەعەرەبکەردەی، کۆچبەری، فاڕای دیموگرافیای، بێشناسنامەکەردەی کەردەبێۋە و سەدان هەزار کوردێ جە شناسنامەی سوری بێبەشێ کریێ بێنۍ و بە بێگانێ دریێبێنۍ قەڵەم. هەر ئانە پاسەش کەردەبێ گەل چەمەڕایی دەرفەتێۋی بکەرۆنە تا وێش و نیشتمانەکەیش بە یەکجاری جە ستەم و زۆردای دەسەڵاتداری سوریای ڕزگار بکەرۆنە. ڕوودایێ و ڤیەرەکێ ۲۰۱۲ی جە سوریا ئا دەرفەتەشان ڕەخسنا و گەل جە ۱۹ تەموزو ئا ساڵێنە سەرهۆردای، ئاخێز و و شۆڕشش بەرپا بکەرۆنە.
ئاخێز و سەرهۆردای و ئاخێزەکە ، کە یەکەم جار جە شارو کۆبانی چەخماخەش دا و جەماوەر جە کەمتەرین ماۋەنە شارەکە و دەوربەش جە دامودەستگەکێ ڕژێمی ڕزگارێ و پاکێ کەردێۋە. شۆنەو کۆبانی-یەرە، سەرجەم ناوچێ و شارێ ۋەرهۆرزو کوردستانی بە هەمان شێۋە ئاخێزێ و شۆڕششان کەرد. پی جۆرە جە عەفرین تا قامشلۆ و دێرێک و ئامودێ و بەشێۋی فرە جە وڵاتی جە دوژمنی ڕزگارێ و پاکێ کریێۋە و ئانێچە  قۆناغێۋی نۊین و گرنگش پەی ڕۆژاڤای و سوریا بە تایبەتی و کوردستانی و وەرکەوتی دلینی بەگردیی خوڵقنا.

ئاخێزو ۱۹و کۆپری ئاخێزێ کۆمەڵایەتیی بێ سەرو بنەماو فەلسەفەو ڕێبەر ئۆجالانی و (ۋێسەری و کۆنفەدراڵیزمی دیمۆکراتی، گەلمیری، دادگەری، پێوەرە ژیوای، ژەنمیری، مۆدێرنیتەی دیموکراتی ئاپۆیی) پایە بنەڕەتیەکێش بێنۍ و بە پێشەنگی (پەیەدە-PYD)ی ئەنجام دریا. شۆڕشەکە جە ماۋێۋی هەر فرە کەمەنە بی بەنموونە و سومبولو ئازادی و دیموکراسیی جە کوردستان، سوریا و ناوچەکەنە و هیۋاش پەی بێهیۋاکان گێڵناوە و ژیۋناۋە.. هەر جە سەرەتا شۆڕشیەۋە سەرەڕاو ئاستەنگیەکان، هێرشەکێ و گەمارۆ و دۆرپێچکەردەی ڕۆژاڤای و پیلانە دلێوێیێ و هەرێمیەکێ، بەڵام پەیەدە و مسیارەکێ ڕێبەر ئاپۆی بە پەشتیۋانی گەلی کانتۆنەکێ ڕۆژئاڤایش مەرزنێرە و شۆنیشەرە فدراسیۆنو سەرنیشتو سوریای بە بەشداری سەرجەم پێکئاما ئایینیێ و ئەتنیکیەکێ گلێرگەی دروست کریا و گردشان پێۋەرە بە قارەمانی ڕووبەڕووێ هەر چەشنە هێرشێۋی بیێۋە و شۆڕشەکەشان پارێزنا و بناغەکەشان پتەوتەر کەرد و ئاڵتەرناتیڤو ژیۋای ئازاد و دیموکراتی گەلا و باوەڕیەکانشان جە سوریانە مسۆگەر کەرد. دژبەرایەتی ڕژێمو تورکیای پەی شۆڕشەکەی سەلەمناچش کە ئا ڕژێمە نەک تەنیا دوژمنو کوردیەن، بەڵکو دوژمنو سەرجەم گەلانو وەرکەوتی دلین-ی و مرۆڤایەتییچەن، چونکە ڕژێمە ئەرگێر و دژە کوردەکەو ئەردۆغانی جەسەرتاوە تا بە ئارۆ سەرسەختەرین دوژمنیاتەی و دژایەتی شۆڕشەکەیش کەردەن و دمایین دوژمنایەتیچش یاداشتنامەکەشەن چەنی سویدی و فنلەندای جە چوارچوەو هامپەیمانی ناتۆیەنە، کە شەرمەزایێوی گەورەن پەی ئا دوە وڵاتەیە کە بانگەشەو وەڵێکەوتەی و دیمۆکراتی مکەرانۍٚ.
 
