دماو ئانەی پەرلەمانتارەو بازنەو قەرس و دەم پارتی گوڵستان کلیچ کۆچییگیت-ە فێڵەو فاڕایۆ دەنگدەراش پۍ قەرسی دلۍ پەرلەمانینە ئاشکرا کەرد، ئینجا ئاشکرابی کە ئاکەپە وانیچەنە هەمان فێڵە بەکارمارۆ.

ئاکەپە چنڎین ساڵېن وانەنە دۊڕنۆش، دەسشکەردەن بە فرت و فێڵەو فاڕایۆ دەنگدەرا و ساختەکاری جە لیستوو دەنگدەرانە، بە هەمان شێوەو مەنتیقەو چاتاخی گەرەکشا جە مەنتیقەو ئارتەمێتی وانینە بەنامۍ ۋنەقۊمیایا بومەلەرزەیۆ دەیان کەسۍ ئەرەنیشتۍ کەرۆ.

ئا کەسۍ جە گلېرگېوە ئەرەنیشتەبیەی حکومینە ئەرەنیشتۍ کریا، بە قسۍ ئەرەنیشتا تەروو ئا گلېرگە ئەرەنیشتەبیەیە، ئا کەسۍ کە ئاردێنێشا نزیکەو ٨٠ بنەیانا با و زەڕوو کرێ یانەو، ئاوی، گاز و کارەباشا چنە هۊرمەگیریۆ.

ئا کەسۍ کە وەڵتەر جە گلېرگەو ئەرەنیشتە بیەینە نەبېنۍ، ئاماژەشا پانەی کەرڎەن، کە ئا دەنگەدەرۍ ئاردېنێشا واتەنشا، کە جە لایەنوو دەسەڵاڎداراوە پنەشا وچیان، کە ئەگەر تا وەختوو هۊرچنیەی چۍ مەندېوە یانەکۍ پۍ وێتا با.

جە مەنتیقەو ئارتەمێتی نزیکەو ٧٦ هەزار کەسا مافوو دەنگدایشا هەن و جە دمایین هۊرچنیەو دلېینەینە کە ساڵەو ٢٠٢٣ لوواڕاوە، کاندیدوو هەدەپەی سەڎەنە ٥٣ۍ دەنگەکاش بەدەسئاردۍ، بەڵام ئاکەپە مەرسوموو دەسبەکاربیەیش پۍ بەرنەکەرد و جیای ئاڎی قەیومێوەش نیارە.