سەرەڕاو ئانەی یەرێ مانگێ سەرو بانگەوازو ٢٧و شوباتو ڕابەر ئاپۆیرە ویەردەن، هەڵای دۆڵەتو تورکی هەنگامێوە ڕۆشنەش نەنیێنە. بە تایبەتی تا ئیساتۍ گۆشەگیری سەرو ڕابەر ئاپۆی بەردەواما.

ئەندامو ئەنجوومەنو پارتو هەرێمە دیموکراتیکەکا (دەبەپە) موستەفا ئاکەنگین پەی ئاژانسو هەواڵو فوراتی (ANF) قسێش کەردێ و واتش: "ئەر بە گرڏی تەڤگەرو سیاسیی کوردی هورسەنگنمێنە، وینمێ وەڵێ ٣٠ ساڵا ئێژا عەبدوڵا ئۆجالان پەی چەک نییارەی بانگەوازو ئایێر بەستەیش کەردەبێ. جە ١٧و نیسانی ١٩٩٣نە تورگوت ئۆزاڵ مەرد و پڕۆسەکە  مردا.

حەر پۆکەی ئا بانگەوازەی ئێژا عەبدوڵا ئۆجالان جە ٢٧ی شوباتینە کەردش، بانگەوازێوە تازە نییا، وەڵێ ٣٠ ساڵانە  هەمان چێوش واتەبێ. حەرپۆکەی ئی بانگەوازە تازە پەی تورکیایێ تازەی پێسەو هیوێوە هورسەنگنمێنە."

'کورد خاوەندارێتیش جە پڕۆسەکەی کەرد'

ئاکەنگین ئاماژەش پانەیەدا گەلوو کوردی بە شێوێوە جدی خاوەندارێتیش چا پڕۆسەیە کەرد کە ڕابەر ئاپۆ دەسش پنەکەردەن و واتش: "فشار و نکۆڵیکەردەی زوان و کوردی و کوردا هەڵای بەردەواما. بە ڕاسی بانگەوازەکەو ئێژا ئۆجالانی خاوەن گرنگییێ تاریخییا. مشۆم ئینسان بەها، واتا و گرنگی ئینەیە زانۆنە.

مشۆم ئینسان ئینەیچ واچۆنە: جە دۆخو ئیسە و دۆڵەتو تورکی ئابووری، یاسای و ئەخلاقی تێکشییەن. حەر پۆکەی نیگەرانەنا ئایا حکومەت ئی پەرسا چارەسەر مکەرۆ و یا نا. داخەم مەشۆ، حکومەت ڕەوایەتی وێش جە دەسدان. هیوام بە پڕۆسەکەی هەن؛ هیوادارەنا ئی پڕۆسەیە بە ئەنجام بۆنە و حەسرەتو کوردا دمایش بێ. ئیتر گەمە چنی کوردا نەکریۆنە. هەر پۆکەی مشۆ  بە ئەقڵێوە ساقۆ نزیکق پڕۆسەکەی بیمێوە."

'پەی ئاشتیێ شكۆداری پاگیرێنمێ'

ئاکەنگین ئاماژەش پانەیەدا مشۆم گۆشەگیری سەرو ڕابەر ئاپۆی دەموو دەس هورگیریۆنە و ئازادی جەسەیی بە دی بێنە و واتش: "جە کۆنۆ وینمێنە کورد دانش پۆرەمەنیۆ، بییە و زوان و کوردا بە تەمامەتی نکۆڵیش ونە کریۆنە. جە ١و تشرینو یوەمی دۆڵەت باخچەلی بانگەوازێوەش کەرد. ئاماژەو ئێژا ئۆجالانیش کەرد و واتش: "با جە پەرلەمانەنە قسێ بکەرۆ و مافو هیوای بە دەس بارۆنە". با ئا چێوێ پری ئینەی پنەوازێنێ کریانە. با نیشانما دانە پەی ئی پەرسێ چنە جدینمێ.

ئێژا ئۆجالان جە سەدەی تازەنە چارەسەرێوەش پێشکەش بە تورکیای کەرد. ئەر گۆشەگیری هورگێرانە و گرڏ هەلومەرجێوە خوڵقنانە، ئانەی گنۆنە ئەستۆش جابەجێش مکەرۆ. هیچ ڕێوەتەرە نییەنە . ئەر بەڕاسی ئی هەرمانێ کریانە، ئانە ڕا پەی تورکیای کریۆوە. با دەموو دەس گۆشەگیری سەرو ئێژا عەبدوڵا ئۆجالانی هورگیریۆنە. پێسەو گەلی و پارتەکەیما ئینەما گەرەکا. پەی ئاشتیێ شكۆمەندی پاگیرێنمێ."