دمابەدمای ئاخێزی جە سوریا و هەرێمەکەنە و لاڕارە بەردەیش و ڤیەرەکێ وەرکەوتی میانی و شکسدای بە هیواکێ و داواکاریەکێ گەلانو هەرێمەکەی، جە ڕۆژاڤا مسیارەکێ ئاپۆی بارودۆخەکەشان جورێ تەر فاڕا و گێرت دەست. بەئی جۆرە جە کوردستان، سوریا و وەرکەوتی میانیەنە، ئاخێز و دەسکەوتەکێ ڕۆژئاڤای تاکە پارێزەرێ ئازادی و دیموکراسییەنێ و جە ڕۆژئاڤا گەلێ، ئاینێ، باوەڕیێ و چینە جیێ جیێکێ گلێرگەی پارێزیانە و پێۋەر ئازادانە و ئاشتیانە مژیۋانە و بیێنۍ بە داینەمۆ فاڕای چارەنویسو وەرکەوتی دلینی. هەر پۆکەی دەسەڵاتی فاشیست و نەژاردپەرەستەکەو ئاکەپە-مەهەپەی نۆکەرەکێش جە ئاستی هەرە بەرزەنە دژایەتیش مەکەرانێ. 

یۆجە چێوە فرە گرنگەکان کە شۆڕشو ڕۆژاڤایش جیا مەکەردەوە، هەرجە سەرتاوە ژەنی جە سەرجەم بوارەکانە ڕۆڵ و جایگاو کارا و فرە کاریگەر و تاببەت و پێشەنگش بێ و تا بە ئارۆچ هەنش و ئانێچە ژەنی سەرجەم جیهانش سەرسامێ کەردێنێ و کارێش کەردەن کە جیهان شۆڕشو ڕۆژئاڤای بە شۆڕشو ژەنێ بژناسۆنە. ئاخێز سەلەمناش کە دیموکراسیی ڕاسەقینە ئانەنە کە بەهاکێ گلێرگەی پارێزنۆنە، ئانێچە تەنیا و تەنیا جە ڕۆژاڤانە هەن. ژەنی و ئاخێزگەری و کۆشەرێ سەرتاسەرو جیهانی پەی ئەزموون هۆرگێرتەی جە شۆڕشی بە تاسە و سەرسامی ڕووەشان جە ڕۆژئاڤای نیێنە و هەم بەشدارێ ئاخێزی بیێنۍ هەم دمای ئازموون هۆرگێرتەی گێڵێێۋە پەی وڵاتەکانشان بینۍ دەنگ و ڕەنگو ئاخێزی و پیادەکەردەیش جە وڵاتەکانشانە.

هامتەریب چەنی جەنگی و مدرامانی چەنی تاقمە چەتە جیا جیاکێ تورکیا و داعشی و پیلانەکۍٚ ڕژێمەکێ تورکیای، سوریای و ئێرانی و هاموەخت سیاسەتو بەرژەوەندیوازانەو ئەمەریکاو و ڕوسیای،  راوەبەریی ئاخێزو ڕۆژاڤای جە سەرجەم بوارەکانە چوون (وشیاری تاکی و گلێرگەی، پەرووەردە، دبلۆماسی و سیاسی، کۆمەڵایەتی، پیشەسازی، کشتوکاڵ، خزمەتگوزاری)ی کارا کۆشان و خەمی یەکەمش هاموڵاتی، نەتەوە و نیشتمان بییەن بە سەرجەم گەلۍٚ، پێکئامایە جیاجیاکۍٚ گلێرگەی بەبێ جیاوازی.

جە رۆزگارو ئارۆینە کە ئاخێز و شۆڕشو ڕۆژاڤای و دەستکەوتەکێش ١٠ ساڵێشان دهرباز کەردەن، ڕووبەڕووێ ئاڵنگاری و دژایەتیی و هەڕەشۍٚ ڕژێمە فەشیستەکەو ئەردۆغانی و هامپەیمانەکانش  بییەنەوە، خۆڵقنەرۍٚ ئاخێزکەی بە گەل و ڕاوەبەری وێسەری دیمۆکراتی سەرنیشت و وەرکەوتو سوریایەوە، ئینۍٚ ئامادەکارییەنە پەی مدرایۆ دژ بە مەترسییەکا و پارێزنای دەستکەوتەکانو شۆڕشەکەی و وازیارێچەنۍٚ کورد و گەلە ئازادیۋازەکۍٚ سوریای، وەرکەوتی دلینی و جیهانی، ڕۆژاڤای بە تەنیا نەئازانێوە و پەشیوانی و همکاریش بکەرانۍٚ، چونکە شۆڕش و ئاخێز و ڕۆژاڤاو کوردستانی و دەستکەوتەکێش، تەنیا هینۍٚ کوردی و گەلانو سەرنیشت و وەرکەوتو سوریای نیەنۍٚ، بەڵکو هینۍٚ سەرجەم مرۆڤایەتییەنۍٚ و پارێزنایچشان ئەرکو گلێرگەو مرۆڤایەتیین و سەرجەم ئازادیۋازان جە سەرتاسەرو جیهانیەنە.